Hər dəfə Bakıya güclü yağışlar yağanda bəzi avtomobil yollarında və tunellərdə böyük həcmdə yağış sularının yığılması müşahidə edilir. Eyni hal ötən həftə yağan güclü və fasiləsiz yağışlardan sonra da təkrarlanıb.
Yağışların yağmasından sonra şəhərin əksər tunelləri su ilə dolub, avtomobillərin bu tunellərdən hərəkəti qeyri-mümkün olub. Sosial şəbəkərlərdə paylaşılan görüntülərdən, rəsmi dövlət qurumları tərəfindən açıqlanan məlumatlardan görünür ki, bəzi tunellərdə yığılan suyun səviyyəsi yüksək olduğu üçün nəqliyyat vasitələrinin hərəkəti mümkünsüz olub. İctimaiyyət belə halların əvvəllər də yaşandığını nəzərə alaraq, Bakı Şəhər İcra Hakimiyyəti başda olmaqla, digər aidiyyəti qurumları qınaq obyektinə çevirib.
Bakı Şəhər İcra Hakimiyyətinin başçısı Eldar Əzizov isə ictimai tənqidlərə cavab olaraq qeyri-adi təkliflə çıxış edib. Bakı meri məlum məsələ ilə bağlı açıqlamasında bildirib ki, güclü yağış və leysanlar zamanı tunellərə və körpüaltı keçidlərə nəqliyyat vasitələrinin girişinə məhdudiyyət qoyulsun. Eldar Əzizovun təklifi insanlar tərəfindən birmənalı qarşılanmayıb.
Ərşad Hüseynov: “Merin irəli sürdüyü təklifin heç bir məntiqi əsası yoxdur”
Hüquqşünas Ərşad Hüseynov bildirdi ki, merin irəli sürdüyü təklifin heç bir məntiqi əsası yoxdur: “Nasos stansiyalarını, su xətlərini düzəltmək lazımdır. Yağış sularının axıdılması üçün olan vacib şəbəkəni saz vəziyyətinə gətirmək lazımdır. Başqa qeyri-adi təkliflərə ehtiyac yoxdur. Müvafiq qurumların lazımi addımları atmamasının səbəbi maliyyə ilə bağlıdır. Vaxtilə qurulmuş sistemlər dağılıb, indi də həmin xətləri bərpa etmək üçün böyük vəsait lazımdır. Ona görə də baxırlar ki, nə vaxt maliyyə veriləcək”.
Elçin Bayramlı: “Problemin səbəbini aradan qaldırmaq yox, hər hansı bir qadağa qoymaq, bağlamaq üsulu seçilir, ancaq…”
Sosioloq Elçin Bayramlı “Bakı-Xəbər”ə şərhində bildirdi ki, bu, olduqca gülünc açıqlamadır: “Çıxış yolunu hər şeyi bağlamaqda və dayandırmaqda görürlər. Həmişə problemin səbəbini aradan qaldırmaq yox, hər hansı bir qadağa qoymaq, bağlamaq üsulu seçilir. Çünki 20-30 ildir şəhər tamamilə şəhərsalma sisteminə zidd olaraq, yalnız gəlir əldə etmək, pul qazanmaq məqsədilə qarış-qarış satılır, harda gəldi tikintilər aparılıb. Burada artıq ona uyğun kanalizasiya sistemləri, kommunal sistemlər və infrastrukturlar qurulmayıb. Artıq Bakı şəhərini xilas etmək mümkün deyil. Bunu özləri də başa düşürlər. Çünki tamamilə şəhər iflic vəziyyətə salınıb, Bakı şəhəri iflas edib. Yəni ən kiçik yağış, qar yağması kimi hallarda şəhər bərbad vəziyyətə düşürsə, yağışlar bir neçə gün belə davam etsə bu şəhərdə necə faciəvi vəziyyət yaranar, çox maraqlıdır. Artıq bu problemi həll etmək imkanları qalmayıb. Çünki həll etmək üçün şəhərin ən azı yarısı sökülməlidir. Bu da praktiki olaraq mümkün deyil. Bu problemin həlli yeganə həll yolu Bakı şəhərinin əhalisi ən azı iki dəfə azaldılmasıdır. Bunun üçün də regionlar inkişaf etdirilməli, regionlarda xüsusi güzəştlər, yardımlar, sənaye müəssisələri, sosial, mədəni infrastrukturlar gücləndirilməlidir. Bütün investisiyalar regionlara yönəldilməlidir ki, tədricən Bakıdan regionlara köçüb yaşamaqda insanlar maraqlı olsunlar. Bakıda əhali artıq olduğuna görə kommunal infrastrukturlar maksimum gərginlikdə işləyir. Su, elektrik, qaz, yüksək gərginlikdə işləyir. Yeraltı kanalizasiya sistemləri çatdırmır. Bunların hər biri də sistemsiz şəhərsalmanın nəticəsidir”.
Günel CƏLİLOVA
