Erməni saxtakarlıqlarının ifşasına dair Əqli Mülkiyyət Agentliyi tərəfindən 2016-cı ildən başlayaraq "Don bəzəyər də, ifşa edər də" seriyasından kitab və broşurların nəşri davam etdirilib.
Trend xəbər verir ki, bunu bu gün Əqli Mülkiyyət Agentliyinin İdarə Heyətinin sədri Kamran İmanov jurnalistlər üçün keçirilən brifinqdə deyib.
O qeyd edib ki, 2024-cü ildə bu seriyadan Agentlik tərəfindən hazırlanmış "Qərbi Azərbaycan torpaqları qədim və klassik mənbələrdə və DNT-analiz" və "Земли Западного Азербайджана в древних и классических источниках и ДНК-анализ" adlı yeni kitabları (müəllif K.İmanov) Azərbaycan və rus dillərində nəşr olunaraq yayılmışdır.
"Dahi Azərbaycan bəstəkarı Üzeyir Hacıbəylinin "O olmasın, bu olsun" komediyasının musiqisinin bir hissəsinin və Azərbaycan musiqisinin digər nümunələrinin ermənilər tərəfindən mənimsənilməsi ilə bağlı və Agentliyin Mədəniyyət Nazirliyi ilə birgə bəyanatı yayılmışdır. Bəyanatda "O olmasın, bu olsun" komediyasının musiqisinin bir hissəsinin erməni bəstəkarı Arno Babacanyanın "müəllifliyi ilə "Vaqarşabat rəqsi adı altında "Youtube" platformasında yerləşdirilməsinə ciddi etiraz bildirilmiş, Üzeyir Hacıbəylinin müəllif hüquqlarının bərpa edilməsi, habelə Ermənistan Respublikasının ərazisində və ya onun subyektləri tərəfindən Azərbaycan mədəni irsi, xüsusilə də musiqi irsi nümunələrinin kütləvi şəkildə mənimsənilməsi hallarını aradan qaldırmaq və görülən tədbirlər barədə məlumat verilməsi tələb olunmuşdur.”
Sədr qeyd edib ki, sözləri və musiqisi Azərbaycan bəstəkarı Bəhram Nəsibova məxsus olan "Qarabağ" ("Anadır arzulara hər zaman Qarabağ") adlı mahnının sözləri erməni ifaçısı Gor Yepremyan tərəfindən dəyişdirilmiş və onun ifasında "Sirun jan" adı altında "Armenian Folk", yəni “erməni xalq mahnısı” qeydi ilə "Youtube" platformasında" yerləşdirilmişdi.
“Agentlik tərəfindən görülən tədbirlər nəticəsində erməni Gor Yepremyanın erməni nümunəsi kimi təqdim etdiyi bu mahnı "Youtube" platformasından və "Youtube Music", "Spotify", "Apple Music", "Amazon Music", "Deezer” və digər rəqəmsal musiqi platformalarından silinmişdir. Qeyd edilən məsələ ilə əlaqədar Agentlik tərəfindən 2024-cü il 9 iyul tarixində geniş şərh, 10 iyul tarixində Agentliyin Mədəniyyət Nazirliyi ilə Birgə Bəyanatı yayılmışdır.”
K. İmanov qeyd edib ki, musiqisi Azərbaycan bəstəkarı, əməkdar incəsənət xadimi Cavanşir Quliyevə məxsus, sözləri bayatılardan ibarət olan "Yarımgilə" adlı mahnının sözləri erməni ifaçı Minas Ovanesyan (Mino) tərəfindən dəyişdirilərək "Xrovel e im yare" adı ilə ifa edilmiş və "Youtube" platformasında yerləşdirilmişdi. Agentlik bu oğurluğun da qarşısını almış və Minas Ovanesyanın (Mino) ifa etdiyi "Xrovel e im yare" adlı mahnı "Youtube" platformasında 5 (beş) səhifədən silinmişdir.
"Youtube" platformasının "Behrooz Abshar" adlanan səhifəsində erməni musiqi nümunələri kimi yerləşdirilmiş Azərbaycanın xalq artisti Şövkət Ələkbərovanın ifa etdiyi "Yar gəldi, yar" (musiqisi bəstəkar Adil Gəraya, sözləri Əli Kərimə məxsusdur), "Töhfə" (musiqisi bəstəkar Firəngiz Babayevaya, sözləri Baba Vəziroğluna məxsusdur), "Getmə amandır" (musiqisi Hacı Xanməmmədova, sözləri Aşıq Ələsgərə məxsusdur), "Yavaş-yavaş" (musiqisi Nazil Qəmərlinskiyə, sözləri Bəxtiyar Vahabzadəyə məxsusdur) və "Bayram şamları" (musiqisi bəstəkar Cahangir Cahangirova, sözləri Şıxəli Qurbanova məxsusdur) mahnıları da Agentliyin gördüyü tədbirlər nəticəsində həmin platformadan silinmişdir”, - deyə o qeyd edib.
