Məhərrəm Zülfüqarlı: “Onların təsəvvüründə müsbət polis obrazı formalaşmağa başlayır”
Məlum olduğu kimi, bu günlərdə Xətai rayon 56 nömrəli tam orta məktəbin şagirdləri Rayon Polis İdarəsində qonaq olublar. “Polis uşaqların gözü ilə” mövzusunda keçirilən sözügedən görüş RPİ-nin təşəbbüsü və təşkilatçılığı ilə baş tutub. Tədbir həm də maarifləndirmə xarakteri daşıyırdı. Belə ki, idarənin rəisi, polis polkovniki Muradəli Babayev şagirdləri idarənin həyətində qarşılayıb.
Bir neçə dəqiqəlik səmimi söhbətdən sonra idarənin inzibati binası ilə tanışlıq başlayıb. Əvvəlcə növbətçi hissə uşaqlara təqdim olunub. Daha sonra digər otaqlar şagirdlərə göstərilib. İdarənin akt zalında əvvəllər daxili işlər orqanlarında xidmət etmiş, bu gün də xidmətdə olan davamçılarına dəstəyini əsirgəməyən veteranlarla şagirdlərin görüşü keçirilib.
Polis veteranlarını, məktəbin müəllim və şagird kollektivini idarədə görməkdən məmnunluğunu bildirən, bu tədbirdə keçmişlə bu günün və gələcəyin bir araya gəldiyini deyən polis polkovniki M.Babayev gələcəyimiz olan uşaqlara müstəqilliyimizin sütunlarının daha da möhkəmlənməsində Azərbaycan Polisinin keçdiyi inkişaf yolundan, tarixi xidmətlərindən bəhs edib. O, gələcəyimiz olan uşaqları, gəncləri zərərli vərdişlərdən, pis əməllərdən qorumaq üçün məktəblərdə, əmək kollektivlərində keçirilən maarifləndirici tədbirlərə diqqət çəkərək sabahımızı, gələcəyimizi düşünən polislərin bundan sonra da görüləsi işinin çox olduğunu xatırladıb.
Ümumilikdə, belə görüşlərin keçirilməsi polisin sevdirilməsində, onlara münasibətin dəyişməsində, cəmiyyətdə müsbət polis obrazının yaradılmasnda necə rol oynaya bilər?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, belə görüşlərin keçirilməsi polisin cəmiyyətdə imicinin yüksəldilməsində mühüm əhəmiyyətə malikdir: “Əvvəla bu, şagirdlərin dünyagörüşünə müsbət təsir göstərir. Hesab edirəm ki, belə görüşlər tez-tez keçirilməli və maarifləndirmə xarakterli olmalıdır. Digər qurumlarla da bənzər görüşlərin təşkil olunmasına ehtiyac var. Sözügedən görüşlər həm şagirdlərin polisə münasibətini müsbətə doğru dəyişə bilər, eyni zamanda onların dünyagörüşünü artıra bilər. Həmçinin, həyatda lazımi səviyyədə hazırlıqlı vəziyyətdə olarlar ki, sabah hansısa quruma gedəndə çətinliklə üzləşməsinlər. O baxımdan polislə belə görüşlərin təşkil olunmasına müsbət prizmadan yanaşıram. Nəzərə almaq lazımdır ki, bu kimi görüşlər nəticəsində polislə birbaşa ünsiyyət yaranır. Nəticədə şagirdlərin polisə münasibəti müsbətə doğru dəyişir. Onların təsəvvüründə müsbət polis obrazı formalaşmağa başlayır. İndiyə qədər təsəvvürlərdə polis barəsində mövcud olan bəzi xoşagəlməz stereotiplər yox olub gedir. O üzdən əlbəttə ki, belə görüşlərin keçirilməsi polisin imici üçün çox müsbət əhəmiyyətə malikdir. Hesab edirəm ki, bundan sonra da bənzər görüşlərin keçirilməsinə xüsusi önəm verilməlidir. Belə görüşlər nə qədər çox keçirilsə, bu bir o qədər ümumi işə öz töhfəsini verəcək. Fikrimcə, belə görüşlər davamlı olmalıdır. Nə qədər davamlı olsa, o qədər yaxşıdır. Bütün bunlar nəticə etibarilə polisin cəmiyyətdəki imicinin daha da möhkəmlənməsinə gətirib çıxaracaq”.
Vidadi ORDAHALLI
