Arzu Nağıyev: “Hüquq-mühafizə orqanları da öz işlərini yüksək səviyyədə qurdular”
Bakının Sabunçu rayonunun Nardaran qəsəbəsi artıq yeni görkəmdədir. Nardaran qəsəbəsinin görkəmi, vəziyyəti artıq tamamilə dəyişib. Qəsəbədə aparılan geniş quruculuq-abadlıq işləri nəticəsində Nardaran ərazisi yenidən qurulub. Qəsəbənin abadlaşdırılması, sosial-mədəni infrastrukturun yenilənməsi məqsədilə aparılan kompleks tədbirlər çərçivəsində ilk olaraq ərazinin mərkəzi küçələri yenidən qurulub.
Məlumat üçün xatırladaq ki, 2015-ci il noyabr ayının 26-da Bakının Nardaran qəsəbəsində polislə radikal dini qruplaşma üzvləri arasında toqquşma baş vermişdi. Qarşıdurmada ümumilikdə 7 nəfər dünyasını dəyişmişdi, 4 nəfər isə yaralanmışdı. 14 nəfər polisə silahlı müqavimət göstərməkdə və dövlətin dünyəvi dəyərlərinə qarşı çıxmaqda ittiham olunaraq həbs edilmişdi. Rəsmi məlumatlara görə, həlak olanlardan 2-si Azərbaycan Respublikası Daxili İşlər Nazirliyinin əməkdaşı, digər 5 nəfər isə qəsəbədə qeydiyyatda olan Tale Bağırzadə adlı şəxsin dəstəsinə qoşulmuş qruplaşma üzvləri idi.
Artıq Nardaran inkişaf dövrünü yaşayır. Prezident İlham Əliyevin imzaladığı müvafiq sərəncamlara əsasən, Nardaranın sosial-iqtisadi inkişafına ilkin mərhələdə 12 milyon manat, daha sonra isə 17,4 milyon manat vəsait ayrılması nəticəsində qəsəbənin nəqliyyat sistemi yenidən təşkil edilib, sosial-mədəni infrastruktur layihələrinin həyata keçirilməsinə başlanıb, böyük miqdarda borclara baxmayaraq, 1000-ə yaxın ailəyə işıq verilməsi bərpa olunub. Azərbaycan hökuməti “Azərişıq” Açıq Səhmdar Cəmiyyəti, “Azərsu” Açıq Səhmdar Cəmiyyəti, “Azəriqaz” İstehsalat Birliyi və “Azəravtoyolservis" Səhmdar Cəmiyyəti rəhbərlikləri qarşısında qəsəbənin sosial problemlərinin həlli istiqamətində konkret tapşırıqlar qoyub. Keçən il iyunun 21-də isə ölkə başçısı şəxsən Nardaran kəndinə səfər edərək sakinlərlə görüşüb, həyata keçirilən abadlıq-quruculuq işləri ilə yerində tanış olub.
“Azəravtoyol” Açıq Səhmdar Cəmiyyəti tərəfindən Abşeron və Nəsrulla Əsgərov küçələri yenidən qurulub. Uzunluğu 2,2 km, eni isə 8 metr olan Abşeron küçəsi genişləndirilərək 2 gediş, 2 gəliş hərəkət zolağı olmaqla 18 m-ə çatdırılıb. Küçədə gediş-gəlişə mane olan obyektlər köçürülərək obyekt sahiblərinə kompensasiya ödənilib. Küçə boyu yeni hasarlar tikilib, suvanıb və rənglənib, sakinlərin həyətlərinin girişinə estetik baxımından küçəyə gözəllik qatan yeni giriş qapıları qoyulub. Yenidənqurma işləri çərçivəsində yeni yeraltı kommunikasiya xətləri (qaz, işıq, rabitə, su və kanalizasiya) çəkilib, köhnələri isə tamamilə təzələnib.
Küçə boyu hər iki istiqamət üzrə 2 m. enində yeni piyada səkiləri tikilib, 4500 p/m yeni səki daşı düzülüb. Səkilərin 8800 kv. m. sahəsi asfaltlanıb, işıq dirəkləri üçün xüsusi bünövrə tökülüb, dirəklər quraşdırılıb. Abşeron küçəsinin Nəsrulla Əsgərov küçəsi ilə kəsişməsində 10 m. diametrində yeni dairə inşa edilib. Ümumilikdə, küçənin 40 min kv. m. sahəsinə 3 qat və 25 sm. qalınlığında olmaqla, yeni asfalt-beton örtüyünün döşənməsi işləri aparılıb.
Həmçinin, qəsəbə mərkəzindən Nardaran pirinə gedən Nəsrulla Əsgərov küçəsinin uzunluğu 850 metr, eni isə 6 metr olduğu halda, küçə genişləndirilərək 16 metrə çatdırılıb. Həmin küçədə də 2 gediş, 2 gəliş olmaqla 4 hərəkət zolağı yaradılıb. Hər iki istiqamət üzrə 2 metr enində yeni piyada səkiləri tikilib, səkilərin kənarlarına 1500 paqon-metr səki daşı düzülüb, küçənin 13 500 kv. m. sahəsinə yeni asfalt-beton örtüyü döşənib və ikitərəfli işıqlandırma dirəkləri quraşdırılıb.
Nardaranda aparılan abadlıq quruculuq işləri nəticəsində Nardaran sakinlərinin təhlükəsizliyinin təmin edilməsi məqsədilə qəsəbə ərazisində Daxili İşlər Nazirliyinin Sabunçu Rayon Polis İdarəsinin 42-ci polis bölməsi inşa edilərək istifadəyə verilib. Bölmə əməkdaşlarının səyi nəticəsində qəsəbədə ictimai-siyasi durum tam nəzarətə götürülüb, əhalinin təhlükəsiz yaşayışına şərait yaradılıb.
Qəsəbədə əhalinin asudə vaxtlarını səmərəli keçirməsi üçün müasir tipli Mədəniyyət Sarayı, sakinlərin poçt xidmətindən rahat istifadəsi üçün Poçt Şöbəsi istifadəyə verilib.
Adıçəkilən ərazidə fəaliyyət göstərən “Rəhiməxanım ziyarətgahı”, uzun müddət baxımsız qaldığı üçün aşınmaya məruz qalan, qədim tarixi memarlıq abidələri olan məsciddə təmir işləri aparılaraq əhalinin istifadəsinə verilib.
Onu da bildirək ki, əvvəllər Nardaran qəsəbəsinin məktəb yaşlı qızları müəyyən müddətdən sonra məktəbə getmirdilər. Artıq Nardaranın məktəb yaşlı bütün qız və oğlanları mütəmadi olaraq dərslərə gedirlər.
Eyni zamanda, Nardaranda təhlükəsizlik və kommunal xidmətlər də artıq yüksək səviyyədə həyata keçirilir. Belə ki, artıq Dövlət Təhlükəsizliyi Xidmətinin (DTX) Sabunçu Rayon İdarəsinin Nardaran bölməsinin yeni inzibati binası istifadəyə verilib. Müasir tələblərə cavab verən inzibati binada yaradılan iş şəraiti və maddi-texniki baza müasir standartlar səviyyəsindədir.
Nardaran qəsəbəsində Fövqəladə Hallar Nazirliyinin (FHN) Dövlət Yanğından Mühafizə Xidmətinin Sabunçu Rayon Dövlət Yanğından Mühafizə Hissəsinin 24 nömrəli Yanğından mühafizə bölməsi açılıb. 30 nəfər şəxsi heyəti olan bölmənin ərazisi 900 kvadratmetrdir. Bölmənin inzibati binası ən yüksək standartlara cavab verən müasir avadanlıqla təchiz olunub, şəxsi heyətin fəaliyyəti üçün hər cür şərait yaradılıb. Bölmənin ərazisində - yanğın deposu, nəzarət-buraxılış məntəqəsi, qazanxana, nasosxana, su anbarı, avtoyuma inşa olunub. İnzibati binada dispetçer, tədris, qəbul və istirahət otaqları, yeməkxana da var. Bölmə 2 ədəd ən müasir yanğınsöndürmə avtomobili ilə təmin edilib.
Onu da qeyd edək ki, Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən işsiz və işaxtaran vətəndaşların münasib işlərlə təmin olunması məqsədilə Bakının Nardaran qəsəbəsində əmək yarmarkası təşkil edilib. Yarmarkada iştirak edən əmək və əhalinin sosial müdafiəsi naziri Səlim Müslümov Nardaran qəsəbəsində sosial infrastrukturun müasir tələblərə uyğun səviyyədə yeniləşdirlməsi, qəsəbənin abadlaşdırılması, habelə qəsəbə sakinlərinin sosial problemlərinin həlli istiqamətində mühüm işlərin aparıldığını bildirib. Yarmarkada işsiz və işaxtaran vətəndaşlara Bakı şəhəri üzrə 17-si dövlət, 65-i qeyri-dövlət sektoruna aid, 5-i isə xarici şirkət olan ümumilikdə 87 müəssisə tərəfindən 215 boş iş yeri təklif olunub. Yarmarkada boş iş yeri təqdim edən əksər işəgötürənlərin nümayəndələri də iştirak edib. İşaxtaran vətəndaşlara boş iş yerlərinə göndərişlər verilməklə yanaşı, ayrı-ayrı sakinlər əmək bazarının tələblərinə uyğun peşələr üzrə peşə hazırlığı kurslarına, haqqı ödənilən ictimai işlərə cəlb edilmələri üçün qeydiyyata alınıblar.
Məlumat üçün onu da bildirək ki, son iki ildə Nardaranda mədəni-elmi və maarifləndirici tədbirlər də keçirilir. Nardaran qəsəbəsində Bilik Fondunun “Bilik evi”nin yaradılması dövlətin əhaliyə diqqət və qayğısının daha bir nümunəsidir. Bu ocaqda gənclərin və yeniyetmələrin dünyagörüşünün hərtərəfli inkişafı üçün geniş şərait yaradılıb. Burada müxtəlif ədəbiyyat, incəsənət və dövlət xadimləri ilə maraqlı görüşlər keçirilir, gənclərə elmi biliklərlə yanaşı, peşə vərdişləri də aşılanır. Ötən il Millətlərarası, multikulturalizm və dini məsələlər üzrə Dövlət müşavirliyi xidmətinin təşəbbüsü, Azərbaycan Respublikasının Prezidenti yanında Bilik Fondunun, Bakı Beynəlxalq Multikulturalizm Mərkəzinin və yerli icra hakimiyyəti orqanlarının birgə təşkilatçılığı ilə Nardaran Bilik Evində 16 noyabr - Beynəlxalq Tolerantlıq Gününə həsr olunan tədbir keçirilib.
2016-cı ildə Ailə, Qadın və Uşaq Problemləri üzrə Dövlət Komitəsi və Sabunçu Rayon İcra Hakimiyyətinin birgə təşkilatçılığı ilə Bakının Nardaran qəsəbəsindəki 295 nömrəli tam orta məktəbdə Xalq şairi Nəriman Həsənzadə ilə görüş keçirilib.
Qısası, Nardaran illər öncəki qəsəbə deyil. Nardaranda aparılan abadlıq-quruculuq işləri sayəsində qəsəbə yeni görkəmdədir və əhalisi onlar üçün yaradılan sosial, iqtisadi və mədəni şəraitdən olduqca razılıq edirlər.
“Trend” İnformasiya Agentliyi baş direktorunun müavini, siyasi ekspert Arzu Nağıyev “Bakı-Xəbər”ə açıqlamasında qeyd etdi ki, Nardaran hadisələrindən sonra Azərbaycan rəhbərliyinin gördüyü müvafiq işlər nəticəsində dini istiqamətdə qarşıdurmalar artıq yox dərəcəsindədir: “Bir sıra xarici xüsusi xidmət orqanlarının artıq ora nəzarəti kəsilib. Qəsəbədə aparılan işlər nəticəsində insanların radikal dəstələrə qoşulma məsələsi dayandırılıb. Həm sosial, həm iqtisadi, həm də dinlə bağlı istiqamətlərdə müvafiq tədbirlər həyata keçirilib. Bu, müsbət ənənə kimi qəbul olunur. Nardaran ağsaqqalları tərəfindən qəsəbədə görülən işlər təqdir olunur. Hüquq-mühafizə orqanları da öz işlərini yüksək səviyyədə qurdular. Vətəndaşlarda olan silahların toplanması onların gələcək təhlükəsizliyinə təminat yaratdı”.
A.Nağıyevin sözlərinə görə, Nardaran bu gün Bakı kəndlərinə uyğun olaraq öz ənənisini yaşayır.
Həmsöhbətimiz hesab edir ki, Nardaran qəsəbəsinin bugünkü vəziyyətində Azərbaycan rəhbərliyinin rolu müstəsnadır.
Günel CƏLİLOVA
