“Azərbaycanda vətəndaşların mənzillə təminatının əlçatan olması bir örnəkdir”
Bakıda Ümumdünya Şəhərsalma Forumunun 13-cü sessiyası (WUF13) davam edir. Paytaxtımızın ev sahibliyi ilə baş tutan13-cü Ümumdünya Şəhərsalma Forumunun (WUF13) builki mövzusu “Hamı üçün mənzil: təhlükəsiz və dayanıqlı şəhərlər və icmalar”dır. Yəni konfrans "Hamı üçün mənzil: təhlükəsiz və dayanıqlı şəhərlər və icmalar" mövzusuna həsr olunub. Bu konfransın mövzusu hər kəs üçün mənzil əlçatanlığının, bunun dayanıqlı və təhlükəsiz inkişaf üçün nə qədər vacib olduğunu qlobal aləm fikrə qəbul etdirməkdir. 13-cü Şəhərsalma formunun indiyə qədərkilərdən əsas fərqi də məhz mənzil əlçatanlığını təmin etmək yollarını ən səmərəli şəkildə tətbiq etməkdir. Qısa desək, bu konfransın dünyaya əsas mesajlarından biri bu olacaq- hər kəsin mənzil sahibi olması təhkükəsiz və rifahlı şəhər həyatının vacib şərtidir.
Belədə, WUF13 Azərbaycanda mənzil probleminin uğurlu həlli yönümündə indiyədək əldə edilmiş hansı təcrübələri dünya ilə bölüşməyə imkan verəcək? Bu WUF ölkəmizdə mənzil əlçatanlığını daha da möhkəmləndirmək işinə nə töhfə verəcək?
Qeyd edək ki, Azərbaycanda mənzil əlçatanlığının təminatı sahəsində əsaslı işlər görülür. Sosial evlərin aztəminatlı ailər üçün də əlçatan olduğu məlumdur. MİDA-nın (Mənzil İnşaatı Dövlət Agentli) xətti ilə bu layihədən yüzlərlə ailə yararlanır. Azərbaycanın sosial ev təcrübəsindən dünyanın başqa ölkələrinin də yararlanacağı şübhə doğurmur. Yəni dövlətin dəstəyi ilə həyata keçirilən bu layihə çərçivəsində insanlar asanlıqla mənzil sahibi ola bilirlər.
Ekspert Elnur Fərzəliyev baki-xeber.com-a bildirdi ki, Bakıda keçirilən WUF13 çərçivəsində bu mühüm məsələnin müzakirə edilməsi təsadüfi deyil. E.Fərzəliyev qeyd etdi ki, bu mühüm mesajın Bakıdan dünyaya verilməsi də ayrıca əhəmiyyətlidir. Vətəndaşlar üçün yaşayış mənzillərinin əlçatanlığının ölkəmizdə təmin olunduğunu deyən ekspertin sözlərinə görə, bu istamətdə həyata keçirilən siyasət vətəndaşlarımızın rifahına xidmət edir. “Ölkəmizdə vətəndaşların mənzil probleminin həlli üçün bir çox dövlət layihələri var ki, həmin dövlət layihələrində aztəminatlı evsiz ailələrin mənzil təminatını qarşılamış olur. Xüsusən Mənzil İnşaat Dövlət Agentliyinin satışa çıxardığı mənzillərin bazar dəyərinə nəzər salsaq həmin mənzillərin bazar dəyəri həmin ərazi üzrə onun digər daşınmaz əmlakların satış qiymətindən dəfələrlə aşağı qiymətə təklif olunur. Başqa bir tərəfdən, isə onun illik faiz dərəcəsi, ilkin ödənişin minimum olması vətəndaşların kirayələrdən qurtularaq mənzil sahibi olmağa gətirib çıxarır. Digər tərəfdən isə indiyə qədər dövlət tərəfindən şəhid ailələrinə minlərlə mənzillər verilib, müharibə əlilləri, müharibə veteranları mənzillə təmin olunublar. Özü də bu mənzillər o şəxslərə tamamilə təmənnasız verililir. Hərbiçilər, ordumuzun zabitləri də pulsuz olaraq mənzillərlə təmin olunur. Məcburi köçkünlər üçün dövlət tərəfindən onminlərlə mənzil inşa olunub. 2021-ci ildə məcburi köçkünlərə verilməsi nəzərdə tutulan 5000 min mənzilin 2500-ü dövlət tərəfindən şəhid ailələrinə verildi, gerdə qalanlar isə ən sərfəli şərtlərlə, ən minumal qiymətlərlə aztəminatlı ailələr üçün satışa çıxarıldı. Yaxın gələcəkdə də bu tip layihələrin artacağı gözlənilir ki, vətəndaşların mənzil problemi aradan qalxdıqca vətəndaş kirayə və digər xidmətlərə xərclədikləri pulları başqa sahələrə xərcləməklə ölkə iqtisadiyyatını daha da güclü edirlər”.
Ekspert hesab edir ki, azad ərazilərdə də vətəndaşların mənzil məsələsi həll olunur, keçmiş məcburi köçkünlər mərhələli şəkildə mənzillə təmin olunub. “Hesab edirəm ki, Azərbaycanda vətəndaşların mənzillə təminatının əlçatan olması bir örnəkdir. Azad ərazilərə işləməyə gedənlər də, Xankəndidə yerləşən Qarabağ Universitetinin müəllimləri də evlə təmin olunur. Gələcəkdə digər iri şəhərlərdə, o cümlədən də Bakıda bu cür sosial layihələrin sayı artarsa vətəndaşların mənzil probleminin tam həllinə nail olarıq”-deyə E.Fərzəliyev bildirdi.
İradə SARIYEVA
