“Türk bəylərin ailə qurmaq üçün azərbaycanlı qadınlara üstünlük verməsinin səbəblərindən biri xanımlarımızın ailəcanlı və həyat yoldaşlarına sadiq olmasıdır”
Türkiyə vətəndaşları ilə ailə quran azərbaycanlıların sayında artım var. Xüsusən də xanımlarımız türk bəylərə üstünlük verərək onlarla ailə həyatı qururlar. Statistikaya nəzər yetirsək görərik ki, qardaş ölkəyə gəlin köçən xanımlarımızın sayı ildən-ilə artır.
Açıqlanan statistik rəqəmlərə əsasən, 2016-cı ildə 2170 nəfər Türkiyə vətəndaşı azərbaycanlı xanımlarla ailə həyatı qurub. Bu barədə Türkiyə Statistika İnstitutu (TÜİK) məlumat yayıb. Məlumata əsəsən, Türkiyə vətəndaşları ilə evlənən azərbaycanlı qadınlar bu göstərici üzrə üçüncü sıradadırlar.
Azərbaycan vətəndaşları indiyədək 60-dan çox ölkədən olan əcnəbi ilə ailə həyatı qurublar. Əcnəbilərə ərə gedən azərbaycanlı xanımlar daha çox türklərlə beynəlmiləl izdivac bağlayıblar. Azərbaycanlı qızların xoşbəxt etdiyi əcnəbilərin sırasında sonrakı yerdə İran vətəndaşları gəlir. Həmçinin, azərbaycanlı xanımların ailə qurduğu şəxslər arasında Almaniya, İsrail, ABŞ, Böyük Britaniya, Pakistan, Əfqanıstan, İsveç, Birləşmiş Ərəb Əmirlikləri, Hindistan, Səudiyyə Ərəbistanının vətəndaşları da var.
Aparılan araşdırmalar göstərir ki, əcnəbilərə ərə gedən xanımların uğurlu izdivacı məhz türklərlə olur.
Ekspertlərin fikrincə, türk baylərlə ailə quran xanımların izdivacının uğurlu olmasının səbəbləri dinin, danışıq dilinin, həyat tərzinin, mədəniyyət və digər xüsusiyyətlərin ortaq olması ilə bağlıdır.
"Vəfa" Sosial İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, son zamanlar azərbaycanlı qızlarda əcnəbi gənclər, xüsusilə türkiyəlilərlə ailə qurmağa meyl yaranıb. Bunun müxtəlif səbəbləri var: “İlk olaraq bildirim ki, qızlarımız bir qədər firavan, rahat həyat axtarışındadırlar. Əminliklə deyə bilərik ki, hazırda qızlarımız rayona ərə getmək, kənd həyatını yaşamaq istəmirlər”.
F.Hacıbəylinin fikrincə, türk bəylərin ailə qurmaq üçün azərbaycanlılara üstünlük verməsinin bir sıra səbəbləri var. Onlardan biri xanımlarımızın ailəcanlı və həyat yoldaşlarına sadiq olmasıdır: “Bizim xanımlarımızın mətbəx və iş həyatında uğurlu olması, istər-istəməz, türk kişilərinin diqqətini cəlb edir. Bu gün Türkiyənin müxtəlif şəhərlərində çoxlu sayda azərbaycanlı xanım var ki, onlar orada öz işlərini, bizneslərini qurublar. İstər mədəniyyət, istərsə də turizm və ya biznes sahəsində Türkiyədə özünü təsdiqləyən yetərli sayda xanımlarımız var”.
Həmsöhbətimiz onu da vurğuladı ki, türkiyəliyə ərə gedən qızlarımız arasında boşanmış qadınlar üstünlük təşkil edir. Bunun səbəbi isə Azərbaycanda boşanmış qadınların yenidən ailə həyatı qurmasının birmənalı qarşılanmamasıdır: “Ümumiyyətlə, bəzi türksoylu xalqlarda boşanmış qadınların ailə qurmasına o qədər də pis baxılmır. Məsələn, Orta Asiya türk xalqlarında subay qızlardan daha çox boşanmış qadınlarla ailə qurmağa üstünlük verilir. Çünki boşanmış qadınlar ev işlərində daha səriştəli olurlar. Ancaq Azərbaycanda boşanmış qadınların ailə həyatı qurmasına psixoloji-mental maneələr var. Nə ailələr, nə də subay gənclər arasında buna yaxşı baxırlar. Buna görə də boşanmış qızlar müəyyən qədər çarəsizlikdən əcnəbilərlə ailə qurmağa üstünlük verirlər”.
Günel CƏLİLOVA
