Aytəkin Kamranqızı: “Bu gün kütləvi şəkildə virtual xəyanət var”
Son illər ailə münasibətləri üzrə mübahisələrlə bağlı Azərbaycanda baxılan mülki işlərin sayı artmaqda davam edir. Açıqlanan statistik rəqəmlər boşanmaq üçün müraciət edən cütlüklərin sayının günü-gündən artdığını göstərir. Qeyd edək ki, əvvəllər boşanmaq üçün müraciət edənlər əsasən qadınlar idi. Ancaq iddia olunur ki, boşanmaq üçün müraciət edən kişilərin sayı artıb.
Boşanmaq üçün müraciət edən bəylər arasında gənc, orta yaşlı, hətta yaşlı kişilər də var. Əsas səbəb də həyat yoldaşının telefona, sosial şəbəkələrə olan aludəliyidir: “Əlinə telefon düşən qadın başlayır "WhatsApp”da, "Facebook”da başqa kişilərlə tanış olmağa, yazışmağa. Bu gün evi, ailəni dağıdan o qadınların yeni texnologiyadan düzgün istifadə etməməsi ciddi problemdir. Bəzi qadınlar hətta uşaqlarını da atıb internetdə tanış olduğu kişiyə qoşulub qaçır. Bir müddət sonra o kişi də ondan istədiyini alandan sonra qadın qalır ortalıqda. Hətta elələri var ki, əri evdə olmayanda yazışdığı kişiləri evinə çağırır, onunla intim münasibətdə olur. Lap əxlaqsızları var ki, bunu övladlarının gözünün qabağında edir. Belə dəhşətli məqama gəlib çıxmışıq”.
Ekspertlər də problemin ciddiliyini və aktuallığını qeyd edirlər.
Sosioloq Aytəkin Kamranqızı bizimlə söhbətində qeyd etdi ki, boşanmalarda əksər hallarda təşəbbüskar tərəf qadınlardır: “Boşanmaların əsas səbəblərindən biri ailə quranların çoxunun ailə həyatına hazır olmamasıdır. Burada söhbət fiziki, maddi, mənəvi, psixoloji hazırlıqdan gedir. İnsanların maddi durumu təsir edir. Ailə quranların ayrıca yaşayış yerinin, daimi qazanc yerlərinin olmaması da boşanmalara təsir göstərir. Boşanmaların təşəbbüskarlarının 60 faizi qadınlardır. Ümumiyyətlə, azərbaycanlı qadınlar kişilərdən boşanmağa daha çox meyllidirlər”.
Həmsöhbətimiz onu da vurğuladı ki, boşanmaq üçün müraciət edən kişilər əsasən yoldaşının ona xəyanət etməsini əsas gətirir: “Boşanmaya səbəb kimi ən çox sosial şəbəkələr və ailələrin müdaxiləsi göstərilir. Əvvəllər deyilirdi ki, kasıbçılığın üstündə boşanma olur. Amma bu gün səbəblər tamam fərqlidir. Sosial şəbəkələr insanları ailədən soyudur. Az qala hər kəs sosial şəbəkədə özü üçün bir ailə qurur. Ona görə də cütlüklər bir-birindən narazı qalmağa başlayır. Kişilər elə bilirlər ki, “İnstagram” və “Facebook”dakı qadın daha gözəldir. Cütlüklər arasında yaranmış soyuq münasibət sonradan boşanmalara gətirib çıxarır. Təkcə Azərbaycanda deyil, dünyada boşanmaların əsas səbəbi kimi sosial şəbəkələr göstərilir. Bu gün kütləvi şəkildə virtual xəyanət var”.
Günel CƏLİLOVA
