Könül İsmayılova: “Bu gün kifayət qədər boşanmalar cəmiyyətdə ailə təməllərinin, ailə institutunun sarsılmasına gətirib çıxarır”
Məlum olduğu kimi, son illərdə Azərbaycanda boşanmaların sayında artım qeydə alınır. 2000-ci ildə Azərbaycanda 5 min 478 boşanma qeydə alındığı halda, ötən il bu göstərici 19 min 597 olub. Bu isə o deməkdir ki, son 25 ildə boşanmaların sayı 3,6 dəfə artıb.
Qeyd edək ki, 25 il əvvəl – 2000-ci ildə əhalinin hər 1000 nəfərinə boşanmaların sayı 0,7 olduğu halda, ötən il 2,1-ə yüksəlib. Onu da bildirək ki, əhalinin hər 1000 nəfərinə düşən boşanmaların sayına görə Azərbaycan Avropa ölkələri arasında ilk sıralarda yer alır. Avropa Statistika Bürosunun (Eurostat) açıqladığı sonuncu məlumata görə, Avropa Birliyində əhalinin hər 1000 nəfərinə düşən boşanmaların sayı 1,6 olub. Avropa Statistika Bürosunun açıqladığı sonuncu məlumata görə, Azərbaycan boşanmaların sayına görə Avropada ilk 3-lükdədir. Bu məlumat vəziyyətin kritik həddə olduğunu bir daha göstərir.
“Bu gün ailə cütlüyü sadəcə toya qədər olan prosesi fikirləşir, sanki ondan sonrakı proses onu maraqlandırmır”
Psixoloq Könül İsmayılova baki-xeber.com-a şərhində bildirdi ki, ailə institutlarının formalaşmasına böyük ehtiyac var: “Bu gün ailə cütlüyü sadəcə toya qədər olan prosesi fikirləşir, sanki ondan sonrakı proses onu maraqlandırmır. Ailənin ilk illərində adaptasiya dövrü yaşanır. Evliliyə qədərki müddətdə bəzi xüsusiyyətləri gizlətmək mümkündür, lakin ilk üç ildə münasibətlərin görünməyən tərəfləri də ortaya çıxır. Boşanmaların təşəbbüskarlarının 60 faizi qadınlardır. Ailə deyəndə daha çox qadın başa düşürük, ailədə yükün çoxu qadınların üzərinə düşür. Boşanmalar zamanı ən böyük zərbə uşağa dəyir. 2000-ci illərə qədər ailələrin 70-80 faizi baba-nənə ilə birlikdə yaşayırdı, uşaqlar böyük ailədə tərbiyə alırdılar. Lakin indi proses dəyişib, ailələr daha çox müstəqil yaşayır. Qızlar, gəlinlər valideynlərlə birlikdə yaşamaq istəmirlər. Qadınlara bərabər hüquqların verilməsi onların öz hüquqlarını qorumasına imkan yaradır. Gündəlik məişət zorakılığına məruz qalan qadın boşanıb müstəqil şəkildə öz həyatına davam etməyə üstünlük verir”.
Həmsöhbətimiz onu da əlavə etdi ki, boşanmaların sayının artması cəmiyyətdə mənfi tendensiyaya səbəb olur: “Eyni zamanda, evli cütlüklərdə boşanmaya həvəs yaradır. Boşanmaların ən böyük fəsadlarından biri odur ki, bu gün kifayət qədər boşanmalar cəmiyyətdə ailə təməllərinin, ailə institutunun sarsılmasına gətirib çıxarır. Bu isə mənfi təcrübəyə səbəb olur. Boşanma ilə bağlı qaydalar dəyişməsə vəziyyət daha da pisləşəcək”.
Günel CƏLİLOVA
