Eyyub Hüseynov: “Qadağan olunan antiradarlar qaçaqmalçılıq yolu ilə ölkəyə gətirilir” Ərşad Hüseynov: “Dünyanın əksər ölkəsində, o cümlədən Azərbaycanda da antiradar qadağan olunub”
Antiradar qurğuları avtomobilərə qoyulan cihazdır. Bu cihaz vasitəsilə radar həmin avtomobilin hansı sürətlə yol getdiyini müəyyən edə bilmir. Qeyd edək ki, Avropa və MDB ölkələrində antiradar qadağan olunub. Bu cihazlardan istifadə edən sürücüləri isə ağır cəza gözləyir. Antiradar qurğularından istifadə Azərbaycanda da qadağandır. Qadağalara baxmayaraq, bu qurğuları müəyyən yerlərdən əldə edib avtomobillərinə yerləşdirənlər var.
Keçirilən əməliyyat tədbirləri zamanı Azərbaycanda avtomobil yollarında təhlükəsizliyin daha etibarlı təmin olunması, həmçinin, sürət həddini ölçən xüsusi texniki vasitələrin işinə mane olan və istifadəsinə qanunla icazə verilməyən antiradarların satışını təşkil edən şəxslər müəyyən edilərək ifşa olunublar.
Baş Mütəşəkkil Cinayətkarlıqla Mübarizə İdarəsi əməkdaşlarının həyata keçirdikləri əməliyyat-axtarış tədbirləri nəticəsində bu tipli cihazların satışı ilə məşğul olan 3 nəfər - Zaur İbrahimov, Samir Doroşenko və Fuad Rüstəmli saxlanıblar. Adları çəkilən şəxslər antiradarların satışı ilə məşğul olduqlarını etiraf ediblər.
Avtomobil yollarında quraşdırılan radarlar sürücülərin sürət həddini aşmalarının qarşısını alan ölçü cihazlarıdır. Avtomobilə quraşdırılan antiradarlar isə sürücünün müəyyən olunmuş sürət həddini aşmasına şərait yaradır ki, bununla da həmin sürücü özünün və digər hərəkət iştirakçılarının həyatına real təhlükə yaratmış olur.
Qeyd edək ki, nəqliyyat vasitəsinin sürətini ölçməyə maneçilik törədən və ya ölçmə cihazlarının işinə süni əngəl yaradan cihazlardan istifadəyə görə sürücü məsuliyyət daşıyır. Bu cür avadanlıqlardan istifadə edən sürücülər İnzibati Xətəlar Məcəlləsinin 342.9-cu maddəsinin tələbi ilə həmin antiradar cihazları müsadirə olunmaqla 500 manatdan 800 manata qədər cərimə edilirlər.
Bu cihazların istifadəsi qadağan olunsa da, maraqlıdır, antiradarlar necə ölkəyə gətirilir?
Məsələ ilə bağlı fikir bildirən Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, qadağan olunan antiradarlar qaçaqmalçılıq yolu ilə ölkəyə gətirilir: “Bu barədə mən aidiyyəti qurumlara müraciət etmişəm. Lakin nəticə hələ də istənilən səviyyədə deyil. Antiradar cihazı quraşdıran sürücü və ya bunun satışı ilə məşğul olan qanunvericiliyin tələbinə uyğun olaraq cəzalandırılmalıdır”.
Nəqliyyat məsələləri üzrə ekspert Ərşad Hüseynov qəzetimizə açıqlamasında qeyd etdi ki, antiradar cihazının istifadəsi qadağandır. Bu cihaz radarın işinə mane olur: “Radiodalğalar mənbəyi vasitəsilə bu qurğu imkan vermir ki, radar işləyib sürəti öçsün. Bu səbəbdən də antiradarın fəaliyyəti qadağan olunub. Dünyanın, demək olar ki, əksər ölkəsində bu qurğu qadağan olunub”.
Günel CƏLİLOVA
