Bakı şəhəri, Nərimanov rayonu, Arif Heydərov 6, mənzil 24 ünvanında yaşayan Əhmədov Ulduz Əhməd oğlu xərcəng xəstəliyindən əziyyət çəkir. U.Əhmədov “Bakı-Xəbər” TV-də yayımlanan “Düz kəsir” verilişinin canlı yayımında bildirdi ki, xərcəng xəstəsi olmasına baxmayaraq, bir neçə ay əvvəl pensiyası kəsilib, lakin əlaqədar qurumlara çoxsaylı müraciətlərindən sonra pensiyası bərpa olunsa da, aradakı bir necə aylıq pensiyasını ala bilmir, pensiyası it-bata düşüb.
İkinci dərəcəli əlil olduğunu deyən U.Əhmədov “Bakı-Xəbər” TV vasitəsilə Azərbaycan Prezidentinə və Əmək və Əhalinin Sosial müdafiəsi naziri Sahil Babayevə müraciət edərək bildirib ki, cari ilin aprel ayında birdən-birə onun əlilliyi dayandırılıb: “Özü də mən onkoloji xəstəyəm, hazırda xəstəliyim də çox ağırlaşıb, kimya terapiya qəbul edirəm. Aprel ayında əlilliyim dayandı və mənə “Dost” mərkəzindən “şanlı məktub” gəldi ki, sizin əlilliyiniz dayandırılıb, sizi yaşa görə müavinətə keçirmişik. Mənə bildirdilər ki, sizə yaşa görə 200 manat pensiya təyin edilib. Məni yaxınlarım “Dost” mərkəzinə apardılar və orada da yaşa görə müavinətdən imtina etdim. Çünki mən əlilliyə görə 259 manat alırdım, amma bunlar mənə 200 manat pensiya kəsmişdilər. Orada mənə dedilər ki, ərizə yazıb imtina edin, mən də ərizə yazıb imtina etdim. Bildirdilər ki, gedin yenidən komissiyadan keçin. Bu da təxminən üç-dörd ay çəkdi, senyabr ayında əlilliyim bərpa olundu. Ötən 4 ay müddətində mənim əlilliyə görə müavinətimi vermədilər. Yəni mənim əlilliyim bərpa edilsə də, hazırda müavinət alsam da, arada qalan o 4 ayın pulunu ala bimirəm. “Dost” mərkəzinə gedirəm, deyirlər ki, bəli, Prezidentin əmri var, ancaq Nazirlər Kabineti hələ bunu təsdiq etməyib. Belə çıxır ki, mən aprel ayında onkoloji xəstəlikdən tam “sağalmışam” və sentyabr ayında bir də yenidən xəstələnmişəm. Bu belə çıxır. 4 ay müddətində mən “sağlam” olmuşam. Halbuki, mənim mədəmi, qida borumu çıxarıblar. Hamı bilir ki, onkoloji xəstəlikdən insanlar nə qədər əziyyət çəkir. İndi mənim 4 aylıq pulumu vermirlər. Mən hörmətli Prezidentimizə, hörmətli nazirimiz Sahil Babayevə üz tuturam: sizin göstərişinizlə 6 ay müddətinə həmin o pullar verilməlidir. Onu da vermirlər. Mənə veriləcək məbləğ 800-1000 manata qədər pul edir. Əgər bu pulun respublikanın bir yarasına xeyri olacaqsa imtina da edə bilərəm, heç verməsinlər. Ancaq haqqımı da tələb edirəm ki, cənab Prezidentimiz deyib 6 ay müddətinə pulu verin, çünki sənədləşmə çox uzun çəkir. Bu qapıdan o qapıya, o qapıdan bu qapıya...elə olmaz. Düzdür, onların da sözündə həqiqət var ki, yalandan pensiya alanlar da olur. Ancaq həqiqi xəstələri o birilərin gözünə qatmaq düzgün deyil. Mən bunu heç cür qəbul edə bilmirəm ki, həqiqi xəstəyə belə münasibət olur. Onda həqiqi xəstələr də inciyir ki, məni niyə buna görə incidirsən? Mənə ömürlük əlillik verilmişdi. Qolu amputasiya olunanın təzədən qolu bitməyəcək ki? Mənim də mədəm tam çıxarılıb”.
Şikayətçinin sözlərinə görə, mədə implantasiyası da dünyada yoxdur, mədə implantasiyası mümkün olsaydı, ev-eşiyini satıb onu etdirərdi. U.Əhmədov qeyd edib ki, xəstəliyinin get-gedə irəliləməsi onun çəkisinə də ciddi təsir göstərib, 105 kq-dan 57 kq-a düşüb. “Çox əziyyət çəkirəm. Qan yaranmır, yemək yeyə bilmirəm, dava-dərmanla ayaqda dururam. Mən ağır vəziyyətdə olduğum halda 4 aylıq pensiyamı vermirlər. Yaxşı, verməyin, ancaq mən bilim ki, o pul hara sərf olunur və hansısa bir əsgərimizin dərdinə, qazimizin yarasına dava olur. Amma qazilərə də onu vermirlər. Əgər elədirsə eybi yox, mənə verməyin, onsuz da mən beş-üç günün qonağıyam. Prezidentin əmri var ki, 6 ay müddətinə camaatın pulunu verin. Vermirlər. Zəng edirəm nazirliyə, bütün şöbələrin də hərəsində bir qız var, telefonu götürüb adamları ancaq yola verirlər. Əvvəllər 259 manat aldığım halda indi 186 manat alıram. 259 manatı kəsib 186 manat ediblər. Vəziyyətimin ağırlığına görə mənə birinci dərəcəli əlillik düşür, amma dedilər ikinci dərəcəni verək, metaztazlarının sayı çoxalarsa gələrsən birinci dərəcə verərik. Metastazların sayı çoxlandan sonra isə 1-2 ayın qonağı olursan, nə mənası var ki, insanlara əziyyət verirlər. Cənab Prezidentə üz tutub demək istəyirəm ki, sizin verdiyiniz sərəncamlar yerində icra olunmur. Xalqı Prezidentin üstünə niyə qaldırırlar, niyə? Prezidentimiz deməyib ki, sən onkoloji xəstənin 4 aylıq pulunu vermə. Göstəriş verib ki, 6 ay müddətinə boş keçən ayların pulu qaytarılmalıdır...”-deyə şikayətçi Ulduz Əhmədov bildirdi.
Fərəc Quliyev: “Doğru yanaşmadır ki, əgər xəstənin 4 aylıq pulu kəsilibsə bu ödənilməlidir”
“Bakı-Xəbər” TV-nin qonağı olan sabiq millət vəkili Fərəc Quliyev ağır xərcəng xəstəsi olan U.Əhmədovun vəziyyətinə münasibət bildirib. “...Xəstəlik insan üçündür. Allahdan da ümid üzülməz. Hesab edirəm ki, belə xəstələri, ümumiyyətlə, haqqı olanları incitmək düzgün deyil. Bu problemi gətirib bu səviyyəyə çatdıran məmurlar heç düşünürlərmi bu haqda? Adamın haqqı olan pulunu vermirsən, adam narazıdır. İndi bu canlı yayımda xeyli adam onun problemini eşitdi. Bu inamsızlıq dövlətə qarşı münasibətin soyumasına səbəb olan haldır. Yəni belə halları yaradan məmurlar bir az məsuliyyət hiss etməlidir. Düzdür, Ulduz bəy özü də dedi ki, xeyli adamlar saxta əlillik müavinəti alırlar. Bu da az deyil, xeyli adamları müəyyənləşdiriblər. Saxta əlilliklə mübarizə davam etməlidir. Bu əslində dövlətdən oğurlamaqdır, sağlam ola-ola işləmir və vəsait alır. Müəyyənləşdirəndə ki, bu xəstədir, onun pulunu yubatmaq olmaz. Doğru yanaşmadır ki, əgər xəstənin 4 aylıq pulu kəsilibsə bu ödənilməlidir. Nə üçün şikayət edilməlidir?” deyə sabiq millət vəkili qeyd etdi.
İradə SARIYEVA
