Azər Allahverənov: “Cəmiyyətdə sabitliyin olması əhalinin sosial rifahına səbəb olur”
“Səhiyyə sahəsində görülmüş işlər öz nəticəsini verir. Çünki bizim bütün göstəricilərimiz müsbətə doğru dəyişir, insanların ömrünün uzunluğu artır, həyat keyfiyyəti yaxşılaşır, ana və uşaq ölümü azalır. Bütün bunlar beynəlxalq səhiyyə təşkilatları tərəfindən də qiymətləndirilir”. Bunu Prezident İlham Əliyev noyabrın 28-də Azərbaycanın Sabirabad rayonuna səfəri çərçivəsində 205 çarpayılıq Rayon Mərkəzi Xəstəxanasının açılışında çıxışı zamanı deyib. Prezident qeyd edib ki, bu gün Azərbaycan səhiyyə infrastrukturu baxımından dünya miqyasında qabaqcıl yerlərdədir.
Əhalinin sosial rifahının yüksəlməsi naminə görülən işlər artıq öz bəhrəsini verir. Ölkə əhalisinin həyat keyfiyyətinin yaxşılaşması onların ömrünün uzanmasına səbəb olur.
Azərbaycan əhalisinin ömrünün uzanmasına təsir edən amillər barəsində danışan miqrasiya məsələləri üzrə ekspert Azər Allahverənov “Bakı-Xəbər”ə açıqlamasında bunları qeyd etdi: “Ölkə əhalisinin ömrünün uzanmasında başlıca səbəb dövlət siyasətidir. Xüsusilə səhiyyə sistemində həyata keçirilən islahatlar, müasir texnologiyaların tətbiq olunması əhalinin sağlamlığına öz təsirini göstərir. Dünyanın qabaqcıl səhiyyə texnologiyalarının tətbiq olunması bilavasitə insan səhhətinə təsir göstərən əsas amillərdən biridir”.
Həmsöhbətimizin sözlərinə görə, sosial şəraitin yaxşılaşdırılması da əhalinin ömrünün uzanmasına səbəb olur. Əhalinin müxtəlif təbəqələri üçün xüsusi imkanların yaradılması və digər amillər bu sahənin inkişafına şərait yaradır: “Ünvanlı sosial yardımların ayrılması, təqaüd və məvaciblərin artırılması əhalinin sosial inkişafına təsir göstərir”. A.Allahverənov onu da vurğuladı ki, insan sağlamlığına təsir göstərən amillərdən biri də ekologiyadır. Ekoloji mühitin normal səviyyədə olması əhalinin uzunömürlü olmasına zəmin yaradır. Dövlət tərəfindən Azərbaycanda da ətraf mühitin mühafizəsi istiqamətində lazımi işlər görülür.
Ekspert bildirdi ki, cəmiyyətdə sabitliyin olması əhalinin sosial rifahına səbəb olur: “Hansısa cəmiyyətdə nizamsızlıq, qeyri-sabitlik varsa, bu tip gərginliklər əhalinin sosial-psixoloji durumuna təsir göstərir”.
Həmsöhbətimiz, həmçinin, demoqrafiya sahəsində qəbul edilən dövlət proqramlarının əhalinin ömrünün uzanmasında müsbət amil olduğunu vurğuladı.
Müsahibimizin sözlərinə görə, qida təhlükəsizliyi ilə bağlı müvafiq qurumlar tərəfindən lazımi işlərin görülməsi də insanların sağlamlığına öz töhfəsini verir: “Nəzərə almaq lazımdır ki, qida təhlükəsizliyi ilə bağlı işlərin görülməsi genofondun mühafizəsi deməkdir. Əhalinin sağlam və uzunömürlü olması istiqamətində dövlət siyasətinin icrası bu sahəyə öz müsbət təsirini göstərir”.
Günel CƏLİLOVA
