Tərlan Musayev: “Düşünürəm ki, ciddi məsuliyyət tələb edən digər sahələrə rəhbərlik edən qurumlar DİN-in bu təcrübəsindən yararlanmalıdırlar”
Azərbaycanda polis veteranlarının təcrübəsindən, bilik və bacarığından daha geniş və səmərəli istifadə edilməsi artıq ənənə halını alıb. Onların ictimai təhlükəsizliyin təminində, cinayətlərin profilaktikası və açılmasında, təqsirləndirilən şəxslərin axtarışı tədbirlərinin planlaşdırılmasında təcrübəsindən istifadə olunur.
Son illər ölkənin bütün bölgələrində polis veteranlarının təcrübəsindən, bilik və bacarığından istifadə edilir. Polisin fəaliyyətində əldə olunmuş qabaqcıl təcrübənin qorunub saxlanması, daha da inkişaf etdirilməsi məqsədilə veteranların bilik və bacarığından istifadə olunmasına xüsusi əhəmiyyət verilir. Gənc əməkdaşların xalqımızın milli-mənəvi dəyərləri, vətənpərvərlik ruhunda tərbiyələnməsi, dünyagörüşünün formalaşması, multikultural dəyərlərə sadiq olması məqsədilə polis veteranlarının onlarla görüşü mütəmadi xarakter daşıyır. Eləcə də xidməti vəzifələrinin icrası zamanı qarşılaşdıqları çətinliklərin öhdəsindən gəlməkdə gənclərə yaxından kömək edirlər. Polis veteranlarının təşkilatlanması, bilik və bacarığı, peşəkarlığı təmsil olunduqları ərazi polis orqanlarının və nizami hissələrin gündəlik işində də öz müsbət təsirini göstərməkdədir. Bu bəzi cinayətlərin üstünün açılmasında mühüm rol oynayır. Təsadüfi deyil ki, təkcə bu ilin birinci rübü ərzində polis veteranları 1550 cinayət hadisəsinin açılmasında iştirak ediblər. Bütün bunlar bağlı qalan cinayətlərin açılmasına da öz müsbət təsirini göstərir. Faktiki olaraq Daxili İşlər Nazirliyi yeganə qurumdur ki, bu metoddan istifadə edir və təcrübədə çox yaxşı nəticə də verir.
Ümumən DİN-in bu təcrübəsini ekspertlər necə dəyərləndirirlər?
Məsələyə münasibət bildirən hüquqşünas Tərlan Musayevin sözlərinə görə, polis orqanlarında bu təcrübədən istifadə olunması təqdirəlayiq haldır. O bunu bir sıra arqumentlərlə əsaslandırdı: “Bilirsiniz ki, polisin funksiyasına yalnız asayışın keşiyində durmaq aid deyil. Polis, həmçinin, törədilən bütün növ cinayətlərin üstünün açılması və ona lazımi hüquqi qiymət verilməsi məsuliyyətini daşıyır. Asayişin keşiyində durmağa cavan, enerjili polis işçiləri tələb olunursa, cinayətlərin üstünün açılması və onların istintaqının aparılması üçün zəngin təcrübə və bacarıq tələb olunur. Olduqca spesifik sahədir. Bu baxımdan da veteran polislərin təcrübəsindən yararlanmaq olduqca zəruridir. DİN-in bu təcrübədən yararlanması həm də özünü doğruldur. Biz bunu cinayətlərin üstünün açılması statistikasına da əsaslanıb deyə bilərik. Müşahidələr göstərir ki, Azərbaycan bu istiqamətdə MDB ölkələri arasında ön sıralarda durur. Düşünürəm ki, ciddi məsuliyyət tələb edən digər sahələrə rəhbərlik edən qurumlar DİN-in bu təcrübəsindən yararlanmalıdırlar. Çünki elə sahələr var ki, orada yalnız nəzəri biliklərə malik olmaq kifayət etmir, təcrübə önəmlidir. Bu baxımdan polisin bu metoddan istifadə etməsi müsbət haldır”.
Vidadi ORDAHALLI
