Rizvan Fikrətoğlu: “Zəif maliyyələşən məktəblər rəqabətə girə bilməyəcəklər və bu, təhsilin keyfiyyətinə birbaşa təsir edəcək”
Son zamanlar orta məktəblərin publik hüquqi şəxsə çevrilməsi ilə bağlı müzakirələr gedir. Belə bir addım atılarsa, bundan sonra məktəblər arasında daha ciddi və sağlam rəqabətin gedəcəyini proqnozlaşdıranlar az deyil.
Maraqlıdır, bu halda məktəblərin rəhbərlərinin əlavə vəsait əldə edə bilmək üçün düzgün idarəetmə mövqeyi seçə biləcəyinə, məktəblərin rəqabətədavamlılığı itirmək təhlükəsi ilə üzləşməyəcəyinə təminat varmı?
“Bu qərar məktəbin idarə olunması, maliyyələşməsi və fəaliyyət mexanizmlərində mühüm dəyişikliklərə gətirib çıxaracaq”
Təhsil eksperti Rizvan Fikrətoğlu “Bakı-Xəbər”ə açıqlamasında qeyd etdi ki, Azərbaycanda məktəblərin publik hüquqi şəxsə çevrilməsi prosesinin başlanğıcı rəsmi formada 2024-cü ilin iyun ayında qoyulub. Bununla bağlı Nazirlər Kabinetinin qərarı ilə “Dövlət və bələdiyyə tərəfindən yaradılan ümumi təhsil müəssisəsinin Nümunəvi Nizamnaməsi” təsdiqlənib: “Nümunəvi Nizamnaməyə əsasən, ümumi təhsil müəssisəsi ictimai əhəmiyyət daşıyan fəaliyyətlə məşğul olan ibtidai, ümumi orta və tam orta təhsil səviyyələri üzrə ümumi təhsil proqramlarını, habelə məktəbəhazırlığı həyata keçirən publik hüquqi şəxs hesab olunacaq. Bu o deməkdir ki, məktəblər dövlətin tərkib hissəsi olaraq fəaliyyət göstərən qurumdan çıxaraq, müstəqil hüquqi şəxs statusu alacaq. Bu qərar məktəbin idarə olunması, maliyyələşməsi və fəaliyyət mexanizmlərində mühüm dəyişikliklərə gətirib çıxaracaq. Onlar publik hüquqi şəxs kimi dərnəklər, məşğələlər təşkil edə, innovativ fəaliyyətlə, sahibkarlıq işi ilə məşğul olmaq imkanları əldə edə bilərlər. Məktəblərin publik hüquqi şəxsə çevrilməsi onlar arasında rəqabəti artıra bilər. Məktəblər büdcələrini idarə etmək və daha yaxşı nəticələr əldə etmək üçün yeniliklər tətbiq edə bilərlər. Həm də işçi heyəti zamanın innovativ tələblərinə uyğunlaşa biləcək. Ancaq digər tərəfdən, bu rəqabətə başlamaq üçün məktəblərin bərabər şəraitdə olmasına və əhəmiyyətli maliyyə resurslarına sahib olmalarına ehtiyac olacaq. Əks halda, zəif maliyyələşən məktəblər rəqabətə girə bilməyəcəklər və bu, təhsilin keyfiyyətinə birbaşa təsir edəcək. Düşünürəm ki, bu proses heç də tez və asan başa gəlməyəcək. Bu, uzunmüddətli prosesdir, yaxın perspektivdə müsbət nələrsə vəd etmək çətindir. Publikləşmə, ilk növbədə, pilot olaraq başladılmalıdır. Uğurlu olarsa, prosesin davamı olmalıdır. Burada müəllimlərin yüksək əmək haqqı vədi də var. Əsas məsələlərdən biri də düzgün sistemin qurulmasıdır”.
Günel CƏLİLOVA
