44 gün davam edən, zəfərimizlə başa çatan Vətən müharibəsində Astaralı igidlər də böyük hünər göstəriblər. Rayon sakinləri Vətən torpaqlarının azadlığı naminə canındən keçən oğulları ilə fəxr edir, onların xatirəsini həmişə əziz tuturlar. Rayonun Alaşa kənd sakini şəhid Telman Təyyar oğlu Nehmətov və Məscid-məhəllə kənd sakini şəhid Nail Rəfail oğlu Orucov da qanı ilə tarix yazaraq öz millətinin şərəfini, ləyaqətini uca saxlamışlar.
Rayonda hər iki şəhidin xatirəsinə həsr olunmuş mərasim keçirildi. Rayon icra hakimiyyətinin başçısı Qəzənfər Ağayevin, Milli Məclisin deputatı, YAP İdarə Heyətinin üzvü Rəşad Mahmudovun və rayon ictimaiyyətinin tanınmış nümayəndələrinin qatıldığı tədbirdə əvvəlcə ölkəmizin ərazi bütövlüyü uğrunda şəhidlik zirvəsinə ucalan qəhrəman Vətən övladlarının xatirəsi bir dəqiqəlik sükutla yad olundu.
Çıxışlarda hər iki şəhidin keçdiyi döyüş yolundan qürurla danışıldı, onların Vətən qarşısındakı misilsiz xidmətləri dilə gətirildi və keçdikləri şərəfli həyat yolları gənclərə örnək olduğunu bildirdilər. Daha sonra hər iki şəhidin valideynlərinə başsağlığı verən çıxışçılar, şəhidlərin xatirələrinin daim ürəklərdə yaşayacağını dedilər.
Tədbir çərçivəsində şəhid Nail Orucovun döyüş rolundan bəhs edən kitabın təqdimatı da keçirildi.
Zəfər ORUCOĞLU Azərbaycan Jurnalistlər Birliyinin üzvü
