Rəsul Cahangirli: “Bu, o demək deyil ki, dövlət qulluğunda çalışanlar diqqətdən kənarda qalacaqlar”
Dövlət qulluğunda əməkhaqqı sisteminin təkmilləşdirilməsi istiqamətində həyata keçirilən son islahatlar çərçivəsində mükafatlandırma mexanizminin ləğv edilməsi nəzərdə tutulur. Bu məsələ Milli Məclisin qəbul etdiyi "Dövlət qulluğu haqqında" Qanunda əksini tapıb.
Yeni yanaşmaya əsasən, dövlət büdcəsi hesabına ödənilən mükafatlar tamamilə ləğv olunur. Bu dəyişiklik həm kollektiv, həm də fərdi mükafatları əhatə edir. Belə ki, indiyədək dövlət qulluqçularının fəaliyyətinə görə verilən əlavə təşviq ödənişləri artıq mövcud olmayacaq və əməkhaqqı sistemi daha vahid və şəffaf struktur üzərində formalaşdırılacaq.
Yeni model dövlət qulluğunda əvvəllər müxtəlif əlavələr formasında ödənilən hissələrin vəzifə maaşının tərkibinə daxil edilməsi ilə əməkhaqqının vahid strukturunun müəyyən edilməsinə, daha aydın, sabit, ədalətli olmasına imkan yaradır. Əməkhaqqının vahid strukturu bir sıra hallarda özünü göstərən maaş disproporsiyalarının aradan qalxmasını, bərabər imkanların təmin edilməsini şərtləndirmiş olacaq. Yəni daha mütəşəkkil və mükəmməl əmək haqqı sisteminin formalaşdırılması baxımından müsbət addımdır. Mükafatların ləğvi məmurun ilboyu gəlirinin azalması anlamına gəlmir.
Sözügedən məsələni baki-xeber.com-a şərh edən ekspert Rəsul Cahangirli bu sahədə edilən dəyişikliklərə müsbət yanaşdı: “Bu, o demək deyil ki, dövlət qulluğunda çalışanlar diqqətdən kənarda qalacaqlar. Qətiyyən belə düşünmürəm. Bununla bağlı islahatların aparılması vacib idi. Çünki güman edirəm ki, burada bəzi sui-istifadə halları var. Heç də bütün dövlət qulluqçularının hamısı mükafatlandırılmırdı. Hesablama Palatasının hesabatları, Maliyyə Nazirliyinin yoxlamaları göstərir ki, bəzi qurumlar büdcə vəsaitlərini düzgün istifadə etmirdilər. Ona görə də bu sahədə təkmilləşdirmə aparmaq zərurəti yaranır. Əvvəlki sistemdə dövlət qulluqçusunun əməkhaqqı mürəkkəb və qeyri-şəffaf idi. Yeni modeldə isə hər şey sadələşib: aylıq əməkhaqqı indi əsasən vəzifə maaşı (baza), ixtisas dərəcəsinə görə əlavə, əmək şəraiti əlavələri və artıq iş saatları üçün haqdan ibarətdir. Ən əsası isə, yeni modeldə əməkhaqqının vəzifə maaşında ümumi payı artıq cəmi 35-45 faiz deyil, orta hesabla 95 faizdən yuxarı təşkil edəcək. Bu isə əməkhaqqının baza hissəsinin kəskin güclənməsi deməkdir. Beləliklə, aparılan dəyişikliklər nəticəsində əməkhaqqının daha sabit və əvvəlcədən proqnozlaşdırıla bilən olması təmin ediləcək. Nəticədə bu, dövlət qulluqçularının gəlirlərinin daha çox sabit maaş üzərində formalaşmasına zəmin yaradacaq. Bu da əlbəttə ki, dövlət qulluğunda çalışanların xeyrinə olacaq”.
Vidadi ORDAHALLI
