Tural İrfan: "Hud surəsinin 18 -ci ayəsində əslində bu cür adamların özündən bəhs edilir, onlar vaxtilə törətdiyi əməlləri Allaha bağlayır və ona iftira atırdılar”
İqtisadi təhlükəsizliyə qarşı təxribat və xüsusilə külli miqdarda mənimsəmə əməllərində ittiham olunan SOCAR-ın İnvestisiya departamentinin sabiq rəhbər müavini Adnan Əhmədzadənin xanımı Gülsəfa Cəfərova sosial şəbəkə hesabında atdığı addımla diqqət çəkib.
G.Cəfərova həyat yoldaşı barəsində həbs qətimkan tədbiri seçildikdən sonra o, instaqram hesabına əl gəzdirib, bahalı həyat tərzini əks etdirən fotoların böyük qismini platformadan silib. Həmçinin, o, “story” bölməsində etdiyi paylaşımlarla “Quran”dan “Hud” sürəsinin 18-ci ayəsini paylaşıb. G.Cəfərovanın bu hərəkəti müzakirələrə səbəb olub. Ümumiyyətlə, “Hud” sürəsinin 18-ci ayəsində nə deyilir?
İlahiyyatçı Tural İrfan baki-xeber.com-a bildirdi ki, insan psixologiyası və xarakteri belədir ki, çox zaman dara düşəndə, çıxılmaz durumda qalanda Yaradana, gözə görünməz pənah yerinə ümid bağlayır: “Amma həyatının ən parlaq və əlində fürsətlər olan vaxtında Allahı saymır, məzlum insanlara rəhm etmir. Bu, Quranda da qeyd olunur ki, adamlar dənizdə tufan qalxıb gəmi batmaq üzrə olanda Yaradana üz tutur, ona bir çox şeylərdə söz verirlər. Lakin tufan səngiyib qərq olmaq təhlükəsi sovuşandan sonra yenidən küfr və günah yoluna davam edirlər. Hud surəsinin 18-ci ayəsində əslində bu cür adamların özündən bəhs edilir. Onlar vaxtilə törətdiyi əməlləri Allaha bağlayır və ona iftira atırlar. Ayədə deyilir: "Allaha qarşı yalan uyduran kimsədən daha zalım kim ola bilər?! Onlar (axirət günü) Rəbbinin hüzuruna gətiriləcəklər. Şahidlər də: “Bunlar Rəbbinə qarşı yalan söyləyənlərdir!” - deyəcəklər. Bilin ki, Allahın lənəti zalımlaradır.
Təbii ki, xalqın malını talayan, eyş-işrətə sərf edən kəslər zalımlardır. Bu ayəni manipulyasiya edərək özünə sərf edən formada istifadə etməsi qeyd olunan şəxsin Türkiyədə həbs olunan Adnan Oktarın məlum cərəyanının ya mənsubu, ya da təsirində olduğunu göstərir. Məhz həmin cərəyanın davamçıları Quran ayələrini bu cür təhrif edərək öz mənafeləri istiqamətində istifadə edirdilər. Belə əməllər sadəlövh adamları manipulyasiya etmək, özləri haqqında dindar, saf adam obrazı yaratmaq cəhdidir”.
Günel CƏLİLOVA
