İlqar Hüseynli: “Müştərək maliyyələşmə mənbələrinin üzərində yaranan çətinlikləri nəzərə alaraq...”
İcbari tibbi sığorta çərçivəsində müştərək maliyyələşmə məbləğinin ödənilməsi 1 il uzadılıb. Bununla bağlı Prezident İlham Əliyev "Tibbi sığorta haqqında" qanuna dəyişikliyi təsdiq edib. Sənədə əsasən, ilkin tibbi-sanitariya yardımına müraciət etmədən birbaşa ixtisaslaşdırılmış həkim müayinəsi ilə bağlı tibbi xidmətlərdən istifadə etdikdə sığortaolunan müştərək maliyyələşmə məbləği ödəməlidir.
Dəyişikliyə görə, sözügedən maddə 2027-ci il yanvarın 1-dən qüvvəyə minəcək.
Xatırladaq ki, müştərək maliyyələşmə məbləği sığorta hadisəsi nəticəsində yaranan itkilərin və ya dəyən zərərin icbari tibbi sığorta təminatı ilə əhatə olunmayan və sığortaolunan tərəfindən ödənilən hissəsidir.
Bunun əhəmiyyəti nədir? Prezident tibbi sığortada müştərək maliyyələşməni niyə dayandırdı?...
Ekspert İlqar Hüseynli baki-xeber.com-a bildirdi ki, İcbari Tibbi Sığorta Agentliyi tərəfindən icbari tibbi sığortanın müştərək qarşılanması ilə bağlı təklif irəli sürülüb: “İcbari Tibbi Sığorta Agentliyi tərəfindən təklif edilən müştərək qarşılanma nə idi? İcbari tibbi sığortanın bir hissəsinin vətəndaş özü qarşılamalı idi. Yəni vətəndaşın işləyib işləməməsindən, təqaüdçü, yaşlı şəxs olub olmamasından aslı olmayaraq o bunu etməli idi. Bu agentlik tərəfindən təklif edilmişdi və 2026-cı ilin yanvar ayından qüvvəyə minməsi planlaşdırılırdı. Görünür 2026-cı ilin sosial ödənişləri, sosial təminatları ilə bağlı biz çox da irəli gedən nəticələrə nail ola bilməmişik. Vətəndaşın pensiya təminatında, əməkhaqqı ilə bağlı məsələlərdə ciddi artımlar müşahidə olunmadığına görə bu addım atılıb. Belə ehtimal etmək olar ki, gələcəkdə neft amilinin, eyni zamanda son vaxtlar qlobal dünyada baş verən çox ciddi hadislərin regionlara, o cümlədən də Azərbaycana təsiri baxımından ölkə Prezidenti tərəfindən dəyərləndirmə aparılıb. Həmin müştərək maliyyələşmə mənbələrinin üzərində yaranan çətinlikləri nəzərə alaraq bu məbləğin ödənilməsi 1 il müddətinə təxirə salıb. Hesab edirəm ki, bunun qüvvəyə minməməsi daha məqsədəuyğundur”.
İ.Hüseynli qeyd etdi ki, icbari tibbi sığortanın tətbiqi bütün Azərbaycan vətəndaşlarına şamil olunur və olmalıdır. “İş yeri olmayan, əməkhaqqı almayan, çox cüzi pensiya alan şəxslərin, öz ciblərindən, yaxud mənbəyi məlum olmayan vəsaitlər hesabına həmin 18 manatı ödəmələri onların imkanları baxımından ciddi bir problemdir. Bu dərin bir məsələdir. Ola bilsin, 2027-ci ildə sosial müdafiə sahəsində elə bir islahatlara zərurət yarana bilər ki, Prezident sərəncamı ilə başqa alternativ mənbələr hesabına o məbləğlərin ödənilməsi mümkün olar. Bu baxımdan, hesab edirəm ki, icbari tibbi sığortanın müştərək maliyyələşməsinin 2027-ci ilin yanvar ayına qədər təxirə salınması bu faktorlardan aslı olan səbəblərdir. Görünür Prezident də bu amilləri dəyərləndirib aztəminatlı ailələrin, pensiya təminatı ilə yaşayan insanların sosial imtiyazlarının gücləndirilməsini nəzərə alaraq belə bir addımın atılmasına şərait yaradıb”-deyə İ.Hüseynli qeyd etdi.
İradə SARIYEVA
