Məlumdur ki, son zamanlar şəhərdə “Təlim avtomobili” adı ilə avtomobil idarə edənlər çoxdur. Qanunvericiliyə əsasən, sürücülük təlimi verən şəxslər ən azı 5 il intensiv sürücülük təcrübəsinə malik olmalı, eyni zamanda nəzəri bilikləri və psixoloji hazırlıqları yoxlanmalıdır.
Lakin reallıqda bu tələblərə əməl olunmur. Belə ki, bəzi sürücülük kurslarında təlimçilərin əksəriyyəti sadəcə taksi sürücülərindən ibarətdir və onların peşəkar təlim vermə bacarığı sual altındadır. Bu isə sözügedən sahədə nəzarətsizliyin və keyfiyyət problemlərinin olduğunu düşünməyə əsas verir.
Eldəniz Cəfərov: “Azərbaycanda sürücülərə təlimlər o qədər də peşəkarcasına, keyfiyyətlə həyata keçirilmir”
Nəqliyyat məsələləri üzrə ekspert Eldəniz Cəfərov “Bakı-Xəbər”ə şərhində bildirdi ki, qəzaların əsas səbəbi peşəkar sürücülük təlimlərinin olmamasıdır: “Sürücülük vəsiqəsi almaq istəyən hər bir şəxs mütləq qaydada sürücülük kursunda hazırlıq keçməlidir. Kursda hazırlıq keçməsi barədə verilən arayış əsasında bu şəxslər imtahana buraxılır. Qəzaları araşdıranda məlum olur ki, başlıca səbəb sürücülərin məsuliyyətsizliyidir. Bu da ondan irəli gəlir ki, Azərbaycanda sürücülərə təlimlər o qədər də peşəkarcasına, keyfiyyətlə həyata keçirilmir. Sürücülərin bir qismi avtomobili qaydalara uyğun idarə etməyi bacarmır, parklanma, yol hərəkəti qaydalarını bilmir, yol nişanlarından xəbərsizdir”.
Ekspertin sözlərinə görə, sürücülərin hazırlanması üçün mütləq bir neçə qurumun icazəsi olmalıdır: “Sürücülərin hazırlanması və ya ixtisasının artırılması Elm və Təhsil Nazirliyi tərəfindən təsdiq edilmiş, dövlət təhsil standartları əsasında razılaşdırılmış vahid tədris planı üzrə həyata keçirilməlidir”.
Fərid Həşimov: “Hər yerindən duran təlimçi ola bilməz, xüsusən bu, xanım təlimçilər arasında dəb halını alıb”
Nəqliyyat eksperti Fərid Həşimov “Bakı-Xəbər”ə şərhində bildirdi ki, təlimçilər özləri peşəkar olmalıdır: “Təlim keçmək istəyən vətəndaşlar bunu tələb etməlidirlər. Hər yerindən duran təlimçi ola bilməz. Xüsusən bu, xanım təlimçilər arasında dəb halını alıb. Özlərini təlimçi elan edirlər. Şəhərdə onların maşın sürmələrinə baxanda adam dəhşətə gəlir. Bu məsələ ciddi nəzarətə götürülməlidir”.
Günel CƏLİLOVA
