Məlahət Mürşüdlü: “Elmin İnkişafı Fondunun indiyəcən elmin inkişafı ilə bağlı həyata keçirdiyi layihələr, digər məsələlərdə icra etdiyi layihələr cəmiyyətə məlum deyildi”
Prezident İlham Əliyev Azərbaycan Respublikasında dövlət idarəçiliyinin təkmilləşdirilməsi ilə bağlı əlavə tədbirlər haqqında fərman imzalayıb. Fərmanın imzalanmasında məqsəd Azərbaycan Respublikasında dövlət idarəçiliyinin daha da təkmilləşdirilməsi, dövlət orqanlarının və qurumlarının fəaliyyətinin optimallaşdırılması və dövlət büdcəsi vəsaitindən səmərəli istifadənin təmin edilməsidir.
Fərmana əsasən, Azərbaycan Respublikasının Prezidenti yanında Elmin İnkişafı Fondunun və Bakı Beynəlxalq Multikulturalizm Mərkəzinin fəaliyyətləri özünümaliyyələşdirmə prinsipi əsasında həyata keçirilməklə yenidən təşkil edilir.
Azərbaycanın dinamik inkişafı, iqtisadi və sosial sferada əsaslı pozitiv dəyişikliklərin həyata keçirilməsi cəmiyyət həyatının bütün sahələrində özünü göstərir. Bütün bunlar həm də çevik və məqsədyönlü fəaliyyət göstərən yeni idarəetmə strukturunun formalaşdırılmasını zərurətə çevirib. Təsadüfi deyil ki, Nazirlər Kabinetinin 11 yanvar tarixli iclasında çıxış edən Prezident İlham Əliyev struktur islahatının gözləndiyini deyib: “İdarəetmədə struktur köhnəlib. Yeni idarəetmə strukturu olmalıdır – daha çevik, daha yığcam, daha məqsədyönlü. Çünki illər boyu yeni qurumlar yaranır. Onlar yarananda o qədər də hiss olunmur. Biri orada, biri burada yarandı, bir agentlik, bir xidmət yarandı. Sonra da baxanda görürük ki, bizim idarəetmə strukturumuz böyük dərəcədə şişirdilib. Buna son qoyulmalıdır. Ona görə struktur islahatı, kadr islahatı aparılmalıdır”.
Bütün bu deyilənlərin fonunda, Elmin İnkişafı Fondunun və Bakı Beynəlxalq Multikulturalizm Mərkəzinin özünümaliyyələşdirmə sisteminə keçməsini ekspertlər necə dəyərləndirirlər?
Məsələyə münasibət bildirən təhsil sahəsi üzrə ekspert Məlahət Mürşüdlü iki qurumun özünümaliyyələşdirmə sisteminə keçməsinə müsbət prizmadan yanaşdı: “Aparılan islahatlar çərçivəsində belə bir qərarın verilməsi vacib idi. Bəzi qurumların ləğv edilməsi, digərlərinin özünümaliyyələşdirmə sisteminə keçməsi struktur dəyişikliklərinin tərkib hissəsidir. Elmin İnkişafı Fondunun indiyəcən elmin inkişafı ilə bağlı həyata keçirdiyi layihələr, digər məsələlərdə icra etdiyi layihələr cəmiyyətə məlum deyildi. Məlum deyildi bu layihələri kim alır və necə həyata keçirir? Eyni zamanda, sözügedən layihələrin elmin inkişafı üçün nə dərəcədə faydalı və əhəmiyyətli olması da aydın deyildi. Necə deyərlər, bunlar cəmiyyətə qaranlıq idi. Düşünürəm ki, bu qurumların təsərrüfat hesabına keçməsi doğru addımdır. Aparılan yenilik doğrudur və effektli olacağı qənaətindəyəm. Dövlətin büdcəsindən bəhrələnən, cəmiyyətin inkişafı üçün dəyərli töhfələr verməyən qurumlar işini yenidən qurmalıdır. Bəlkə o zaman sözügedən qurumlar effektiv fəaliyyət göstərər”.
Vidadi ORDAHALLI
