Musa Quliyev: “Azərbaycanda səhiyyə sektorunun inkişafı istiqamətində görülən işlər sayəsində yaxın illər ərzində…”
Son illərdə səhiyyə sisteminin təkmilləşdirilməsi və inkişafı istiqamətində dövlət tərəfindən müəyyən işlər görülür. Mütəmadi olaraq bölgələrdə yeni xəstəxanalar açılaraq əhalinin istifadəsinə verilir, həmçinin, istifadəyə yararlı tibb müəssisələri yenidən təmir olunur.
Bu günlərdə Bakının Qaradağ rayonunun Qobustan qəsəbəsində Səhiyyə Nazirliyinin yeni inşa olunan 17 saylı birləşmiş şəhər xəstəxanası açılıb. Xəstəxananın açılış mərasimində Prezident İlham Əliyev də iştirak edib.
Dövlət başçısı bildirib ki, sosial məsələlər arasında, əlbəttə, səhiyyə sisteminin inkişafı xüsusi yer tutur: “Çünki bizim siyasətimizin mərkəzində Azərbaycan vətəndaşıdır və hər bir insan üçün onun sağlamlığı, onun yaxınlarının sağlamlığı xüsusi əhəmiyyət daşıyır. Biz çalışırıq və çalışacağıq ki, bu sahədə bütün lazımi tədbirləri görək. Onu da bildirməliyəm ki, təkcə son 15 il ərzində ölkəmizdə 600-dən çox xəstəxana, tibb müəssisəsi ya yenidən tikilib, ya da əsaslı şəkildə təmir edilib. Ölkəmizin hər bir şəhərində və ya onların mütləq əksəriyyətində müasir xəstəxanalar artıq tikilib və bir neçə şəhərdə tikinti işləri davam edir”.
Prezident qeyd edib ki, yaxın gələcəkdə Azərbaycanda elə bir şəhər olmayacaq ki, orada ən müasir tibbi mərkəz olmasın: “5 milyondan çox insan hər il dövlət xətti ilə tibbi müayinədən keçir. Bu, bizim təşəbbüsümüzdür və dünyanın nadir ölkələrində belə təşəbbüs həyata keçirilir. Bunun da bir məqsədi var ki, vətəndaşlar, əgər onların sağlamlığında hər hansı bir problem varsa, onu vaxtında aşkar etsinlər və yüksək səviyyəli müalicə alsınlar. Bu proqram nəticəsində minlərlə insan artıq lazımi səviyyədə müalicə alır".
Görülən işlər sayəsində səhiyyə sektoru inkişaf edir. Bu sahənin inkişafı ilə bağlı ölkənin hər bir ərazisində müasir standartlara cavab verən xəstəxanalar tikilir. Dövlət başçısının qeyd etdiyi kimi, bu sahənin inkişafı istiqamətində görülən işlər sayəsində yaxın gələcəkdə Azərbaycanda elə bir şəhər olmayacaq ki, orada ən müasir tibbi mərkəz olmasın.
Yaxın illər ərzində hər şəhərdə müasir tibbi mərkəzlərin yaradılması əhalinin ümumi sağlamlığı kontekstində nə kimi rol oynayacaq?
Məsələ barədə fikir bildirən Milli Məclisin Səhiyyə komitəsinin sədr müavini, millət vəkili Musa Quliyev “Bakı-Xəbər”ə açıqlamasında qeyd etdi ki, bu addım Prezidentin səhiyyə sahəsi ilə bağlı apardığı uğurlu siyasətin məntiqi davamını ifadə edir: “Prezident hər zaman bildirir ki, bizim sosial-iqtisadi sahədə qazandığımız uğurların və apardığımız siyasətin mərkəzində Azərbaycan vətəndaşı, vətəndaşlarımızın sağlamlığı, onların sosial rifah halının yaxşılaşması və vətəndaşlarımıza xidmət dayanır. Məhz bu siyasətin nəticəsidir ki, son 15 ildə Azərbaycanda 650-dən çox xəstəxana və ya tibb müəssisəsi əsaslı şəkildə təmir olunub və yaxud yenidən tikilərək vətəndaşlarımızın istifadəsinə verilib. Bu müəssisələr ən müasir tibbi avadanlıqlarla təchiz edilib".
Millət vəkilinin sözlərinə görə, artıq 4 ildir cənab Prezidentin birbaşa göstərişi ilə Azərbaycanda əhalinin icbari dispanserizasiyası aparılır: “Məlumat üçün bildirim ki, ötən il 5 milyon vətəndaşımız dövlət vəsaiti hesabına tibbi müayindən keçib və onların sağlamlıq vəziyyəti öyrənilib, hər hansı bir xəstəlik aşkar edildiyi halda onların müalicəsi təmin edilib. Bu gün Azərbaycanda çox müasir səhiyyə sistemi formalaşıb. Bu sistemdə Azərbaycanın son 10 ildə müxtəlif xarici ölkələrdə və Azərbaycanda təhsil alan qabiliyyətli həkim və tibb personalı çalışmaqdadır. Bu gün dünyada aparılan elə bir əməliyyat yoxdur ki, Azərbaycanda həyata keçirilməsin. Ölkəmizdə orqan köçürülməsindən tutmuş, açıq ürək və beyin əməliyyatlarına qədər həyata keçirilir".
M.Quliyev onu da vurğuladı ki, icbari tibbi sığortanın yaxın vaxtlarda bütün ölkə ərazisində tətbiqi gözlənir: "Bundan sonra əhalinin tibbi xidmətlərə əlçatanlığı daha da yaxşılaşacaq. Məlumdur ki, ötən ilin son günlərində Prezidentin fərmanı ilə TƏBİB müəssisəsi yaradıldı. Bu publik hüquqi şəxs ölkə ərazisində icbari tibbi sığortanın həyata keçirilməsi üçün hazırlıq işləri görəcək.
Onu da qeyd edim ki, 2020-ci ildən etibarən icbari tibbi sığorta daha geniş şəkildə tətbiq olunacaq. Azərbaycanda səhiyyə ximətlərinin keyfiyyətinin yüksəldilməsi təmin olunacaq. Məlum məsələlər ölkə başçısının daim diqqətindədir. Təbii ki, görülən işlər sayəsində Azərbaycan vətəndaşlarının sosial rifahı yaxşılaşacaq, sağlamlığı yüksək səviyyədə bərpa olunacaq”.
Günel CƏLİLOVA
