Azər Allahverənov: “Araşdırmalar zamanı məlum olub ki...”
“Azərbaycanda qaçqın statusu ilə yaşayanların arasında İran vətəndaşlarının sayı üstünlük təşkil edir". Bunu Dövlət Miqrasiya Xidmətinin 2018-ci ilin yekunlarına həsr olunmuş mətbuat konfransında xidmət rəisi Vüsal Hüseynov deyib.
O bildirib ki, hazırda Azərbaycanda 78 nəfər qaçqın statusu ilə yaşayır: "Ölkədə qaçqın statusu ilə yaşayanların 5 nəfəri Liviyadan, 28 nəfəri Əfqanıstandan, 2 nəfəri Pakistandan, 43 nəfəri isə İrandan olan şəxslərdir".
Azərbaycanda qaçqın statusu ilə yaşayanların arasında İran vətəndaşlarının sayının nə səbəbdən üstünlük təşkil etməsini miqrasiya sahəsi üzrə ekspert Azər Allahverənov izah etdi. O, “Bakı-Xəbər”ə açıqlamasında qeyd etdi ki, son 15 ildə Azərbaycanda qaçqın statusu ilə yaşayan vətəndaşların sayı çoxdur. Onların arasında tək İran vətəndaşları üstünlük təşkil etmir, eyni zamanda, Əfqanıstan, Çeçenistan və digər ölkələrin vətəndaşları da say baxımından çoxluq təşkil edirlər. Aidiyyəti qurumlar qaçqın statusu üşün müraciət edən vətəndaşların nə səbəbdən gəldiklərini öyrənirlər. Bəllidir ki, qaçqınlıq statusunun verilməsi üçün müəyyən əsaslar var. Həmin şəxsin həyatı və ya ailəsi üçün təhlükəli şərait olarsa, hərbi münaqişələr zamanı məcburi şəkildə yaşadığı ərazini tərk edir.
Əvvəllər qaçqın kimi gələnlər arasında İran vətəndaşlarının sayı çox deyildi. Ancaq aparılan araşdırmalar zamanı məlum oldu ki, daha çox İrandan müraciət edən şəxslərə qaçqın statusunun verilməsi üçün müəyyən əsaslar var. Həmin əsaslar nəzərə alınaraq Azərbaycan hökumətinin qaçqın kimi tanıdığı şəxslərin böyük bir qismi İran vətəndaşları oldu. İranla yanaşı, digər ölkələrin vətəndaşları da qaçqın statusu almaq üçün müraciət edirlər. Həmin müraciətə müsbət cavab verilməzsə, o zaman onlar Birləşmiş Millət Təşkilatının Qaçqınlar üzrə Ali Komissarlığına müraciət edirlər. BMT-də isə onlara sığınacaq axtaran şəxs statusu verilir. Məlumdur ki, Azərbaycan hökuməti də BMT-nin bu qərarını tanıyır və həmin şəxslərin ölkə ərazisində leqal şəkildə qalması üçün şərait yaradıb. Nəticə etibarilə Azərbaycan tərəfi həmin şəxslərə ərazi sığınacağı vermiş olur. Onu da bildirim ki, Azərbaycanda qaçqın kimi yaşayanlar BMT-nin qaçqınlar üzrə qurumunun nəzarətindədirlər”.
Günel CƏLİLOVA
