Bu il ölkədə baş vermiş təbii və texnogen mənşəli hadisələr nəticəsində 17 nəfər həlak olub, 43 nəfər xəsarət alıb. Fövqəladə Hallar Nazirliyindən (FHN) Trend-ə verilən xəbərə görə, 2015-ci ilin I rübü ərzində respublika ərazisində 1386 təbii və texnogen mənşəli hadisə baş verib ki, bu da 2014-cü ilin I rübü ilə müqayisədə 747 hadisə və ya 35% azdır.
Nazirliyin xilasediciləri tərəfindən 22 nəfər xilas edilib, 249 nəfər təxliyə olunub.
2015-ci ilin ilk 3 ayı ərzində baş vermiş yanğın hadisələri zamanı 16 nəfər həlak olub, 34 nəfər xəsarət alıb. Bu da ötən ilin I rübü ilə müqayisədə yanğından xəsarət alanlar üzrə 6 nəfər və ya 21% çoxdur. Yanğınların söndürülməsi zamanı 5 nəfər xilas edilib, 233 nəfər təhlükəsiz ərazilərə təxliyə olunub.
2015-ci ilin I rübü ərzində baş vermiş yanğınların aradan qaldırılması üçün daxil olmuş müxtəlif çağırışlar üzrə operativ olaraq 1336 çıxış edilib. Onlardan 396 çıxış çoxmənzilli yaşayış binalarında və fərdi yaşayış evlərində, 429 çıxış açıq sahələrdə, 83 çıxış nəqliyyat vasitələrində, 428 çıxış isə digər yanğınlar üzrə təşkil edib.
2015-ci ilin ilk 3 ayı ərzində ölkədə baş vermiş partlayışlar zamanı 1 nəfər həlak olub, 9 nəfər xəsarət alıb. Fövqəladə Hallar Nazirliyindən verilən xəbərə görə, 2015-ci ilin I rübü ərzində respublika ərazisində 7 partlayış hadisəsi baş verib ki, bu da 2014-cü ilin I rübü ilə müqayisədə 9 hadisə və ya 56% azdır.
Xəbər xidməti
