İlqar Hüseynli: “Çox yaxşı olar ki, TƏBİB rəhbərliyi və əlaqədar qurumlar bu yayılan şaiyələrə aydınlıq gətirsin”
Tibbi Ərazi Bölmələrini İdarəetmə Birliyinin (TƏBİB) yeni icraçı direktoru Anar Bayramovun müvafiq Əmri ilə müşavirləri - Elnur Qurbanov, Emil Qasımov, Zeynal Bayramlı Pərvin Əkbərov və Vüqar Yaqublu, Sabunçu Tibb Mərkəzinin direktoru Nurəngiz Bəşirova, Klinik Tibbi Mərkəzin direktoru Könül Ələkbərov, “Yeni Klinika”nın direktoru Barat Yusubov tutduqları vəzifədən azad olunublar. TƏBİB-in yeni icraçı direktorunun səhiyyə sistemində islahatlar başlatdığı deyilir. Mətbuatda yayılan şaiyələrə görə, TƏBİB rəhbəri Bakıdakı bütün poliklikaların rəhbərlərini də işdən çıxaracaq. Bu da poliklinikalarda çalışanlar arasında son dərəcə narahatlıq yaradıb.
Bu poliklinikalarda yüzlərlə insan çalışır və onlar əhaliyə tibbi xidmət göstərirlər. Belə məlumatları yayıb bu qədər insanı, tibbi personalı təşvişə salmaq nəyə xidmət edir? TƏBİB çıxardığını onsuz da qərar verib vəzifədən çıxaracaq. Belə bir hal gerçəkləşdirmədən nə üçün belə şaiyələr yayıb insanları narahat edirlər ki, poliklinikaların hamısının rəhbərləri işdən çıxarılacaq? Əslində, bu cür şaiyələr TƏBİB-in yeni rəhbərinin özünün iş üslubuna ziyan vuran məsələlərdir. Bəlkə TƏBİB-in yeni rəhbəri poliklinika rəhbərlərinin bir çoxu ilə işləyəcək, çox az hissəsi işdən azad olunacaq, bəlkə heç biri vəzifədən çıxarılmayacaq. Şübhəsiz ki, poliklinika rəhbərləri arasında öz işini yaxşı bilən, vəzifəsinin öhtəsindən yaxşı gələn, xəstələrə lazımı xidmət göstərən şəxslər çoxdur. “Bunların hamısı vurulacaq” təşvişini yaymaq insanlara narahatlıq verir. Təbii ki, TƏBİB-in yeni rəhbəri barədə də yaxşı rəy yaratmır. “Kütləvi ixtisarlar aparılacaq”,”bütün poliklinika rəhbərləri vəzifədən azad ediləcək” kimi şaiyələrə TƏBİB rəhbərliyi özü də aydınlıq gətirməli və açıqlama verməlidir. Çünki əks halda bu mənfi rəy yaradır və qurum ətrafında xoşagəlməz fikirlərə səbəb olur.
Sosial-iqtisadi sahə üzrə ekspert İlqar Hüseynli baki-xeber.com-a bildirdi ki, yalnız Azərbaycanda deyil, dünyanın hər yerində belə bir praktika var-istənilən qurumun başına gətirilən şəxs öz komandasını formalaşdırmağa çalışır. “Bu bir tendensiyadır. TƏBİB-in yeni rəhbəri gələn kimi müşavir vəzifəsində olan 6 nəfər şəxsi işdən azad etdi. Mətbuatda belə bir informasiya yayıldı ki, TƏBİB-in büdcəsinə daxil olan 1 milyon manat yalnız TƏBİB müşavirlərinin saxlanılmasına xərclənirmiş. Yəni bu mənada ya müşavirlik institunun ləğv edilməsi, ya da onların sayının minimuma endirilməsi, ya bir, ya iki nəfər müşaviri orta aylıq əməkhaqqı ilə saxlanılması lazımdır. Bu da görün, TƏBİB-in büdcəsində nə qədər vəsaitə qənaət edilməsinə səbəb olacaq. Əslinə baxanda, çox radikal, kardinal və yerində olan dəyişiklikdir. Bir neçə polikliniklanın, klinikanın baş həkimlərini işdən azad edib. Hətta indi işdən azad olunan baş həkimlər barəsində Milli Məcslinin plenar iclasında deputat Müşfiq Məmmədov tənqidi fikir səsləndirmişdi. Yəni onlar haqda Milli Məclisdə də məsələ qaldırılmışdı ki, onlar zamanında korrupsiyada ittiham olunan şəxslər olub və yenidən rəhbər vəzifəyə təyin olunublar. İşində korrupsiyaya yol verən baş həkimlərin vəzifədən azad edilməsi normaldır. Mən demirəm ki, bu işdən çıxarılmalar islahata xidmət edir. Xeyr, bu islahat deyil. Bu sadə olaraq komandanın formalaşdırılması prosesidir”.
İ.Hüseynli qeyd etdi ki, Bakıda fəaliyyət göstərən poliklinikalarının hamısının baş həkimlərinin işdən azad olunması məsələsi gerçək görünmür. “İnanmıram ki, bütün poliklinikaların baş həkimləri vəzifədən azad olunsun. Çünki bu TƏBİB-in özünün idarəetmə sistemini iflic vəziyyətə sala bilər. Bir neçə poliklinikanın baş həkiminin dəyişdirilməsini normal qəbul etmək olar. Amma “bütün poliklinikaların baş həkimlərinin azad olunacağı”nı şaiyə kimi qəbul edirəm. Bu xəbər panika yaratmağa xidmət edir. Görürlər ki, mətbuatda adları hallandırılan bəzi şəxslər vəzifədən azad olunub ona görə də ictimaiyyətdə və tibb kollektiblərinin özündə də belə bir panika yaranıb. Düşünürəm ki, bu bütün poliklinikaların rəhbərlərinin işdən çıxarılmasına səbəb olmayacaq. TƏBİB-in özündə kifayət qədər personallar var. Yaxud elə şöbələr var ki, onların rəhbərləri kifayət qədər peşəkar şəxslərdir, onlar vəzifələrində də saxlanılacaq. Amma bütün poliklinikaların baş həkimlərinin işdən çıxarılması baş verməyəcək.
Çox yaxşı olar ki, TƏBİB rəhbərliyi və əlaqədar qurumlar bu yayılan şaiyələrə aydınlıq gətirsin”-deyə İ.Hüseynli qeyd etdi.
Ekspert vurğuladı ki, TƏBİB rəhbərliyi və əlaqədar qurumlar bu məsələyə aydınlıq gətirərsə, bütün söz-söhbətlərə, şaiyələrə son qoyulmuş olar.
İradə SARIYEVA
