Lerik rayonunda 44 günlük İkinci Qarabağ müharibəsində doğma Vətən torpaqlarının hər qarışı uğrunda hünərlə döyüşərək əsl qəhrəman kimi şəhidlik zirvəsinə ucalan Təbriz Məhərrəm oğlu Talıbovun il mərasimi keçirildi. Mərasimdə Lerik Rayon İcra Hakimiyyətinin başçısının səlahiyyətlərini icra edən Cəlil Baxşiyev, aparatının məsul işçiləri hüquq-mühafizə orqanlarının rəhbərləri, Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin rəisi, şəhid ailələri, müharibə iştirakçıları, rayon sakinləri şəhidin məzarını ziyarət edilib üzərinə gül dəstələri düzdülər.
Ziyarətçilər şəhidin ailəsində də oldular. Ata-anaya Təbriz kimi mərd, igid, Vətənə bağlı oğul tərbiyə etdikləri üçün təşəkkür etdilər, ailənin qayğı və problemlərini ətrafı öyrəndilər. Söhbət zamanı bir daha RİH başçısının səlahiyyətlərini icra edən Cəlil müəllim bildirdi: - Müzəffər Ali Baş Komandan Cənab İlham Əliyevin rəhbərliyi altında Böyük Zəfərlə başa çatan Vətən müharibəsi Azərbaycan xalqının igidliyini və əyilməz ruhunu nümayiş etdirdi. Azərbaycanın müqəddəs parçası olan Qarabağın azad olunması üçün mənfur düşmənin üzərinə yeriyərək Vətənin müdafiəsi uğrunda canından, qanından keçən igid Vətən oğlanların qanı yerdə qalmadı. Yağı düşməndən qisas döyüş meydanında layiqincə alındı. Vətən, torpaq naminə qan tökənlər heç vaxt unudulmaz, onların əziz xatirəsi xalq tərəfindən həmişə minnətdarlıqla anılacaq. Məhz Təbriz də belə bir müqəddəs, şərəfli yolda şəhid oldu. Odur ki, xalqımız var olduqca, o da ürəklərdə yaşayacaq.
Onu da qeyd edək ki, Təbriz Talıbov 1994-cü ildə Lerik rayonunun Ləkər kəndində anadan olmuşdur. 2012-ci ildə ordu sıralarına çağırılmış və xidmətini başa vurduqdan sonra yenidən, yəni 2014-cü ildən Dövlət Sərhəd Xidmətinin Sərhəd Qoşunlarında kiçik çavuş rütbəsində doğma Azərbaycanın keşiyində durur. İkinci Qarabağ müharibəsində Ağdam, Cəbrayıl, Zəngilan istiqamətində gedən döyüşlərdə böyük hünər göstərir. Zəngilanın Ağbənd kəndində düşmən gülləsinə tuş gəlir. Son anda canını qurban verir ki, təki Vətən yaşasın. Bu qəhrəmanlığı dövlət tərəfindəndə də ölümündən sonra “Vətən uğrunda”, “Zəngilan azad olunmasına görə” medalları və 3-cü dərəcəli “Vətənə xidmətə görə” ordeninə layiq görülür.
Zəfər ORUCOĞLU Azərbaycan Jurnalistlər Birliyinin üzvü
