Elçin Bayramlı: “Azərbaycanda şadlıq evlərinə qarşı etiraz, boykot olmasa daha pis vəziyyətin şahidi olacağıq”
Son vaxtlar şadlıq evləri ilə bağlı xoşagəlməz xəbərlər yayılmaqda davam edir. Məlumata görə, toy biznesində mafiyalaşma başlayıb. Belə ki, insanlar gedib toy danışır, şadlıq evi sahibinə beh verir.
Toyda iştirak üçün sevdiyi müğənninin dəvət edilməsi, dekor işinin hansısa şirkət tərəfindən işlənilməsi, tortun hazırlanmasının seçdikləri şirkətə həvalə edilməsini istədikcə sahibkar buna qarşı çıxır. Bildirirlər ki, şadlıq evində yalnız onların seçdiyi müğənni, dekor şirkəti, foto, video və digər sahələr çalışa bilər. Başqa bir yerdən nə müğəni, nə də hər hansı bir şirkət dəvət edilə bilməz. Bu isə toy sahiblərinin narazılığına səbəb olur. Əsasən də, müğənni və dekor şirkətlərinin toy sahibinin istədiyi kimi olmaması böyük bir problemə səbəb olur. İnsan var ki, övladının xeyir işində filan müğənninin iştirak etməsini istəyir, ancaq restoran buna razı olmur.
Maraqlıdır, bu problem necə həll olunmalıdır?
“Şadlıq evinin nə işinə qalıb ki, toy yiyəsinin yerinə qərar verir toyda neçə cür yemək olmalıdır, filan müğənni oxumalıdır və sair?”
Sağlam Cəmiyyət Hərəkatının rəhbəri, sosioloq Elçin Bayramlı “Bakı-Xəbər”ə şərhində bildirdi ki, şadlıq evləri artıq mütəşəkkil mafiyaya çevrilib, özləri üçün xüsusi standartlar müəyyən edib: “Hansı müğənni iştirak etməlidir, tələb və xidmətlər yalnız öz seçdikləri şirkət tərəfindən qarşılanmalıdır. İnsanlar məcbur olur ki, Azərbaycanın normal toyundan imtina edilib, həmin mafiyanın istədiyi soyğunçu bir sistemdə toy-büsat keçirilsin. Təəssüf ki, buna etiraz edənlər, qarşı çıxanlar azdır. Belə bir şəraitdə biznes strukturları xalqın soyulması, onların mədəni, mənəvi irsinin məhv edilməsi, özlərinin çox pul qazanması üçün bütün biabırçılıqları törətməkdə davam edir. Məlum problemin həll olunması üçün əhali arasında maarifləndirmə işi aparılmalıdır. Maarifləndirmə elə istiqamətdə aparılmalıdır ki, şadlıq evləri mafiyası boykot edilsin, onlardan imtina edilsin. Hər hansı bir restoranda ayrıca zalı icarəyə götürüb, toy, yığıncaq etmək olar. Həmçinin, mağar toyuna geri qayıtmaq da olar. Şadlıq evlərinin soyğunçuluğuna qarşı azı bir ay sərt mübarizə aparılsa, toylar keçirilməsə onlar elə həmin müddətdə də məhv olarlar”.
Həmsöhbətimiz xüsusi olaraq vurğuladı ki, toyun necə, hansı formada keçiriləcəyini yalnız toy sahibi müəyyən edə bilər: “Şadlıq evinin nə işinə qalıb toy yiyəsinin yerinə qərar verir ki, toyda neçə cür yemək olmalıdır, filan müğənni oxumalıdır və sair? Övladımın xeyir işində hansı müğənninin oxumasını restoran sahibi deyil, mən müəyyən etməliyəm. Şadlıq evi sahibi kimdir ki, toy yiyəsinin yerinə qərar verir? Şadlıq evi yalnız göstərdiyi xidmətin qarşılığında pul ala bilər. Bu istənilən ölkədə belədir. Mənim istəmədiyim, sevmədiyim müğənni, dekor və ya digər xidmətləri qəbul etdirmək nə deməkdir? Bu məcburiyyətin iki məqsədi var - normadan artıq pul qazanmaq və Azərbaycanın milli-mənəvi dəyərlərini məhv etmək. Nəticədə Azərbaycan cəmiyyəti həm sosial-iqtisadi, həm də mənəvi-psixoloji cəhətdən ağır zərbə alır. Bu bir növ xalqa terror sayılır. Azərbaycanda şadlıq evlərinə qarşı etiraz, boykot olmasa daha pis vəziyyətin şahidi olacağıq”.
Günel CƏLİLOVA
