Şəmsəddin Əliyev: “Deməzdim müharibə İrandan narkotik vasitələrin qanunsuz ötürülməsinə müsbət mənada təsir edib”
Məlum olduğu kimi, fevralın 28-dən ABŞ-İsrail cütlüyü İrana qarşı müharibə aparır. Həmin vaxtdan sözügedən ölkələr İrana intensiv hava zərbələri endirirlər.
O da məlumdur ki, Azərbaycana qanunsuz olaraq narkotik vasitələrin ötürülməsi, buna cəhdlər əsasən İrandan həyata keçirilir. Dəfələrlə Azərbaycan sərhədində bunun qarşısı alınıb. Hətta bəzi hallarda bu, müəyyən toqquşmaların baş verməsinə səbəb olur. Görülən qabaqlayıcı tədbirlərə baxmayaraq, İrandan bu yöndə qanunsuz cəhdlər azalmır.
Maraqlıdır, məlum müharibə İrandan qanunsuz narkotik vasitələrin ötürülməsinə necə təsir edib? Bu sahədə azalma və yaxud da artma varmı? Nə kimi yeni tendensiyalar hiss olunur?
Sözügedən məsələni baki-xeber.com-a şərh edən hüquqşünas Şəmsəddin Əliyevin fikrincə, narkotik vasitələrin qanunsuz dövriyyəsi transmilli, mütəşəkkil cinayətkarlığın xüsusilə təhlükəli növlərindən biridir: “Bütün dünyada ümumilikdə narkotik vasitələrin qanunsuz dövriyyəsi ilə bağlı, transmilli cinayətkarlığın bu növü ilə bağlı mübarizə səngimir. Nəzərə almaq lazımdır ki, narkoticarətin arxasında dayanan mütəşəkkil qüvvələr var və onların qarşısını almaq çox çətindir. Azərbaycanda son 10 ilə yaxın müddət ərzində bu sahədə aşkar edilən cinayətlərin sayı artımla müşayiət olunur. Bu da o deməkdir ki, ölkəmizdə narkotik vasitələrin yayılmasına qarşı mübarizə səngimir. Deməzdim ki, müharibə İrandan narkotik vasitələrin qanunsuz ötürülməsinə müsbət mənada təsir edib. Yəni buna cəhdlər azalıb. Xeyir. İranda müəyyən şəbəkə əksinə, bu vəziyyətdən sui-istifadə etməyə cəhd edirlər. Çox təəssüf ki, belə qruplar aşkar olunarkən silahlı toqquşmalar baş verir. Hətta narkoşəbəkə İrandakı qarışıq vəziyyətdən “faydalanmağa” çalışır. Çünki məlum olduğu kimi, bombardımanlar nəticəsində İrana rəhbərlik edənlərin çoxu öldürülüb. Əsas diqqət ABŞ-la müharibəyə yönəlib. Ona görə də həmin şəbəkə bundan öz məqsədləri üçün istifadə etməyə çalışır. Lakin Azərbaycan tərəfi sərhəddə mühafizəni daha da gücləndirib. Həm Dövlət Sərhəd Xidməti, həm Daxili İşlər Nazirliyinin narkotiklərin qanunsuz dövriyyəsi ilə mübarizə sahəsində çalısan baş idarəsi ciddi fəaliyyət göstərir. Narkotaçirlərə göz açdırmırlar. Bütün bunların nəticəsi olur. Ancaq cəmiyyətin sezə bilmədiyi hal da var burda. Bu da ondan ibarətdir ki, Azərbaycan vətəndaşları narkotik vasitələrin qanunsuz dövriyyəsi ilə yaxalanarkən “harda əldə etmisiz?” sualına demək olar eyni cavab verirlər. Tanımadıqları İran vətəndaşından aldıqlarını deyirlər. Belə İran vətəndaşlarına qarşı mübarizə aparmaq zaman, vaxt baxımından çətindir. Bu şəxslərlə bağlı İrana göndərilən sorğulara ümumiyyətlə cavab verilmir. Məsələn, göndərilən 50 sorğudan 4-5-nə cavab verilir. Ona görə də bu sahədə aşkar edilən cinayətlərin açılma faizi təxminən 96-97 faizdir”.
Vidadi ORDAHALLI
