Elnur Fərzəliyev: “Hər hansısa bir alternativ olmadan vətəndaşların mənzillərindəki mövcud kombiləri və qızdırıcıları ləğv etmək olmaz”
Azərbaycan Nazirlər Kabineti mənzillərdə kombi istilik sistemlərinin quraşdırılması ilə bağlı yeni qaydaları təsdiqləyib. Azərbaycan Nazirlər Kabineti çoxmənzilli yaşayış binalarının layihələndirilməsi zamanı hər bir mənzildə fərdi istilik sistemlərinin quraşdırılmasına icazə verilən halları təsdiqləyib.
Müvafiq sərəncamı Baş nazir Əli Əsədov imzalayıb.
Qərara əsasən, mənzillərdə fərdi istilik sistemlərinin quraşdırılmasına aşağıdakı hallarda icazə veriləcək:
- çoxmənzilli yaşayış binası alçaq mərtəbəlidirsə (5 mərtəbəyə qədər);
- binanın tikilməsi planlaşdırılan ərazidə qaz təchizatı yoxdursa;
- mənzillərin bərpa olunan enerji mənbələri ilə qızdırılması planlaşdırılırsa.
Yeni qaydalar mənzil tikintisinə təsir edəcəkmi?
Qiymətlər necə olacaq? Yeni qaydanın nə kimi fəsadları olacaq?
Tikinti eskperti Elnur Fərzəliyev məsələ ilə bağlı baki-xeber.com-a bildirdi ki, ölkə üzrə ümumən 2 milyon 700 mindən çox mənzil mövcuddur, bu həm çoxmənzilli yaşayış binaları, həm də fərdi yaşayış evləridir. “Bunların daha çox hissəsi isə paytaxt Bakının, Abşeron, Xırdalan, Sumqayıt və digər böyük şəhərlərin üzərinə düşür. Çoxmənzilli yaşayış binalarının və fərdi yaşayış evlərininin əksəriyyətində mərkəzi istilik sistemi olmadığına görə vətəndaşlar məcburən öz mənzillərini kombi və digər müxtəlif qızdırıcılar istifadə etməklə qızdırırlar, eyni zamanda da isti su əldə edirlər. Köhnə çoxmənzilli yaşayış binalarının bir hissəsində mərkəzi istixana, yəni qazanxana olsa da, lakin bu çox az sayda binaları əhatə edir. Kombilərin ləğvi ilə bağlı yalnız və yalnız alternativ qazananlar, istixanalar inşa olunarsa, həmin yaşayış fondu binalar, fərdi yaşayış evləri istixanın təchiz etdiyi isti su ilə mənzillərini qızdıra bilərlərsə bu halda kombilərin ləğvinə start verilər. Hər hansısa bir alternativ olmadan vətəndaşların mənzillərindəki mövcud kombiləri və qızdırıcıları ləğv etmək olmaz”.
Kombilərin zərərinə gəlincə, E.Fərzəliyev vurğuladı ki, ölkə üzrə minlərlə çoxmənzilli binaları, yüzminlərlə fərdi yaşayış evləri var, demək olar ki, onların hər biri kombi cihazlarından istifadə etməklə evlərini həm qızdırırlar, həm də isti su əldə edirlər. “Bu avadanlıqlar işlək vəziyyətdə olanda gündəlik ölkə üzrə milyonlarla kombidən çıxan zəhərli qaz havaya daxil olur və bu ekologiyanı məhv etməklə bərabər həmçinin insan sağlamlığına da böyük zərər vurur. Təbii ki, bu addım atılarsa kombilərin ləğvi həm ekoloji baxımdan, həm də başqa tərəflərdən təqdirəlayiqdir. Digər tərəfdən, mənzillərində fərdi şəkildə kombi avadanlığı quraşdıran vətəndaşlar hər ay qaz və suya görə mənzilin ümumi sahəsinə uyğun əlavə olaraq xeyli vəsait ödəyir. Təbii ki, bu sistem mərkəzləşərsə və mərkəzi istixanalar hesabına vətəndaşlar ödədikləri vəsaitdən azad oluna bilərlər”.
Ekspert qeyd etdi ki, mənzillər mərkəzi istixanaya qoşulmaqla simvolik olaraq komunal ödəniş ödəməyərlər və bununla da əlavə xərcdən azad ola bilərlər.
İradə SARIYEVA
