Şəmsəddin Əliyev: “Hesab edirəm ki, vətəndaşların etibarından istifadə edib onların malını, mülkünü əldə edənlərə qarşı cəza sərtləşdirilməlidir”
Xəbər verildiyi kimi, Prezident İlham Əliyev istintaq və məhkəmə tərəfindən şəxsə vurulmuş ziyanın ödənilməsi ilə bağlı Milli Məclisə layihə təqdim edib. Azərbaycan Prezidenti tərəfindən Milli Məclisə “Polis haqqında”, “Məhkəmələr və hakimlər haqqında” və “Təhqiqat, ibtidai istintaq, prokurorluq və məhkəmə orqanlarının qanunsuz hərəkətləri nəticəsində fiziki şəxslərə vurulmuş ziyanın ödənilməsi haqqında” qanunlara dəyişikliklər layihəsi təqdim olunub.
Qeyd edək ki, layihələrin payız sessiyasının sonuna kimi müzakirəyə çıxarılması gözlənir.
Məsələ barədə fikir bildirən "Polisə Dəstək" İB-nin sədri Şəmsəddin Əliyev “Bakı-Xəbər”ə açıqlamasında qeyd etdi ki, istintaq və məhkəmə tərəfindən şəxsə vurulmuş ziyanın ödənilməsi barədə Milli Məclisə layihə təqdim olunması təqdir edilməlidir: “Bu gün vətəndaşlara dəyən maddi ziyan milyonlarla ölçülməlidir. Mənəvi ziyan və daxili iztirabları da nəzərə alsaq, vətəndaşa hansı səviyyədə ziyanın dəydiyini anlamaq olar. Bəzi şəxslər bu gün tanıdıqları insanın etibarından sui-istifadə edib, onu aldatma ilə məşğul olurlar. Hətta bu şəxslər mülkiyyət hüququnu belə qanunsuz əldə etmiş olurlar. Bu tip cinayətlərin ağırlığı ondan ibarətdir ki, vətəndaşın sahib olduğu əmlak onun əlindən çıxır. Həmin əmlak üzərində qanunsuz olaraq digər tərəf mülkiyyət hüququnu əldə edir.
Son zamanlar ölkədə mənzil satışı ilə məşğul olan maklerlərin vətəndaşları aldatmaqla əldə etdikləri vəsaitin həcmi milyonlarla manatdır. Bu yaxınlarda Məhdud Məsuliyyətli Cəmiyyətlərdən biri 1 mənzili 5-6 nəfərə satıb. Təxminən vətəndaşlara 1 milyondan çox maddi ziyan dəyib. Nə istintaq müddəti ərəfəsində, nə də məhkəmə baxışı zamanı vətəndaşa dəyən ziyanın ödənilməsi ilə bağlı bir hal belə qeyd olunmayıb. Nə istintaq müddətində zərərçəkənin pulu ödənilir, nə də ki, onlara mənzil verilir. Bu səbəbdən də Prezidentin istintaq və məhkəmə tərəfindən şəxsə vurulmuş ziyanın ödənilməsi ilə bağlı layihəni yenidən baxılması üçün Milli Məclisə göndərməsi bəyənilməlidir”.
Həmsöhbətimiz onu da bildirdi ki, dələduzluq törədən şəxsin həbs olunması vəziyyəti dəyişmir. Vətəndaşa dəyən zərər olduğu kimi qalır. İstintaq və məhkəmə baxışı zamanı pulun ödənilməsi ilə bağlı məlumat qeyd olunmur: “Dələduzluq yolu ilə pul əldə edənlər vəsaiti gizlədirlər. Bu vəziyyətdə yenə də vətəndaş ziyan görür.
Xüsusi olaraq qeyd edim ki, bu gün Azərbaycan cəmiyyətində il ərzində 26-27 min cinayət qeydə alınır. Bunun təxminən 3 minə yaxını dələduzluq yolu ilə baş verən cinayətlərdir. Onu da bildirim ki, bu tip cinayətlərin baş verməsinə cinayət qurbanlarının özləri şərait yaradırlar”.
Ş.Əliyevin sözlərinə görə, bu yaxınlarda ölkə başçısı İlham Əliyev cəzaların humanistləşdirilməsi ilə bağlı bir addım atıb: “Hesab edirəm ki, vətəndaşların etibarından istifadə edib onların malını, mülkünü əldə edənlərə qarşı cəza humanistləşdirilməməli, əksinə, sərtləşdirilməlidir”.
Günel CƏLİLOVA
