Ümumdünya Şəhərsalma Forumu (WUF13) çərçivəsində “Şəhər iqlim fəaliyyəti və davamlı urbanizasiya üzrə Bakı Davamlılıq Koalisiyası”nın yüksəksəviyyəli iclası keçirilib. Tədbir COP29 zamanı yaradılmış Bakı Davamlılıq Koalisiyasının (BCC) fəaliyyətinin genişləndirilməsinə və şəhər iqlim idarəçiliyində davamlılığın təmin olunmasına həsr edilib.
Tədbirin açılışında WUF13-ün milli koordinatoru, Dövlət Şəhərsalma və Arxitektura Komitəsinin sədri Anar Quliyev və xarici işlər nazirinin müavini Yalçın Rəfiyev çıxış ediblər.
Bildirilib ki, koalisiyanın əsas məqsədi şəhər iqlim siyasətində mövcud boşluqları aradan qaldırmaq, müxtəlif maraqlı tərəflər arasında davamlı əməkdaşlığı təmin etmək və beynəlxalq forumlararası dövrlərdə ardıcıllığı qorumaqdır. Tədbirdə vurğulanıb ki, bu istiqamətdə beynəlxalq əməkdaşlığın genişləndirilməsi və koordinasiyanın gücləndirilməsi xüsusi əhəmiyyət daşıyır.
İclasda Azərbaycan, Türkiyə, Misir və Braziliya da daxil olmaqla bir sıra ölkələrin nümayəndələri ilə yanaşı, BMT-nin Məskunlaşma Proqramının (UN-Habitat) icraçı direktoru Anaklaudia Rossbax da iştirak edib. Bundan əlavə, Keniya, İspaniya, Kanada, Çin, İtaliya, Kolumbiya, Ekvador, Malayziya, Polşa və Efiopiya kimi ölkələrin də prosesə qoşulduğu qeyd olunub.
Panel müzakirələrdə Birləşmiş Ərəb Əmirlikləri Energetika və İnfrastruktur Nazirliyinin infrastruktur və nəqliyyat işləri üzrə nazir müavini Məhəmməd İbrahim Əl-Mənsuri, Braziliya Şəhərlər Nazirinin beynəlxalq məsələlər üzrə müşaviri Antonio da Kosta e Silva, Keniyanın torpaq, ictimai işlər, mənzil və şəhər inkişafı naziri Alis Vahome, Malayziya hökumətinin dayanıqlı urbanizasiya üzrə müşaviri, Kuala Lumpurun sabiq meri Maimuna Mohd Şərif, Türkiyənin ətraf mühit, şəhərsalma və iqlim dəyişikliyi nazirinin müavini Həsən Suver, Çin Xalq Respublikası Mənzil, Şəhər və Kənd İnkişafı Nazirliyinin baş iqtisadçısı Vanq Şenquin, Davamlılıq Naminə Yerli Hökumətlər Birliyinin (ICLEI) Cənubi Amerika üzrə regional direktoru Rodriqo Perpetuo çıxış ediblər.
Müzakirələr zamanı mənzil məsələlərinin şəhər iqlim siyasətində mərkəzi rol oynadığı vurğulanaraq, davamlı, inklüziv və əlçatan şəhər mühitinin formalaşdırılması üçün uyğun idarəetmə, siyasət və maliyyə mexanizmlərinin vacibliyi qeyd edilib. İştirakçılar müxtəlif ölkələrin təcrübəsini bölüşərək uzunmüddətli və effektiv həll yollarının işlənib hazırlanmasının əhəmiyyətini vurğulayıblar.
