Kamran Məmmədov: “Bu gün “TikTok”da şit-şit hərəkətlər, meymunluq edərək rahat pul qazananlar az deyil”
Kimi rəqəmsal marketinq fəaliyyətləri, kimi sırf əyləncə, bir qismi isə tanınmaq və özünə bir iş yeri yaratmaq kimi məqsədlər üçün müəyyən sosial media platformalarından istifadə edir.
Məlumdur ki, “Instagram”, “YouTube”, “TikTok”, “Facebook” və “Twitter” kimi sosial media platformaları cəmiyyətdə ən çox istifadə edilən sosial media platformaları olaraq bilinir. Son zamanlar dövrün tələbinə uyğun olaraq, xüsusilə iş adamlarının və məşhur simaların yeni sosial media platformalarından biri olan “TikTok”a üz tutduqları görülür. Sosial platformalardan kifayət qədər gəlir əldə edənlər az deyil. Bu səbəbdən də sosial şəbəkələrdən böyük məbləğdə gəlir əldə edən şəxslərin vergi ödəməsi məsələsi ölkədə müzakirə mövzusuna çevrilib. Yeni qanunvericilik təşəbbüsü reallaşacağı təqdirdə, fenomenlərdən tutmuş onlayn kontent yaradan digər şəxslərə qədər geniş bir kütlənin fəaliyyətinə təsir göstərə bilər. Maraqlıdır, sosial şəbəkələrin vergiyə cəlb olunması nə dərəcədə məqsədəuyğundur?
“Sosial şəbəkələrin vergiyə cəlb olunması qanuniləşməlidir”
Iqtisadçı Kamran Məmmədli “Bakı-Xəbər”ə şərhində bildirdi ki, gəlir əldə edən hər bir kəs vergi ödəməlidir: “Bu, iqtisadiyyatın aksiomudur. Gəlir artırsa, vergi də çox ödənilməlidir. Eyni zamanda gəlirlərin strukturu, mahiyyəti təhlil olunmalıdır. Əlavə dəyər daha çox əmək tutumlu sahələrdə formalaşırsa, orada müvafiq güzəştlər və stimullaşdırıcı tədbirlər də ola bilər. Əgər əlavə dəyər sosial şəbəkələr, maliyyə bazarları və böyük əmək tutumlu sferalara aid deyilsə, vergi və fiskal yükünün də həcminin artırılması məqsədəuyğundur. Danılmaz faktdır ki, bu gün “Tik Tok”da şit-şit hərəkətlər edən, meymunluq edərək rahat pul qazananlar az deyil. Məlumdur ki, “TikTok” sosial şəbəkəsində keçirilən oyunlar zamanı bir sıra simvollar vasitəsilə insanlar tərəfindən tiktokerə hədiyyə jetonları göndərilir. Həmin jetonlar məbləğinə görə bir-birindən fərqlənir. Sosial şəbəkələrin vergiyə cəlb olunması qanuniləşərsə, əsas dəyişiklik həmin platformalarda gəlir əldə edən kontent istehsalçılarının rəsmi uçota alınması və şəffaf gəlir deklarasiyalarının ortaya çıxması olacaq”.
Günel CƏLİLOVA
