Son günlər kolbasalarla bağlı xoşagəlməz məlumatlar yayılmaqdadır. Bir neçə gün əvvəl "SAB" şirkətinin kolbasasından dəmir parçası çıxdığı haqda iddialar və müvafiq fotolar yayıldı. Ardından isə “Halal Zəhmət” firmasının kolbasasından dəmir parçası çıxması ilə bağlı məlumat yayıldı.
Sosial şəbəkədə aparıcı Nübar Əbil yazaraq bunları qeyd edib: “Almayın, ailənizə, uşaqlarınıza verməyin. Görün bizim kolbasalar hansı şəraitdə, necə iyrənc vəziyyətdə ərsəyə gəlir. Bu kolbasanın artıq yarısı yeyılıb, bu məsələyə görə “Halal Zəhmət” firması heç məsuliyyət daşıyırmı. kolbasanın içindən dəmir parçası çıxdı”.
Qeyd edək ki, kolbasa və sosis məhsullarının tərkibi ilə bağlı son zamanlar şikayətlər çoxdur. Təkcə bu iki fakt yeni deyil. İndi isə kolbasaya ət də yox, metal qatıldığı üzə çıxmaqdadır. Belə bir iddia səslənir ki, kolbasa istehsalı ilə məşğul olan şirkətlər çəkinin ağır gəlməsi üçün bilərəkdən məhsulun tərkibinə dəmir kimi ağır metallar qoyurlar.
Maraqlıdır, son zamanlar kolbasa istehsalında nə baş verir ki, bu kimi xəbərlər yayılır?
“SAB” şirkəti: “Son dövrlərdə “SAB” brendinə olan alıcı marağının artması rəqib şirkətlərin qərəzli yanaşmasına səbəb ola bilər”
Məsələ ilə bağlı "SAB" şirkətindən bildirildi ki, bu, şirkətə qarşı planlaşdırılmış qara piar kampaniyasıdır: "Aprelin 4-də saat 12 radələrində “Facebook” sosial şəbəkəsində fəaliyyət göstərən “Xoşbəxt Qadınlar Klubu” adlı qrupda naməlum şəxs tərəfindən şirkətimizin istehsalı olan “Səyyah” kolbasa məhsulu ilə bağlı əsassız və təxribat xarakterli paylaşım edilib. Paylaşımda məhsulun tərkibindən guya yad cismin – dəmir parçasının çıxması iddia olunub və bu barədə bəzi fotoşəkillər əlavə edilib.
Bildiririk ki, kolbasa məhsulunun istehsal texnologiyası belə bir halın yaranmasını mümkünsüz edir. Belə ki, kolbasa istehsalı zamanı ət və ədviyyatlar birlikdə qarışdırılaraq farş halına salınır, daha sonra isə bu qarışıq xüsusi qlaflara doldurulur. Bu prosesdə kütlənin içində böyük ölçülü bir dəmir parçasının qalması texnoloji baxımdan mümkünsüzdür. Hazırda məsələ araşdırılır. Son dövrlərdə “SAB” brendinə olan alıcı marağının artması rəqib şirkətlərin qərəzli yanaşmasına səbəb ola bilər. Qeyd olunan məhsulun istehsal tarixi müəyyənləşdirildiyi halda, həmin partiyadan olan məhsulların laborator analizlərinin aparılmasına və nəticələrin ictimaiyyətə açıqlanmasına tam hazırıq. Şirkətimiz daim şəffaflıq prinsipinə sadiqdir və istehlakçılara açıq qapı günləri vasitəsilə istehsal prosesini izləmək imkanı yaratmaqda davam edir”.
Eyyub Hüseynov: “Kolbasa sosis texnologiyasında məhsulun içərisinə o cür kənar cisimlərin düşməsi tam istisna olunur”
Azad İstehlakçılar Birliyinin (AİB) sədri Eyyub Hüseynov “Bakı-Xəbər”ə şərhində bildirdi ki, 2013-cü ildə Amerikadan olan bir beynəlxalq təşkilat, Azərbaycanın Ümumdünya Ticarət Təşkilatına daxil olması ilə bağlı ölkədə “Azərbaycan mallarının rəqabətə davamlılıq” layihəsini həyata keçirirdi. Bu, 5 illik bir layihə idi. Layihənin sonunda həmin beynəlxalq qurum Azad İstehlakçılar Birliyinə, istehlakçıların böyük inamını və kütləvi informasiya vasitələri ilə sıx əməkdaşlığnı nəzərə alaraq bizə müraciət etdilər ki, Azərbaycan istehlakçılarının qida təhlükəsizliyi nişanını müəyyən edək: “Beynəlxalq və yerli ekspertlərin köməyi ilə bu nişanı bəzi məhsullara tətbiq edək ki, istehlakçılar həmin mallara üstünlük versinlər. Biz əməkdaşlarımızla birlikdə rəy sorğuları keçirdik. Sonra nişan dövlət qeydiyyatına alındı. Dövlət orqanlarına məlumat verildi. Biz 5 müəssisəyə, o cümlədən SAB və Zəhmət Ruzi adlanan şirkətlərə həmin nişanı verdik. Hazırda SAB məhsullarının, xüsusilə süd məhsullarının üzərində “Azad İstehlakçılar Birliyi” tərəfindən təsis olunmuş “Qida Təhlükəsizliyi Nişanı” var. Həmin nişanın tələblərinə əsasən, mütləq ildə bir dəfə orada monitorinq, qiymətləndirmə aparılmalıdır”.
Ekspert onu da əlavə etdi ki, birlikdə kolbasa nümunələrinin içindən insan dişi, dırnaq, tük və.s. çıxması hallarına rast gəlinib.Amma dəmir çıxması artıq çox qeyri-adi bir haldır: “Bu günlərdə araşdırma apardıq və tam əmin olduq ki, kolbasa istehsalında onun tərkibinə dəmir düşməsi tan istisna olunur. Çünki həmin müəssisədə metal detektor var. Yəni malın tərkibində metal elementi varsa onu qırağa qoyub, müəyyən edir. Ümümiyyətlə, kolbasa sosis texnologiyasında məhsulun içərisinə o cür kənar cisimlərin düşməsi tam istisna olunur. Araşdırma göstərir ki, bu hal digər biznes qurumlarında olduğu kimi bazarda rəqəbatda olan şirkətlərin işidir. Çox vacibdir ki, həmin şikayətçi tapılsın, mal götürülsün. Təəssüflər olsun ki, SAB şirkəti bu məsələyə birmənalı işıq gətirməyib, susqunluq göstərir. Biz birlik olaraq hesab edirik ki, həmin şikayətçi üzə çıxmalıdır. Onu da deyim ki, vaxtilə elə hallar olub ki, bəzi “şikayətçilər” çörək istehsalçısını şantak edib, ondan pul alırdı. Biz bu cür insanları da ifşa etdik. Təəssüf ki, belə hallar bu gündə var. Bir daha qeyd edim ki, kolbasanın içinə dəmirin düşməsi tam istisna olunur”.
“Halal Zəhmət” firmasının instagram hesabında qeyd edilən nömrə ilə saxladıq. Dəstəyi açan əməkdaş bizə bildirdi ki, rəhbərlik bizimlə əlaqə saxlayacaq, o bu barədə danışa bilməz.
Günel CƏLİLOVA
