Məhərrəm Zülfüqarlı: “İndiki zamanda erməni serialının Türkiyədə yayımlanması məsələsinin gündəmə gəlməsi, əlbəttə, Qərbin təzyiqinin nəticəsidir”
Türkiyə ilə münasibətlərin normallaşması üçün Ermənistanın heç bir əməli addım atmadığı məlumdur. İki ölkə arasında qarşılıqlı əlaqələrin olmadığını da bilirik. Qəribədir ki, vəziyyətin normal olmadığı bir vaxtda Türkiyədə erməni serialı yayımlanacaq.
“Ermənixəbər”in yaydığı məlumata görə, Türkiyədə “Luys TV” X mikrobloqunda ilk erməni-türk telekanalı - “4 yaramaz çocuk” serialı yayımlanacaq. Qeyd olunur ki, bu, Türkiyədə yayımlanan ilk erməni serialı olacaq.
Serial erməni dilində türkcə subtitrlərlə yayımlanacaq.
Bildirilir ki, “Luys” televiziyası İstanbulda yaşayan erməni jurnalist Aram Kuran tərəfindən təsis edilib. Yayım 2019-cu ildə başlayıb. Yayımlanan proqramların 70 faizi “Qərbi erməni”, 30 faizi isə türk dilindədir.
Deyirlər ki, bu kanalda verilişlərin 70 faizi "Qərbi erməni" dilində yayımlanır. "Qərbi erməni dili" nədir? Ermənistan nə boyda dövlətdir ki, hələ olun Cənubi, Şimalı, Şərqi, Qərbi də olsun?
Ermənilərə bu qədər geniş qucaq açılması Türkiyəyə erməni lobbisinin maraqları çərçivəsində ABŞ-dan bir təzyiqin nəticələri ola bilərmi? O telekanalda film erməni dilində yayımlanacaq, amma türk dilində subtitrlə veriləcək. Niyə belə olur ki? Türk dilində getsin, erməni dilində subtitrlə verilsin, ora Türkiyə dövlətidir, dövlət dili türk dilidir, erməni dili deyil.
Bu, erməni lobbisinin maraqları naminə ABŞ-ın Türkiyəyə təzyiqlərinin nəticəsi sayıla bilərmi ki, Türkiyədə erməni mövzusunu belə aktuallaşdırırlar?
“Bu gün “Dörd yaramaz cocuq” serialının nümayişinə hazırlıq gedirsə, sabah qondarma erməni “soyqırımına” aid də nəsə yayımlana bilər, bu təhlükə də var”
Siyasi ekspert, professor Məhərrəm Zülfüqarlı “Bakı-Xəbər”ə bildirdi ki, bu məsələ çox ağrılı məsələdir. “Bəlkə bunu demokratiyanın qüsuru kimi də qiymətləndirmək olar. Türkiyə demokratik ölkədir. Yadınızdadırsa, hətta bir bələdiyyə Ermənistan-Türkiyə sərhədində “Türkiyə - Ermənistan dostluğu” ilə bağlı böyük bir heykəl ucaltmışdı. Sonradan məhkəmənin qərarı ilə bu heykəl söküldü. Yəni belə hallar Türkiyədə olur. Bunu da demokratiyanın təzahürü kimi qiymətləndirirlər. İndiki zamanda erməni serialının Türkiyədə yayımlanması məsələsinin gündəmə gəlməsi, əlbəttə, Qərbin təzyiqinin nəticəsidir. Bu, eyni zamanda Türkiyə müxalifətinin təzyiqi nəticəsində baş verir. Türkiyədə solçu müxalifət də, PKK-ya dəstək verən partiya da var. Həmçinin onlar ermənilərə də bu cür dəstək verirlər. Mənə elə gəlir ki, Türkiyə bu addımı atmazdan əvvəl Ermənistanla bir paralel aparmalıdır, Ermənistanda hansısa telekanalda türk filmi yayımlanırmı, yaxud orda türk dilində yayımlanan bir telekanal varmı? Yoxdursa, Türkiyədə erməni dilində telekanalın olması, fikrimcə, məntiqsizdir. İkincisi, Türkiyə soruşmalıdır ki, Ermənistanda yaşayan türklər necə oldu? Yəni əgər orda yaşayan azərbaycanlılar qalsaydı Türkiyə tələb edə bilərdi ki, milli azlıq kimi Ermənistanda Azərbaycan dilində telekanal olsun. Amma ermənilər ordan bütün millətləri qovduqdan sonra bir monoetnik dövlət yaradıblar. Fikrimcə, Türkiyənin milli azlıqlara bu cür qucaq açması bu dövləti zəiflədə bilər. Çünki milli azlıq məsələsindən həmişə Qərb ölkələri istifadə edirlər. Bu baxımdan, ehtiyatlı olmaq lazımdır. Çünki bu gün “Dörd yaramaz cocuq” serialının nümayişinə hazırlıq gedirsə, sabah qondarma erməni “soyqırımına” aid də nəsə yayımlana bilər, bu təhlükə də var”.
Türkiyə zamanında bu kimi cəhdlərə qarşı tədbir görməsə bu kimi halların onun zəifləməsinə gətirib çıxara biləcəyini deyən M.Zülfüqarlının sözlərinə görə, erməni serialının yayımına icazə verilməməlidir. “Baxmayaraq ki, Türkiyə NATO-nun üzvüdür. Qərb dövlətləri daim çalışır ki, erməni və PKK-kürd kartından istifadə edib Türkiyəni zəiflətsin. Çünki Qərbə güclü Türkiyə lazım deyil. Onlar bu ölkəyə marionet bir rejimin idarə etdiyi, Qərbin istifadə etdiyi marionet bir ölkə kimi baxmaq istəyirlər. Ərdoğanın faəliyyəti nəticəsində qardaş Türkiyə öz gücünü artırıb, dünyada müstəqil siyasət yeridən bir dövlət imici qazandı. Çalışırlar ki, bunu aradan qaldırsınlar. Yaxın gələcəkdə Türkiyədə sol qüvvələr hakimiyyətə gələrsə xoşagəlməz hallar arta bilər. Bu səbəbdən qardaş Türkiyə xalqı bu məsələdə ehtiyatlı olmalıdır və demokratiyanın gəlişi gözəl sözlərinə aldanmamalıdırlar. Ermənilər tarixən Türkiyəyə, qardaş türk xalqına arxadan zərbə vurublar. İndi də Qərb ölkələrinin əli ilə bunu etməyə hazırlaşırlar. Ona görə də bu məsələdə ehtiyatlı olmaq lazımdır. Belə telekanalın da fəaliyyətinə gələcəkdə məhdudiyyətlər, yaxud qadağalar qoymaq lazımdır”-deyə M.Zülfüqarlı bildirdi.
“Qərbi erməni dili” məsələsinə gəlincə, M.Zülfüqarlı bildirdi ki, bu da ermənilərin uydurmalarından biridir və mifik bir yanaşmadır. O hesab edir ki, əgər erməni serialı Türkiyədə yayımlanarsa onda bu türk dilində olmalıdır və erməni dilində subtitri getməlidir. Professor Zülfüqarlıya görə, Türkiyədə erməni dilinə bu qədər meydan vermək olmaz, çünki ermənilərin və onların Qərbdəki havadarlarının əsas məqsədi bu dildən istifadə edib təxribatlar törətməkdir. “Bu serial erməni dilində yayımlanarsa, orda nədən danışıldığını türk tamaşaçı hardan biləcək? Odur ki, əsas dil olaraq türk dili istifadə olunmalıdır. Bütövlükdə isə erməni serialının yayımına imkan verilməli deyil”-deyə müsahibimiz qeyd etdi.
O vurğuladı ki, bütün məsələlərdə Türkiyənin, türk xalqının mövqeyi nəzərə alınmalıdır.
İradə SARIYEVA
