Vüsalə Ağabəyli: “...Yaxın gələcəkdə elmlər doktorluğu tamamilə ləğv oluna bilər”
Azərbaycan Milli Elmlər Akademiyası (AMEA) fəlsəfə doktoru hazırlığı üzrə doktoranturaya qəbul elan edib. Qeyd edilir ki, xarici dil üzrə qüvvədə olan beynəlxalq dil sertifikatına malik olan şəxslər xarici dil üzrə qəbul imtahanından azad olunurlar. Beynəlxalq dil sertifikatının imtahan nəticələrinin keçid balına ekvivalentliyini Dövlət İmtahan Mərkəzi müəyyənləşdirir.
Doktoranturada nə dəyişmələr var və nələr dəyişməlidir?
Filologiya elmləri doktoru, professor Vüsalə Ağabəyli baki-xeber.com-a bildirdi ki, hazırda Azərbaycanda doktoranturaya qəbul daha çoxmərhələli imtahan və müsabiqə sistemi əsasında həyata keçirilir:“Namizədlər əvvəlcə sənədlərini təqdim edir, sonra xarici dil, fəlsəfə və ixtisas üzrə imtahanlardan keçirlər. Son illərdə qəbul prosesinin elektronlaşdırılması, beynəlxalq dil sertifikatlarının qəbul olunması və elmi fəaliyyətə daha ciddi yanaşılması mühüm dəyişikliklərdir ki, ötən il də qəbul prosesi bu şəkildə həyata keçirilib. Sənədlərin elektron qəbulu prosesi müəyyən qədər asanlaşdırıb. Bununla yanaşı, beynəlxalq dil sertifikatlarının xarici dil imtahanına uyğunlaşdırılması da namizədi həmin imtahandan azad etdiyi üçün, bu mərhələ də prosesin yüngülləşməsinə xidmət edir”.
V.Ağabəylinin sözlərinə görə, son illərin müvafiq ixtisaslar üzrə müəyyən edilən qəbul planına nəzər saldıqda görmək olur ki, artıq elmlər doktorluğu üzrə plan yeri demək olar ki, yox səviyyəsindədir: “Bu da onu göstərir ki, yaxın gələcəkdə elmlər doktorluğu tamamilə ləğv oluna bilər. Lakin bu da, asan və dərhal qəbul ediləcək qərar deyil. Hər halda bu proseslə bağlı da geniş müzakirələr aparılır. Əgər elmlər doktorluğu ləğv olunacaqsa, o zaman hazırkı elmlər doktorlarının statusu və yeri müəyyənləşməlidir.
Bununla yanaşı, özüm də elmi rəhbər olaraq hesab edirəm ki, doktoranturada ən vacib məsələlərdən biri elmi rəhbərlə doktorant arasında daha effektiv əməkdaşlıq sisteminin qurulmasıdır. Doktorant yalnız formal hesabat verən yox, real elmi tədqiqat aparan gənc alim kimi yetişdirilməlidir.
Eyni zamanda, beynəlxalq elmi bazalara çıxış, xarici konfranslarda iştirak və elmi məqalələrin dəstəklənməsi üçün daha geniş imkanlar yaradılmalıdır. Doktorantların maddi təminatı və təqaüdləri də artırılmalıdır ki, onlar əlavə işlərə yox, əsasən elmi fəaliyyətə fokuslana bilsinlər.
Məncə, doktorantura yalnız diplom almaq mərhələsi yox, ölkənin elmi potensialını formalaşdıran ciddi bir inkişaf platforması olmalıdır”.
İradə SARIYEVA
