Bakı Şəhər İcra Hakimiyyəti (BŞİH) güclü küləklə bağlı paytaxt sakinlərinə, xüsusilə sürücülərə xəbərdarlıq edib. BŞİH Yaşıllaşdırma Təsərrüfatı Birliyinin Bitkilərin mühafizəsi şöbəsinin rəisi Orxan Məmmədov Trend-ə bildirib ki, güclü küləklə əlaqədar Bakı şəhər İcra Hakimiyyəti tərəfindən qərargah yaradılıb. Qərargah yanvarın 17-də və 18-də gücləndirilmiş rejimdə fəaliyyət göstərəcək.
O.Məmmədov qeyd edib ki, yanvarın 17 və 18-də güclü külək müşahidə olunacağından vətəndaşların, eləcə də sürücülərin diqqətli olmaları tövsiyə edilir. Belə ki, bir çox hallarda sürücülər avtomobilləri məhz ağacların altında saxlayırlar ki, bu da küləkli havada çox təhlükəlidir: "Sürücülərdən xahiş edirik ki, avtomobillərini hündür və irigövdəli ağacların altında park etməsinlər. Həmçinin sakinlərdən ehtiyatlı olmaları xahiş olunur, küləkli hava şəraiti ilə əlaqədar ağacların altından keçməmələri tövsiyə olunur".
Bakı Metropoliteni gücləndirilmiş iş rejiminə keçdi, açıq havada iş qadağan edildi
"Bakı Metropoliteni" Qapalı Səhmdar Cəmiyyəti ölkə ərazisində gözlənilən ifrat təhlükəli hava şəraiti ilə bağlı gücləndirilmiş iş rejiminə keçib. Bu barədə Trend-ə qurumun mətbuat xidmətinin rəhbəri Bəxtiyar Məmmədov deyib.
B.Məmmədov bildirib ki, ölkə ərazisində gözlənilən kəskin hava şəraiti, güclü küləklə əlaqədar "Bakı Metropoliteni" QSC-də açıq hava şəraitində olan bütün təsərrüfat sahələrində müvafiq tədbirlər görülüb: "Xəbərdarlıqla əlaqədar yerüstü təsərrüfat sahələrinə baxış keçirilib, küləyin təsirinə məruz qala biləcək qurğu və avadanlıqlar yoxlanılıb.
Yanvarın 17 və 18-də açıq havada hündürlükdə, kranda işlərin icrası qadağan edilib. Bundan əlavə, yerüstü sahədə yerləşən "Nərimanov" elektrik deposunda müvafiq tədbirlər görülüb, gücləndirilmiş iş rejimi tətbiq olunub".
Yol polisi bütün qüvvələri səfərbər edəcək
Bakı şəhər Baş Polis İdarəsi Dövlət Yol Polis İdarəsi hava şəraiti ilə bağlı sürücülərə və piyadalara müraciət edib. İdarəsinin bölmə rəisi, polis polkovniki Vaqif Əsədov Trend-ə bildirib ki, ölkə ərazisində hava şəraitinin kəskin dəyişməsi səbəbindən bütövlükdə yollarda təhlükəsizliyin təmin edilməsi məqsədilə yol polisi əməkdaşlarının hər biri gücləndirilmiş iş saatı ilə xidmət edəcək və bütün qüvvələr səfərbər olunacaq.
V.Əsədov bildirib ki, xüsusilə yol hərəkətində təhlükəsizliyi təmin etmək, hərəkət iştirakçılarını bu vəziyyətdən çıxarmaq üçün ərazi tam nəzarət götürülməklə enişli-yoxuşlu yollar, sərt döngələr, tunellər, körpülər yol polis əməkdaşlarının nəzarətində olmaqla keçmə növbəliyi təmin ediləcək, eyni zamanda polis nəfərləri nizamlayıcı qismində xidmət göstərəcəklər: “Ona görə də sükan arxasında olanlar yol polisi nəfərlərinin nizamlayıcı qismində olmasını diqqətdə saxlamalı və onların göstərişlərinə düzgün və dəqiq riayət etməlidirlər. Təbii ki, belə hava şəraitində birinci tövsiyəmiz odur ki, şəxsi nəqliyyat vasitələrindən imtina edilsin, ictimai nəqliyyatdan istifadəyə üstünlük verilsin. Digər tərəfdən belə hava şəraitində avtomobil idarə etməyə uyğunlaşan peşəkar sürücülərin hərəkətinə şərait yaradılsın. Piyadalar onlar üçün ayrılmış yollarla getməyə üstünlük verməlidir. Təhlükəsizliyin təmin edilməsində hər bir hərəkət iştirakçısı funksional vəzifəsini bilməli və onu düzgün yerinə yetirməlidir”.
V.Əsədov gözlənilən güclü küləklə əlaqədar da sürücülərə tövsiyə edib. O qeyd edib ki, ola bilər ki, güclü külək ağacların aşmasına təsir göstərsin: “Sürücülər avtomobillərini ağaclara yaxın yerlərdə saxlamaqdan imtina etsinlər. Hava şəraiti ilə bağlı sürüşmə ehtimalı ola bilər. Sürücülər sürət həddini minimuma endirməlidir, ara məsafələrini normadan artıq saxlamalıdır, yol nişanlarına əməl etməlidirlər. Avtomobillərin dövlət nömrə nişanlarının görünməsi təmin edilməlidir, işıq cihazları təmiz saxlanmalıdır”.
Fövqəladə Hallar Nazirliyi gücləndirilmiş iş rejimində çalışacaq
Fövqəladə Hallar Nazirliyi gücləndirilmiş iş rejimində çalışacaq. Nazirlikdən Trend-ə verilən məlumata görə, Ekologiya və Təbii Sərvətlər Nazirliyi Milli Hidrometeorologiya Departamentinin Hidrometeoroloji Proqnozlar Bürosunun xəbərdarlığına əsasən, Abşeron yarımadası, Xəzər dənizi Akvatoriyasında və respublikamızın rayonlarında gözlənilən təhlükəli hidrometeoroloji hadisə ilə əlaqədar vətəndaşların həyat və fəaliyyətinin təhlükəsizliyinin təmin edilməsi, mühüm əhəmiyyətli obyektlərdə baş verə biləcək fövqəladə hadisələrin və qəzaların vaxtında aşkarlanaraq qarşısının alınması, onların mümkün nəticələrinin operativ aradan qaldırılması işinin təşkili məqsədilə Fövqəladə Hallar Nazirliyinin aidiyyəti qəza-xilasetmə qurumları və regional mərkəzləri 17-18 yanvar 2019-cu il tarixilərində gücləndirilmiş iş rejimində çalışacaq.
Bununla əlaqədar Fövqəladə hallar naziri general-polkovnik Kəmaləddin Heydərov tərəfindən müvafiq əmr imzalanıb.
Nəqliyyat, rabitə və yüksək texnologiyalar nazirliyində hava ilə əlaqədar operativ qərargah yaradıldı
Nəqliyyat, rabitə və yüksək texnologiyalar naziri Ramin Quluzadə 16-18 yanvar tarixinə proqnozlaşdırılan hava şəraiti ilə əlaqədar nazirliyin tabeliyindəki qurumların rəhbərləri ilə görüş keçirib. Nazirlikdən Trend-ə verilən məlumata görə, R.Quluzadənin rəhbərliyi ilə operativ qərargah yaradılıb.
Əhalinin nəqliyyat, telekommunikasiya, poçt, o cümlədən internet, mobil rabitə xidmətləri, radio-televiziya yayımı ilə fasiləsiz şəkildə təmin edilməsinə dair müəssisə rəhbərlərinə tapşırıqlar verilib.
Nəqliyyat və rabitə obyektlərinin mühafizəsinin və yanğın təhlükəsizliyinin, eləcə də açıq havada işləyən işçilərin təhlükəsizliyinin təmin edilməsi üzrə müvafiq tədbirlər görülməsi barədə göstəriş verilib.
Qəza xidmət briqadaları hazırlıq vəziyyətinə gətirilib və növbətçi hissələr təşkil edilib.
Səhiyyə Nazirliyi - "Vətəndaşlardan xahiş olunur ki, təxribata uymasınlar”
"Sosial şəbəkələrdə küləklə birlikdə Azərbaycana donuz qripi virusunun gəlməsi barədə yayılan məlumatlar həqiqətə uyğun deyil. Ölkəmizdə bu virus yayılmayıb". Bunu Trend-ə Səhiyyə Nazirliyindən sosial şəbəkələrdə Azərbaycana küləklə birlikdə donuz qripi virusunun gəlməsi barədə yayılan məlumatlara münasibət bildirərkən deyiblər.
Nazirlik qeyd edir ki, ümumtəhsil müəssisələrində dərslərin dayandırılması Ekologiya və Təbii Sərvətlər Nazirliyinin havanın kəskin şəkildə dəyişməsi barədə verdiyi xəbərdarlıqla əlaqəlidir: "Vətəndaşlardan xahiş olunur ki, təxribata uymasınlar. Ölkədə epidemioloji durum tam nəzarət altındadır".
