Qəhrəmanlıq salnaməsini yazan igid
44 günlük haqq savaşımızda Vətəni canından əziz tutub onun yolunda şəhid olan qeyrətli oğullardan biri də 1997-ci il mayın 21-də Cəlilabad şəhərində dünyaya göz açan, Qum Ali Dini Elmi Hövzəsinin Cameətul-Mustafa Beynəlxalq İslam Elmləri Akademiyasının Təbriz filialının tələbəsi, ilahiyyatçı Maarif Səfərovdur. Bu ölümsüzlüyə qovuşan Vətən sevdalısı cismən aramızdan getsə də, Azərbaycan xalqı onu öz ürəyində yaşatmaqla hər yerdə, həmişə böyük ehtiramla yad edir. Layiq görüldüyü Cəbrayılın, Qubadlının azadlığına görə, "Vətən uğrunda", "Cəsur döyüşçü" medalları və “Vətənə xidmətə görə” ordeni şəhid Maarif Səfərovun çətin müharibə meydanında göstərdiyi rəşadətə gözəl nümunədir.
Maarif Mikayıl oğlu Səfərov özünü bilən gündən həyatının mənasını Vətəninə, xalqına təmənnasiz xidmətdə görüb. Amalı düzlük, halalıq olan Maarifi xeyirxah əməllərinə görə el ürəkdən sevib, ona hörmət bəsləyib. Ağıllı, zəhmət sevər bir gənc olaraq hamının işinə yarayıb, həyatını xalqa, Vətənə layiqli övlad kimi yaşayıb.
Düşmənə əsir düşən Qarabağın dərdi də Maarifi gecə-gündüz narahat edib. Erməni qəsbkarların işğal etdikləri Vətən torpaqların hər qarışı uğrunda döyüşə hazır olub. Həmçinin hələ Murov dağında həqiqi xidmət zamanı komandiri olan general-mayor Polad Həşimovun şəhid olması xəbəri Maarifi çox sarsıdıb. Odur ki, Vətənin ağır günlərində öz yerini cəbhə bölgəsində görən vətənpərvər gənc Tovuz istiqamətində mənfur düşmənin növbəti təxribatı zamanı könüllü olaraq cəbhəyə getmək üçün Səfərbərlik və Hərbi Xidmətə Çağırış üzrə Dövlət Xidmətinə müraciət edib.
Maarifin bu arzusu reallaşıb. Əsgərlik dövründə öz bacarığı hesabına hərbin sirlərinə yiyələndiyi üçün bir başa səngərə yollanıb, əzəli yurd yerimiz Qarabağın son qarış torpağının azad olunacağı günədək düşmənlə döyüşəcəyinə and içib.
İkinci Qarabağ müharibəsi başlanan gündən igid döyüşçü yağıya qan qusdurub. Hər zəfərdən sonra onun qəlbində erməni dığalardan intiqam, qisas almaq alovu get-gedə güclənib. Döyüşdən-döyüşə mərdliyi, qəhrəmanlığı ən ağır savaşda əsgər yoldaşlarını qələbəyə aparıb.
Çox rayonların azadlığı uğrunda gedən vuruşlarda birbaşa iştirak edib, düşmənə layiqli cavab verib. Neçə-neçə ölüm-dirim sınaqlardan qalib çıxan qəhrəman oktyabrın 21-də Qubadlı istiqamətində gedən müharibədə yağı gülləsinə tuş gəlib, 23 yaşında əbədiyyətə qovuşub.
Zəfər ORUCOĞLU,
Azərbaycan Jurnalistlər Birliyinin üzvü
