"HİCAZ 313" MMC nədən “Gourmeat” MMC-yə çevrildi?
Son illər Azərbaycan ət məhsulları istehsalı seqmentində çox bərbad vəziyyət yaranıb. Kolbasa və sosiska istehsalı sahəsində istiot, sarımsaq və digər dadlaňdırıcıların köməyi ilə asanlıqla xoşagəlimli dad almaq mümkün olduğuna görə məhsulun qidalılıq dəyəri, xüsusilə tərkibindəki ətin miqdarı azaldılır.
Bu üsula sahibkarlar ona görə əl atır ki, bununla onlar məhsulun maya dəyərini aşağı salır və daha çox qazanır. Məsələn, bir kq kolbasanın tərkibində 700-800 qram ət olmalıdırsa, sahibkar məhsulun tərkibində ətin xüsusi çəkisini 300-400 qrama salmaqla onun maya dəyərini yarıbayarı azaldır. Adından göründüyü kimi sosiska və kolbasa ət məhsulu kateqoriyasına aid olduğu üçün onun maya dəyərinə təsir edən əsas məhsul ət olmalıdır. Bizdə isə ət məhsullarının tərkibində ətin xüsusi çəkisi dolduruculardan və ucuz yağlardan daha az olur. Bir çox hallarda isə xaricdən idxal edilən ət məhsullarının tərkibində donuz piyi olduğu halda bunu ət məhsulunun üstündə göstərmirlər. Azərbaycan müsəlman ölkəsi olduğu üçün bu çox vacib məsələdir. Bəzən hətta, mal piyinə belə donuz piyi əlavə edilir və bu məhsulun üstündəki yarlıqda göstərilmir.
Bəzi hallarda belə qanun pozuntuları ilə adını ləkələyən şirkət rəhbərləri köhnə MMC-ni bağlayıb fəaliyyətini yeni MMC ilə davam etdirir. Araşdırmamız nəticəsində o qənaətə gəldik ki, haqqında söhbət açacağımız “Gourmeat” MMC də belələrindəndir.
Azərbaycan Qida Təhlükəsizliyi Agentliyi (AQTA) məlumat yayıb ki, nəzarət tədbirləri çərçivəsində “Gourmeat” MMC-nin Rusiyadan idxal etdiyi “Bryansk Meat Company” şirkətinin istehsalı olan 21 ton “Miratorq” əmtəə nişanlı mal piyindən Qida Təhlükəsizliyi Agentliyinin əməkdaşları tərəfindən götürülmüş nümunələrin müayinəsi nəticəsində məhsul partiyasında donuz DNT-si aşkarlanıb.
Faktla bağlı məhsul partiyası barədə qanunvericiliyə uyğun müvafiq qərar qəbul edilib. “GourMeat” MMC (VÖEN:3105274471) 8 oktyabr 2024-cü il tarixində İqtisadiyyat Nazirliyi yanında Dövlət Vergi Xidmətində dövlət qeydiyyatına alınıb. Şirkət 204 min manat nizamnamə kapitalına malikdir.
“GourMeat” MMC-nin qanuni təmsilçisi Feyzullayev Münasib Abdulxan oğludur. Şirkətin hüquqi ünvanı AZ0100, ABŞERON RAYONU, XIRDALAN ŞƏHƏRİ, 28-Cİ MƏHƏLLƏ ev.15. m.50 ünvanıdır.
Araşdırmalarımız nəticəsində bəlli oldu ki, “GourMeat” MMC qeydiyyatdan keçənə qədər Feyzullayev Münasib Abdulxan oğlu "HİCAZ 313" MƏHDUD MƏSULİYYƏTLİ CƏMİYYƏTİ (1004220711) adlanan kommersiya müəssisəsinin qanuni təmsilçisi olub.
"HİCAZ 313" MMC-nin hüquqi ünvanı: AZ1130, BAKI ŞƏHƏRİ BİNƏQƏDİ RAYONU, SÜLEYMAN SANİ AXUNDOV küçəsi, ev 2, m.51. olub. MMC-nin nizamnamə kapitalı 10 manat təşkil edib. Şirkət 20 aprel 2016-cı il tarixdə dövlət qeydiyyatına alınıb.
Yuxarıda qeyd etdiyimiz kimi, qanuni təmsilçisi Feyzullayev Münasib olan "Hicaz 313" MMC-nin də fəaliyyətində mediaya sızan kifayət qədər əyinti və pozuntuları olub. Çox güman ki, köhnə şirkətinin adı ləkələndiyinə görə Münasib Feyzullayev yeni şirkət açmaq qərarına gəlib. "Hicaz 313" MMC-nin yol verdiyi pozuntulardan bir neçəsini oxucuların diqqətinə təqdim edirik.
2023-cü ildə “Hicaz 313” MMC-nin istehlaka yararsız qida məhsullarının məhv edilməsi ilə bağlı Qida Təhlükəsizliyi Agentliyinə (AQTA) müraciəti əsasında 2 adda, ümumi çəkisi 3,9 ton kolbasa məhsulu “EkoSum” MMC-yə məxsus tullantıların zərərsizləşdirilməsi poliqonunda məhv edilib.
2017-ci ildə isə istehlak bazarında keyfiyyətsiz malların satışının qarşısının alınması məqsədilə İqtisadiyyat Nazirliyi tərəfindən aparılan tədbirlər çərçivəsində müxtəlif ticarət obyektlərində satışda olan malların ilkin laborator müayinəsi zamanı "Hicaz 313" MMC tərəfindən istehsal olunan ət məhsullarının tərkibində insanların həyat və sağlamlığı üçün təhlükə yaradan mikroorqanizmlərin normativ sənədlərlə yol verilən miqdardan artıq olduğu müəyyənləşdirilib.
Akif NƏSİRLİ
