“Biz də istərdik ki, Azərbaycan da xaricdən bal idxalını dayandırsın. İdxal dayandırılsın ki, həm daxili istehsal qorunsun və satış stimullaşdırılsın, həm də ixraca dəstək olsun. Ümumiyyətlə, balın xaricə ixracına çox güclü yer vermək lazımdır. Bazarların araşdırılması, Azərbaycan balının tanıdılması və sair işlər görülməlidir”. Bu sözləri Azərbaycan Arıçılar Assosiasiyasının sədri Bədrəddin Həsənov deyib.
Qeyd edək ki, Azərbaycana əsasən Rusiyadan bal idxal olunur. Rusiyada böyük əkin sahələri var və o sahələrdə kütləvi bal istehsal olunur. Ancaq mütəxəssislər bildirir ki, bu balın keyfiyyəti bizim təbiətdən yığılan balın keyfiyyətinə çatmır. Rusiyadan gətirilən bal daha ucuz başa gəlir.
Ekspertlər bildirir ki, işğaldan azad edilmiş ərazilərdə arıçılığın inkişafı üçün böyük potensial mövcuddur. Növbəti illərdə yerli bal istehsalının artımı müşahidə olunacaq. Bu səbəbdən də bal idxalına məhdudiyyət qoyulması təklif olunur.
Maraqlıdır, ölkəyə bal idxalı dayanmalıdırmı? Ümumiyyətlə, xaricdən gətirilən balları keyfiyyətli hesab etmək olarmı?
“Yoxlanmış ballar uyğun qiymətlərə marketlərdə satılarsa, qiymət aşağı düşər və xarici ballar rəqabətə davam gətirməz”
“Azad İstehlakçılar” İctimai Birliyinin (AİİB) sədri Eyyub Hüseynov bildirdi ki, Azərbaycan bal istehsalçıları elə etməlidir ki, ballar keyfiyyətli olsun və qiymətlər aşağı düşsün: “Azərbaycan bazarı dünya bazarına inteqrasiya olunmuş bazardır, üstəlik istehlakçıların seçim hüququ var ki, hansı ölkədən istəsələr, ballarını almaq şansları olsun. Hökumətin də öhdəliyidir ki, bu seçim hüququnu təmin etsin”.
Birlik sədrinin sözlərinə görə, arıçıları yüksək qiymətlərdən qorumaq üçün iş aparılmalıdır: “Üstəlik, arıçıları bir çox bəlalardan, yəni qiymət məsələsindən xilas etmək üçün Bədrəddin Həsrətov marketlərdə iş aparsın. Belə ki, arıçılardan biri mənə dedi ki, marketə balımı yerləşdirmək üçün bir şəbəkə əvvəlcədən 18 min manat nağd pul istədi. Məhz marketlər balı özləri pul əlavə etməklə satışını etsinlər, oradan qazanclarını götürsünlər, lakin bəri başdan balı satmaq işi üçün bal istehsalçılarını puldan azad etsin. Çünki bu, balın qiymətinə təsir edir, əhali ona görə haradan gəldi bal alır. Yoxlanmış ballar uyğun qiymətlərə marketlərdə satılarsa, qiymət aşağı düşər və xarici ballar rəqabətə davam gətirməz”.
Günel CƏLİLOVA
