Elçin Bayramlı: “Kombi sisteminin ləğv edilsin təklifini səsləndirilənlər Bakının hazırki vəziyyəti ilə tanış deyil”
“Yeni tikilən binalarda sərt qaydalar olmalıdır. “Azərisitiliktəchizat” ASC-nin icazəsi olmadan bina tikintisinə başlanılmamalıdır”. Bu fikri Milli Məclisin deputatı Rövşən Muradov parlamentin Təbii ehtiyatlar, energetika və ekologiya komitəsinin ötən iclasında çıxışı zamanı deyib.
O bildirib ki, 2005-ci ildən tikilən binaların hamısında qazanxana var və fərdi kombilərdən istifadə israfçılığa gətirib çıxarır, buna görə də kombi sistemləri ləğv edilməlidir.
Millət vəkilinin binalarda kombi sistemi ləğv edilməsi təklifi ictimaiyyət və mütəxəssislər arasında narazılığa səbəb olub. Ekspertlər bu təklifi qeyri- real sayır.
“Hündürmərtəbəli binalarda kombi sistemini ləğv edib, istilik sisteminə keçməsi mümkünsüzdür”
Kommunal məsələlər üzrə ekspert Nüsrət Qasımov bildirib ki, hazırda fəaliyyət göstərən qazanxanaların demək olar ki, hamısı bərbad vəziyyətdədir: “1950-ci illərin axırında Bakıda 9 ədəd qazanxana tikilmişdi. Onun 6-sı məhv olub, yerdə 3-ü qalıb. Təsəvvür edin, Dərnəgüldə su qızdırılır və 10 kilometrlərlə məsafə qət edir, sirkulizasiya edərək qayıdır. Həmin suyun getdiyi yarım metr diametrlik borularların hamısı demək olar ki, çürüyüb. Onların istismar müddəti 33 ildir. Borular korroziyaya uğrayıb. Yağıntılar zamanı bəzən görürsən ki, kanalizasiya lyuklarından buxar qalxır. O həmin istilik üçün göndərilən sudur ki, deşilir və kanalizasiyaya tökülür. Yeni binalarda qazanxanaların inşası qeyri-mümkündür”.
Sağlam Cəmiyyət Hərəkatının rəhbəri, sosioloq Elçin Bayramlı “Bakı-Xəbər”ə açıqlamasında qeyd etdi ki, ümumi qazanxana sistemi ən optimal variantdır. Bu bütün dünyada bu tətbiq olunur: “Sovet dönəmində bütün binalarda qazanxana sistemi olub. Daha sonra bu sistem ləğv edildi, ancaq az-maz yerlərdə qalıb. Yeni tikilən binalarda isə qazanxana sistemi qurulmadı. Nəticədə köhnə binalar da daxil olmaqla və yenitikililər fərdi kombi sisteminə keçdi. Bu isə olduqca çox bahalı prosesdir. Hündürmərtəbəli binalarda kombi sistemini ləğv edib, istilik sisteminə keçməsi mümkünsüzdür. Çünki Bakı şəhəri elə bir yerdir ki, nə tikinti normasına, nə də bina tikintisi qaydalarına riayət edilib. Binalar sıx-sıx, necə gəldi, harda gəldi inşa edilib. Həmin ərazilərdə nəinki qazanxana, heç həyətdə maşın saxlamaq üçün yer tapılmır. Belə olduğu halda qazanxana harda tikiləcək? Kombi sisteminin ləğv edilsin təklifini səsləndirilənlər Bakının hazırki vəziyyəti ilə tanış deyil, deyəsən. Bakı şəhəri artıq tikilib, qurtarıb, yeni nəsə etmək çətindir”.
Günel CƏLİLOVA
