Hazırda Azərbaycanın ümumtəhsil məktəblərinin birinci siniflərində 131 min 407 şagird təhsil alır. Bu barədə Məktəbəqədər və Ümumi Təhsil üzrə Dövlət Agentliyindən məlumat verilib. Əlavə edilib ki, hazırda ölkədə 107 min 524 uşaq bağça və məktəbəqədər hazırlıq qruplarına gedir.
Son illər Azərbaycanda doğuşun kəskin azalması ilə bağlı birinci sinfə gedən uşaqların sayında da ciddi azalma müşahidə edilir. Rəsmi qurumlar səkkiz il əvvəl, 2018-ci ildə bildirmişdi ki, həmin il orta məktəblərin birinci sinfinə 165 mindən çox uşaq yollanıb. İyunun 1-i Uşaqların Beynəlxalq Müdafiəsi Günüdür. Hazırda Azərbaycan cəmiyyətində ən çox müzakirə edilən mövzulardan biri də uşaqlara aylıq müavinətin verilməsidir. 2006-cı ildən Azərbaycanda ünvanli sosial yardim sisteminin tətbiqi ilə bağlı uşaqlara aylıq müavinətin verilməsi dayandırılıb. Bəzi ekspertlər hesab edir ki, uşaqlara aylıq müavinətin verilməsi maddi çətinlik içində olan ailələrdə uşaqlarla bağlı qayğıların yoluna qoyulmasına kömək ola bilər. Onlar inkişaf etmiş bir çox ölkədə uşaqlara aylıq müavinətlərin verildiyini bildirsələr də, rəsmi qurumlar hələlik bu yanaşmanı dəstəkləmir.
Qeyd edək ki, 2015-ci ildə Azərbaycanda 160 mindən yuxarı uşaq doğulduğu halda, 2025-ci ildə bu göstərici 100 minin altında olub. Dövlət Statistika Komitəsinin məlumatına görə, ötən il Azərbaycanda son 35 ilin ən aşağı doğum göstəricisi qeydə alınıb. 2025-ci ildə ölkədə təxminən 81 min uşaq doğulub ki, bu da Azərbaycanın 1991-ci ildə müstəqilliyini bərpa etməsindən bəri ən aşağı göstərici hesab olunur. 2015-ci ildə Azərbaycanın məktəblərində 1,5-1,6 milyon uşaq təhsil alırdısa, bu temp davam etsə, bir neçə ildən sonra bizim məktəblərimizdə oxuyanların sayı təxminən 1 milyon olacaq. Bu isə 50 minə yaxın müəllimin ixtisarı risklərini yaradır. Belə davam edərsə, hətta müəyyən sahələrdə işçi qüvvəsi çatışmazlığı yarana və xarici əmək resurslarına ehtiyac arta bilər.
Samirə SƏFƏROVA
