Rəqs müəllimi Aytən Məmmədovanın tələbəsi, Bakının 257 saylı orta məktəbin 5-ci sinif şagirdi Nazlı Nadirova, Respublika miqyaslı yarışda, 50 nəfərlik öz yarımqrupunda İspan rəqsinin mahir ifaçısı kimi 2-ci yeri tutub
Azərbaycan yeraltı və yerüstü sərvətləri ilə yanaşı, bütün sahələr üzrə dünyaca məşhur istedadlı şəxsləri ilə də tanınır. Bunlar hamıya məlum olduğu üçün xüsusi olaraq adlar çəkmək istəmirəm. Gənclər arasında da məşhurların davamçısı kimi parlayan belə istedadlı gənclərimiz yetərincədir və beynəlxalq aləmdə Azərbaycanı layiqincə təmsil edirlər. “Bakı-Xəbər” olaraq biz də belə istedadlı, yaradıcı gənclərə qəzetimizdə və saytımızda həmişə meydan veririk ki, qoy daha da həvəslənsinlər, öz üzərlərində daha məsuliyyətlə işləsinlər.
Belə istedadlı gənclərdən biri də gənc rəqs müəllimi Aytən Məmmədovadır. A. Məmmədovanın gənc olmasına baxmayaraq, artıq özünün tələbələri var.Elə bu yazıda məhz belə istedadlı yeniyetmələrin birindən və onun rəqs müəllimi tələbə Aytən Məmmədovadan söhbət açmaq istəyirəm…
Aytən gənc olsa da, Respublika miqyaslı keçirilən bir çox tədbirlərdə, həm milli, həm də Avropa rəqslərini çox böyük məharətlə ifa edir. Aytəni bu sahədə artıq peşəkar saymaq olar. Məhz bunun nəticəsidir ki, gənc istedad A.Məmmədova artıq özü rəqs üzrə tələbələr hazırlayır. Aytənin belə tələbələrindən biri, Nazlı Nadirova artıq ilk uğura imza atıb. Belə ki, ötən həftə, daha doğrusu aprelin 19-da, Fövqəladə Hallar Nazirliyinin (FHN) İdman Arenasında keçirilən”Aprilin “Qızıl rəqs” yarışması”nda Nazlı Nadirova, öz qrupunda oynadığı İspan rəqsi ilə 2-ci yeri tutub. Respublika miqyaslı yarışda 250 nəfər iştirakçı 5 yarımqrupda mübarizə aparıb. Gənc A.Məmmədovanın hazırlaşdırdığı, Bakının 257 saylı orta məktəbinin 5-ci sinif şagirdi Nazlı Nadirova, mübarizə apardığı 50 nəfərlik yarımqrupda 2-ci yeri tutub ki, bu da həm balaca Nazlı, həm də onun rəqs müəllimi gənc Aytənin böyük uğurudur.
Bizimlə söhbətində A.Məmmədova bildirdi ki, belə uğurları üçün ilk olaraq müəllimlərinə borcludur: “ Məhz peşəkar müəllimlərin sayəsində püxtələşərək, özüm də orta məktəb şagirdlərindən ibarət rəqs qrupu yaratmışam. Burada çox istedadlı şagirdlər toplaşıb. Onlardan biri, 257 saylı məktəbin 5-ci sinif şagirdi Nazlı Nadirova başımızı uca elədi. Respublika üzrə keçirilən rəqs yarışmasında İspan rəqsini yüksək məharətlə ifa etdiyinə görə, 50 nəfərdən ibarət yarımqrupda 2- ci yeri tutub. Mən bu uğur münasibəti ilə Nazlını və valideynlərini ürəkdən təbrik edirəm. İnanıram ki, mənim qrupumda olan digər uşaqların da hər biri istənilən yarışda özlərini təsdiq edə biləcəklər”.
Bu, bir daha göstərir ki, Azərbaycan həmişə olduğu kimi bu gün də istedadlı gəncləri yetərincədir. İnanıram ki, Aytən Məmmədovanın özü və hazırlaşdırdığı yeniyetmə rəqqaslar, hələ bundan sonra da həm Respublika miqyaslı, həm də beynəlxalq yarışlarda bir çox uğurlara imza ataraq, ölkəmizin adına hörmət və nüfuz gətirəcəklər. Aytənin üzünə isə bu yolda hər zaman uğurlar diləyirik!
Elçin MƏMMƏDLİ
