Məcburi Köçkünlərin Sosial İnkişaf Fondu (MKSİF) Sumqayıt şəhəri ərazisində birinci mərhələdə 1242 məcburi köçkün ailəsi üçün zəruri sosial-texniki infrastrukturu olan yeni yaşayış məhəlləsinin tikintisi məqsədilə açıq tender keçirib. Tenderin qalibi olan “Diadem” QSC 43 milyon AZN məbləğində vəsaiti layihənin icrasına sərf edəcək.
Məlumdur ki, 44 günlük Vətən müharibəsində Ali Baş Komandan İlham Əliyevin rəhbərliyi altında Azərbaycan Ordusunun əldə etdiyi zəfər nəticəsində torpaqlarımız düşmən işğalından azad edilib. Müharibədən sonra Prezident İlham Əliyev dəfələrlə bəyan edib ki, işğaldan azad edilən rayonlar bərpa ediləcək, həmin ərazilərə yenidən həyat qayıdacaq, məcburi köçkünlər yenidən öz dogma yurdlarına qayıdacaq. Hətta azad edilən rayonların bərpası ilə bağlı xüsusi dövlət proqramları hazırlanır. Maraqlıdır, torpaqlar işğaldan azad edildikdən sonra məcburi köçkünlər üçün Sumqayıtda 43 milyon AZN-ə başa gələcək yeni yaşayış məhəlləsinin inşa edilməsinə ehtiyac varmı?
“Bu məbləğlə işğaldan azad edilmiş rayonların 3-4 kəndini yaşayış üçün yararlı vəziyyətə gətirmək olar”
Sosial sahə üzrə ekspert İlqar Hüseynli bildirdi ki, qarşıya qoyulmuş əsas məqsədlərdən biri işğaldan azad edilmiş ərazilər bərpa edildikdən sonra məcburi köçkünlərin öz yurdlarına qayıtmasıdır: “Bu istiqamətdə dövlət tərəfindən lazımi işlər görülür. Məcburi köçkünlər üçün Sumqayıtda 43 milyon AZN-ə başa gələcək yeni yaşayış məhəlləsinin inşa edilməsi anlaşılan deyil. Bu vəsait 1242 ailə arasında bölüşdürülsə 35 minə yaxın vəsait edir. Bu məbləğlə işğaldan azad edilmiş rayonların 3-4 kəndini yaşayış üçün yararlı vəziyyətə gətirmək olar”.
Həmsöhbətimizin sözlərinə görə, 44 günlük müharibədən sonra infrastruktur layihələri işğaldan azad edilmiş torpaqların bərpasına yönəldi: “Hətta məcburi köçkünlər olan qəsəbələrlə bağlı belə bir fikir yaranmışdı ki, onlar öz torpaqlarına qayıtdıqdan sonra məcburi köçkünlər üçün olan binalar, evlər qazilərə və şəhid ailələrinə verilsin. Belə bir vəziyyətdə məcburi köçkünlər üçün yeni binanın inşası cəmiyyətdə narazılığa səbəb olacaq”.
Ekspert hesab edir ki, Məcburi Köçkünlərin Sosial İnkişaf Fondu Sumqayıt şəhərində məcburi köçkünlər üçün yeni yaşayış məhəlləsinin inşasının birinci mərhələsi üçün böyük məbləğdə vəsait ayırırsa, bu anlaşılan deyil: “Hesab edirəm ki, bu məsələ ya koordinasiyanın, ya da hesabatlılığın olmamasından irəli gəlir. İstənilən halda, məcburi köçkünlər üçün yeni yaşayış yerlərinin salınması birmənalı olaraq həm siyasi, həm iqtisadi, həm də strateji cəhətdən azad edilmiş torpaqlarımızda olmalıdır.
Günel CƏLİLOVA
