“İnkişaf etmiş ölkələrdə dövlət ümumiyyətlə kömək etmir, bütün evlər sığortalıdır, vətəndaş sığortanı ödəyir, zəlzələ olandan sonra sığorta şirkətinə müraciət edir”. Bunu Prezident İlham Əliyev zəlzələnin fəsadlarının aradan qaldırılması ilə bağlı görülən işlərlə tanışlıq məqsədilə Şamaxıda səfərdə olarkən deyib.
Ölkə başçısının sözlərinəgörə, digər ölkələrdən fərqli olaraq, yalnız Azərbaycanda zəlzələnin yaratdığı fəsadlar tez bir zamanda aradan qaldırılır: “Onu da deməliyəm ki, ancaq Azərbaycanda bu işlər bu qədər qısa müddət ərzində görülür. Hər yerdə zəlzələ, daşqın olur. İnkişaf etmiş ölkələrdə dövlət ümumiyyətlə kömək etmir, bütün evlər sığortalıdır, vətəndaş sığortanı ödəyir, zəlzələ olandan sonra sığorta şirkətinə müraciət edir. Onlar baxırlar, təhlil aparırlar. Aylarla vaxt keçir, sonra da ona sığorta pulu verilir, gedir özü tikir. Amma Azərbaycanda necədir? Zəlzələdən bir gün sonra komissiya gəldi, Fövqəladə Hallar Nazirliyi, icra hakimiyyəti. Ona görə bu bir daha göstərir ki, Azərbaycan dövləti Azərbaycan vətəndaşının yanındadır, onun arxasındadır və ağır vəziyyətə düşən vətəndaş hər zaman bilməlidir ki, dövlət ona kömək edəcək. Görülən işlər, bax, budur”.
Görünən odur ki, bu kimi fövqəladə hallar yarananda Azərbaycanda işlər daha yaxşı təşkil olunur.
“İqtisadi imkanları, maliyyə resursları bizdən qat-qat böyük olan ölkələrdə buna yanaşma fərqlidir”
Məsələyə münasibət bildirən ekspert Rəsul Cahangirlinin fikrincə, Prezidentin toxunduğu məqamlar reallığı özündə əks etdirir: “Azərbaycan digər dövlətlərlə müqayisədə bu məsələdə humanist yanaşma sərgiləyir. Bizdə təbii fəlakətdən zərər görənlərə daha çevik yardım göstərilir. Dəfələrlə bunun şahidi olmuşuq. Nəinki zəlzələ, digər təbii fəlakətlər baş verəndə də onun yaratdığı fəsadlar müvafiq qurumlar tərəfindən operativ şəkildə qiymətləndirilərək aradan qaldırılır. Məsələn, 2010-cu ildə Aran rayonlarında baş verən daşqınlar əhaliyə böyük zərər vurdu. Xeyli sayda ev, təsərrüfat sahələrinə ziyan dəydi. Bütün bunlar dövlət hesabına aradan qaldırıldı. İlham Əliyev prezident seçiləndən sonra bu kimi məsələlərə daha diqqətlə yanaşılır. Dəfələrlə rayonlarda zəlzələ baş verib və nəticədə vətəndaşların daşınmaz əmlakına ziyan dəyib. Buna baxmayaraq, hər dəfə dövlət vətəndaşın yanında olub. Ancaq iqtisadi imkanları, maliyyə resursları Azərbaycandan qat-qat böyük olan ölkələrdə buna yanaşma fərqlidir. Müəyyən mənada insanlar taleyin ümidinə buraxılır. İllərlə sığorta şirkətləri vətəndaşları süründürür. Dövlət ziyanın ödənilməsində iştirak etmir, prosesə nəzarət etmir”.
Bu baxımdan ekspert hesab edir ki, təbii fəlakətlərin yaratdığı fəsadların aradan qaldırılmasında ən optimal yanaşma Azərbaycanda mövcuddur.
Vidadi ORDAHALLI
