"Maarifçi Qadınlar" İctimai Birliyi 10 ilə yaxındır ki, işsizlik səbəbi ilə Türkiyənin İstanbul şəhərində məskunlaşmış Azərbaycan vətəndaşlarının məktəbyaşlı uşaqlarını təhsilə cəlb etmək məqsədi ilə çox önəmli bir layihəni həyata keçirməkdədir.
Təşkilat Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən "Türkiyənin İstanbul şəhərində yaşayan və müxtəlif səbəblərdən təhsildən kənarda qalan məktəbyaşlı uşaqların təhsilə cəlb edilməsi" adlı layihə çərçivəsində, 2026-cı ilin 14 may tarixində saat 11:00 və 16:00-da İstanbulun müxtəlif bölgələrində yaşayan azərbaycanlıların iştirakı ilə iki maarifləndirici seminar keçirib. Tədbirlərin keçirilməsində əsas məqsəd İstanbulun müxtəlif səhələrində yaşayan insanların məktəbyaşlı uşaqlarının məktəbə, təhsilə cəlb edilməsi kimi mühüm bir məsələdə onların köməyindən istifadə etmək olmuşdur.
Bəlli Ermənistan-Azərbaycan savaşı başladığı gündən etibarən hər tərəfdən xarici dövlətlərin əhatəsində olan və paytaxt Bakı şəhərinə yalnız hava yolu ilə gedə bilən Naxçıvan əhalisinin işsiz və maddi imkanı olmayan bir çox vətəndaşı Türkiyəyə sığındı. Ancaq qanuni yolla yaşamaq haqqına sahib ola bilməyən insanlar övladlarını Türkiyə Respublikasındakı məktəblərə yerləşdirə bilmədilər. Bu faciəvi durum 2017-ci ilə qədər davam etdi. Nəticədə, 21-ci əsrdə minlərlə insan savadsız qaldı və Vətənə hərbi xidmət borcunu ödəmək üçün gedən, lakin yazmaq-oxumaq bilməyən bir nəsil yetişdi.
"Maarifçi Qadınlar" İctimai Birliyinin sədri və qurucusu, 21-ci əsrin maarifçisi Şərqiyyə xanım Məmmədova bu uşaqların təhsildən kənar qalmalarının yolverilməz olduğunu bildirərək hərəkətə keçdi. O, İstanbul şəhərində fəaliyyət göstərən "Təhsil, Mədəniyyət və Sosial Həmrəylik" Sivil Toplum Təşkilatını, həmin təşkilatın nəzdində isə Hüseyn Cavidin adını daşıyan məktəbi qurdu. Valideynlərin müxtəlif ərazilərdə çalışması səbəbindən evdə bağlı qapılar arxasında, həyati təhlükə ilə üz-üzə tək qalan, yaxud da İstanbulun küçələrində müxtəlif zərərli vərdişlərə cəlb olunma təhlükəsi yaşayan 7 minə yaxın məktəbyaşlı azərbaycanlı balasını oxudaraq onların gələcəyinə işıq saldılar. Dərindən düşünən hər bir şəxs üçün bu yolun nə qədər ağır və məşəqqətli olduğunu izah etməyə ehtiyac yoxdur.
Seminarların hər birində 25-30 nəfər olmaqla, birlikdə 60-a yaxın insan iştirak etmişdir.
