Məlum olduğu kimi, I və III ixtisas qruplarında bəzi ixtisaslar üzrə imtahan fənlərinə edilən dəyişiklik narazılıq yaradıb. Qəbul imtahanlarında I qrup üzrə imtahan verənlər informatika fənnindən də suallara cavab verməli olacaqlar. Bu dəyişiklik isə təhsil ictimaiyyəti tərəfindən birmənalı qarşılanmayıb. Qeyd edilir ki, yenə də əvvəlki kimi fənlərin sayını çoxaltmaqla imtahanları çətinləşdirmək istəyirlər.
Qeyd etdiyimiz kimi, I ixtisas qrupuna hazırlaşanlar artıq kimya fənnindən deyil, informatikadan imtahan verməli olacaqlar. Adıçəkilən ixtisas qrupuna informatika fənninin əlavə olunması təhsil ictimaiyyətinin narazılığına səbəb olub. Qeyd olunur ki, Dövlət İmtahan Mərkəzinin informatika fənninə aid test bazası, materialı yoxdur. Bu da abituriyentlər üçün çətinlik yaradacaq.
“İnformatika üzrə test bazası olmadığından, yaxın iki ildə bu qərarı icra etmək çətinlik yaradacaq”
Təhsil eksperti Kamran Əsədov bildirdi ki, informatikaya aid test bazası yoxdur. Dövlət qulluğuna, magistratura pilləsinə qəbul imtahanları zamanı hazırlıq kurslarının informatika materiallarından istifadə edilir. Dövlət İmtahan Mərkəzinin hələ ki, informatika fənninə aid test bazası yoxdur: “Qəbul sisteminə dəyişikliklər və bu sahəyə aid islahatlar tədris ili başlayandan sonra edilməli deyil. Çünki artıq oktyabr ayı başa çatıb, abituriyentlər növbəti il üçün hazırlıqlara başlayıblar. Etiraf edək ki, bu gün ali təhsil müəssisələrinə qəbul imtahanlarının nəticələri orta məktəb nəticələri deyil. Uşaqlar yaxşı nəticə göstərmək üçün hazırlıq kursları, repititor yanına gedirlər. Məlumdur ki, 1-ci ixtisas qrupu üzrə abituriyentlər artıq 7-8-ci siniflərdən kimya fənni üzrə hazırlaşmağa başlayırlar. Çünki kimya digərləri ilə müqayisədə bir az çətin fənn hesab edilir. Bu qərar əvvəlcədən Kompüter elmləri, Kompüter mühəndisliyi, İnformasiya texnologiyaları, İnformasiya təhlükəsizliyi ixtisaslarına qəbul olunmaq istəyən abituriyentlərin arzularının üstündən xətt çəkə bilər. İndi DİM təklif edir ki, bu ixtisaslara qəbul olunmaq istəyən abituriyentlər informatika fənnindən də əlavə imtahan versinlər”.
K.Əsədov hesab edir ki, informatika üzrə test bazası olmadığından, yaxın iki ildə bu qərarı icra etmək çətinlik yaradacaq: “Nəzərə almaq lazımdır ki, hazırda ölkədə ən ciddi müəllim çatışmazlığı informatika fənnindəndir. Baxmayaraq ki, informatika fənni əsas fənlər kimi 1-ci sinifdən 11-ci sinfə qədər tədris olunur. Bir də digər fənlər nəzəri, informatika isə praktiki elmdir. Birincisi, hazırda mövcud dərsliklərimiz test tapşırığı hazırlamağa uyğun deyil. İkincisi, informatika fənni qəbul imtahanında istifadə edilə biləcək qədər keyfiyyətli tədris edilmir. Üçüncüsü, bunun yoxlanılması üçün nümunəvi test tapşırıqları yoxdur. Yəni biz birdən-birə nümunə testini hazırlayıb, vəziyyətdən çıxa bilmərik. Biz bu dəyişikliyə yaxın iki ildə keçməməliyik. İnformatika fənninin hazırda imtahana əlavə edilib tətbiqinə başlanılması yeniliyə uyğun olmayacaq. Bunu düzgün qiymətləndirmirəm”.
Günel CƏLİLOVA
