Milli Məclisin Səhiyyə komitəsinin ötən iclasında xəstəxanalarla bağlı xoşagəlməz vəziyyətin müşahidə olunduğu fikri səslənib. Milli Məclisin Səhiyyə komitəsinin üzvü Müşfiq Məmmədli qeyd edib ki, son illərdə Sumqayıt Tibb Mərkəzi, Gəncə Birləşmiş Xəstəxanası və Kliniki Tibbi Mərkəzdə aparılan uyğunluq auditi nəticəsində bir-birini təkrarlayan, mahiyyətcə eynilik təşkil edən pozuntuların şahidi oluruq:
“Çarpayı sayının eyni qalması və yaxud azalması fonunda ştat sayının kəskin artımı (10-15%), ştat vahidlərində qeyri-tibb personalının 35%-dən yuxarı həddə çatması, ştat cәdvәlinin vahid tarif-ixtisas kitabçasına uyğun olmaması nәzәrdә tutulmayan vәzifәlәrin müәyyәn edilmәsi ilә dövlәt vәsaitinә әlavә tәlәbat yaradılması, müəssisələrdə iqtisadi hesabatlılığın gecikməsi səbəbindən əsas gəlir gətirən həkimlərə həvəsləndici əlavələrin 3-4 ay gecikməsi, dövlәt әmlakının uçotu vә istifadәsinin düzgün tәşkil edilmәmәsi, bir sıra hallarda aktivlәrin әskik vә ya artıq gәlmәsi dövlәt әmlakının sәmәrәli vә funksional fәaliyyәtә uyğun idarә olunmaması. İcbari Tibbi Sıgorta vəsaitlərindən dövlət tibb müəssisələrində və ya özəl müəssisələrdə istifadə zamanı iqtisadi cəhətdən əsaslandırılan və Rəqabət Məcəlləsinin müddəaları nəzərə alınan metodlardan istifadə olunmalıdır”.
Parlamentdə səsləndirilən iradlar ekspertlər tərəfindən də dəstəklənir.
Rasif Bağırov: “Dövlət əmlakının təyinatı üzrə işlədilməməsi ciddi problemdir”
Həkim ekspert Rasif Bağırov “Bakı-Xəbər”ə şərhində bildirdi ki, bəzi xəstəxanalarda qanunsuzluq müşahidə olunur. Bu danılmaz faktdır: “Xəstəxanalarda çarpayı sayının azalmasının səbəbi xəstələrin normadan az müddətdə saxlanmasıdır. Xəstəxanalar xəstəni normadan az müddətdə saxlayır. Bu, ilk növbədə xəstənin sağlığı üçün problemdir. Təbii ki, qeyd edilən hal çarpayının boş olmasına səbəb olur. Xəstə cərrahi əməliyyat olunandan sonra minimum 3 gün xəstəxanadan qalmalıdır ki, vəziyyəti stabilləşsin sonra evə yazılsın. Ancaq elə həmin gün ya da səhərisi gün çarpayını boşaltmaq üçün xəstəni evə göndərirlər. Bu isə yolverilməzdir”.
Ekspert onu da əlavə etdi ki, dövlət əmlakının təyinatı üzrə işlədilməməsi ciddi problemdir: “İcbari Tibbi Sığorta ilə bağlı problem tək bölgələrdə deyil, Bakı şəhərində də müşahidə olunur. Bununla yanaşı, həkimlərin xəstələrin təlabatına uyğun addım atmaması olduqca problemli məsələdir. Eyni zamanda, xəstəxanalarda İcbari Tibbi Sığortadan kənar addımlar atılır”.
Adil Qeybulla: “Bütün xəstəxanalar - dövlət, özəl klinikalar tibbin qanunları ilə çalışmalıdır, ancaq bunun əksini görürük”
Professor, tibbi ekspert Adil Qeybulla “Bakı-Xəbər”ə şərhində bildirdi ki, bütün xəstəxanalar - dövlət, özəl klinikalar tibbin qanunları ilə çalışmalıdır, ancaq bunun əksini görürük: “Məlumdur ki, nazirliklərin nəzdində xeyli xəstəxanalar var və onlar da nəzarətdən kənardadır. Həmin xəstəxanalara da vahid sistemdən nəzarət olmalıdır. Xəstəxanalarda sığorta ilə bağlı problemlər yaşanır. Nəzərə almaq lazımdır ki, sığorta maliyyəyə bağlı prosesdir və bu sahədə özbaşınalıq böyük problemlərə yol aça bilər. Sığorta ilə bağlı məsələyə tam ciddi yanaşılmalıdır. Dövlət və özəl xəstəxanaların bir qismi İcbari Tibbi Sığorta sisteminə qoşulub. Dövlət vəsaitlərinin xərclənməsi vətəndaşın xeyrinə olmalıdır. Vətəndaş bu prosesdən fayda götürməlidir”.
Günel CƏLİLOVA
