Nailə İsmayılova: “Bu proqram sayəsində qadınlar qeyd olunan preparatlarla təmin olunacaq və beləliklə, hamiləlik risqi azalacaq və dünyaya gələn uşaqlar daha sağlam olacaqlar”
Azərbaycanda qadınların hamiləlik və doğuşdan sonrakı dövrdə dəmir, folium turşusu preparatları ilə ödənişsiz təmin olunması ilə bağlı dövlət proqramının qəbul olunması lazımdır. Bu barədə BMT-nin Əhali Fondunun Azərbaycandakı Nümayəndəliyinin baş müşaviri Fərid Babayev media nümayəndələrinə açıqlamasında deyib.
Onun sözlərinə görə, ana və uşaqların mühafizəsi xidmətinin bütün əməkdaşlarının qarşısında dayanan qlobal vəzifə ana və uşaq ölümlərinin azalması, yeni doğulanlar üçün tibbi xidmət keyfiyyətinin yüksəlməsi, yeniyetmə və gənclərin sağlamlığının qorunmasıdır.
BMT təmsilçisi qeyd edib ki, ölkədə vaxtından əvvəl doğuşların sayının təhlili bu göstəricinin artım tendensiyasını nümayiş etdirib: “2005-2014-cü illər arasında bu rəqəm 1,8 faizdən 2,7 faizədək, 2015-ci ildə 3,7 faiz artıb. Respublikada evdə doğuşların sayında azalma qeydə alınıb. Əgər 2008-ci ildə evdə doğuş 2,5 faiz idisə, 2015-ci ildə bu 0,9 faizədək düşüb. Evlərdə doğuş əsasən ucqar kənd yerlərində qeydə alınır, amma bu göstəricidə də azalma tendensiyası özünü göstərir”.
F.Babayevin fikrincə, Azərbaycanda ana ölümlərinin səbəblərini daha ətraflı öyrənmək üçün məlumat toplanmasını təkmilləşdirmək və mamaçalıqda kritik vəziyyətlərin təhlili məqsədilə Ümumdünya Səhiyyə Təşkilatının metodologiyasını tətbiq etmək lazımdır.
Azərbaycanda qadınların hamiləlik və doğuşdan sonrakı dövrdə dəmir, folium turşusu preparatları ilə ödənişsiz təmin olunması ilə bağlı fikir bildirən həkim-ginekoloq Nailə İsmayılova bizimlə söhbətində qeyd etdi ki, adıçəkilən preparatlar ana olmağa hazırlaşan xanımlar üçün olduqca vacibdir: “Orqanizm üçün vacib olan mikroelementlərdən biri də məhz dəmirdir. Dəmir çatışmazlığı körpələrin zəka səviyyəsində problemə səbəb olur. Dəmir çatışmazlığı zamanı böyümə, immun sistemi, dəridə dəyişikliklər baş verir, iştahsızlığa çox rast gəlinir. Körpələrin süd əmdiyi dövrdə dəmir çatışmazlığı zəka səviyyəsində problemə səbəb olur”.
Həmsöhbətimizin sözlərinə görə, fol turşusu insan orqanizmi üçün ən vacib olan vitaminlərdən biridir: “Bu vitamin mübadilə proseslərində, qan hüceyrələrinin yaranmasında iştirak edir, immun və mədə-bağırsaq sistemlərinin fəaliyyətində mühüm rol oynayır.
Fol turşusu xüsusən hamiləlik zamanı çox vacibdir. Məsələ burasındadır ki, bu vitamin dölün sinir borucuğunun inkişafında böyük rol oynayır. Bundan əlavə, fol turşusu ciftin formalaşması üçün çox vacibdir. Hamiləlik zamanı fol turşusunun çatışmazlığı ilk növbədə dölün sinir sisteminə mənfi təsir edir”.
N.İsmayılova bildirdi ki, qadınların hamiləlik və doğuşdan sonrakı dövrdə dəmir, folium turşusu preparatları ilə ödənişsiz təmin edilməsi ilə bağlı dövlət proqramının qəbul olunması vacibdir. Bu proqram sayəsində qadınlar qeyd olunan preparatlarla təmin olunacaqlar. Beləliklə, hamiləlik risqi azalacaq və dünyaya gələn uşaqlar daha sağlam olacaqlar. Təbii ki, bu hal ana və uşaq ölümünün azalmasına da öz təsirini göstərəcək.
Günel CƏLİLOVA
