Məzahir Məmmədli: “Bu tip müəllimlər bəzən hazırlıq kurslarında peyda olurlar”
Elm və Təhsil Nazirliyinin keçirdiyi sertifikasiya prosesi ölkədə birmənalı qarşılanmasa da, sertifikasiyanı ümumi təhsil müəssisələrində çalışan müəllimlərin peşəkarlıq səviyyəsinin və bilik bacarıqlarının yoxlanılması baxımından əhəmiyyətli sayanlar da az deyil. Bütövlükdə təhsil ictimaiyyəti bu prosesə müsbət hal kimi yanaşır. Sertifiksiyadan uğurla keçən müəllimlərlə yanaşı burada müvəfəqqiyyət qazanmayan müəllimlər də kifayət qədərdir. Həmin müəllimlər sertifikasiyadan keçə bilmədikdə tədris prosesindən uzaqlaşdırılırlar. Əksəriyyət hesab edir ki, bu qəbildən olan müəllimlər işsiz qalırlar. Amma müşahidələr göstərir ki, sertifikasiyadan keçən müəllimlərin böyük bir qismi işsiz qalmırlar, onlar çox asanlıqla hazırlıq kurslarında işə cəlb edilirlər.
O müəllimlərin əksəriyyəti hazırlıq kurslarında dərs deyirlər. Elm və Təhsil Nazirliyinin sertifikasiyasından keçə bilməyən müəllimlərin özəl hazırlıq kurslarında dərs deməsi, eləcə də repititorluq fəaliyyəti ilə məşğul olması gizlin deyil. Onlara da heç bir şəkildə nəzarət olunmur. Müəllimin bilik və bacarığı yetərli deyilsə o özəl hazırlıq kurslarına necə cəlb olunurlar? Nazirliyin işdən çıxardığı müəllimlərə özəl kurslarda necə iş verirlər?
Ekspertlər hesab edir ki, sertifikasiyadan keçə bilməyən müəllimlər özəl hazırlıq kurslarına sərf edir, onları çox aşağı məvaciblə işə götürürlər. Ekspertlərin sözlərinə görə, sertifikasiyadan keçən müəllimləri özəl kurslara cəlb etmək çətin olduğu üçün onlar sertifikasiya prosesindən keçə bilməyən müəllimlərlə işləyirlər.
Təhsil eksperti Məzahir Məmmədli baki-xeber.com-a bildirdi ki, əslində belə müəllimlər özləri hazırlıq kurslarında işləməkdən çəkinməlidir. “Sertifikasiyadan keçə bilməyən müəllimlər üçün əlavə bir il də möhlət tanınır ki, onlar Təhsil İnstitutunun hazırladığı proqrama uyğun müəyyən təlimlərə qoşulsun və yenidən imtahan versinlər. Çox təəssüf ki, belə müəllimlər yenidən də imtahan verə bilməyib kəsilirlər, onlar isə artıq sistemdən kənarlaşdırılır. Ancaq bu o demək deyil ki, onların müəllimlik fəaliyyətinə məhdudiyyət qoyulur. Bunlar yenidən MİQ-ə (Müəllimlərin İşə Qəbulu) hazırlaşıb imtahan verib bu sistemə gələ bilərlər.
O ki, qaldı özəl hazırlıq kurslarında işləyənlərə, burada məsələ belədir. Kütləvi olmasa da nadir rast gəlinən hallardandır ki, bu tip müəllimlər bəzən hazırlıq kurslarında peyda olurlar.
Yəni ola bilsin, hazırlıq kursuna münasib olan, yaxud ciddi nəticələrə təsir etməyən məsələlər üzrə onlar kurslarda işə cəlb olunublar. Onlar müəyyən maaş qarşılığında fəaliyyət göstərsinlər”. M.Məmmədlinin sözlərinə görə, sertifikasiya ən sadə formada Azərbaycanda tərtib olunur.
“Yəni əgər bunlar onlara yaradılan imkandan istifadə edib iki cəhddə müvəffəq nəticə əldə edə bimirlərsə onda belə müəllim özü bu prosesdən uzaqlaşmalıdır. Özünə rəva bilməməlidir ki, gedib müəllim işləsin, kimlərinsə övladını gələcəyi üçün problem yaratsın. Geri çəkilməlidir. Müəllim olmaq istəyirsə yenidən hazırlaşıb imtahan verməlidir”-deyə M.Məmmədli qeyd etdi.
İradə SARIYEVA
