Şanlı tariximizin unudulmaz səhifəsinə çevrilən İkinci Qarabağ müharibəsində Vətən torpaqların azadlığı uğrunda şücaət göstərərək şəhidlik zirvəsinə ucalan minlərlə igid Azərbaycan oğlanlardan biri də Cəlil Cavadovdur. İndi Lerik rayonunda böyük də, kiçik də öz qəhrəman oğlu ilə qürur duyur, fəxr edir.
Onun müqəddəs, şərəfli bir yolda şəhid olmasının ildönümü mərasimi çox möhtəşəm keçirildi. Mərasimdə Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev, Milli Məclisin deputatı İqbal Məmmədov, Müdafiə Nazirliyinin əməkdaşları, şəhidin döyüş yoldaşları, şəhid ailələri, müharibə iştirakçıları və ictimaiyyət nümayəndələri iştirak edirdilər. Ziyarətçilər birinci şəhidin məzarına baş çəkdilər, uyduğu torpağı tər gül-çiçəklərə bələməklə əziz xatirəsinə dərin ehtiramlarını bildirdilər.
Şəhid kapitan Cəlil Cavadov və Vətən müharibəsi şəhidlərinin xatirəsinə rayonda bulaq və abid kompleksi ucaldılıb. Tədbir zamanı bulaq və abid kompleksinin açılışı da oldu. Burada Azərbaycan Respublikası Dövlət Himni səsləndi, Azərbaycan Respublikasının müstəqilliyi və ərazi bütövlüyü uğrunda döyüşlərdə həlak olmuş şəhidlərin əziz xatirəsini yad etmək üçün bir dəqiqəlik sükut elan edildi. Mərasimi açan Müdafiə Nazirliyinin polkovniki Abdulla Qurbani dedi: - Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında müzəffər Azərbaycan Ordusu işğal altındakı Vətən torpaqlarını 44 günə işğalçı düşməndən azad etdi. Bu Zəfər şəhidlərin qanı, canı bahasına qazanıldı. Ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarının xatirəsi xalq tərəfindən ehtiramla yad olunur və zaman-zaman onların döyüş yolu, şücaəti, fədakarlığı gələcək nəsillərə örnək olacaqdır.
Tədbirdə Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev öz çıxışda bildirdi ki, Vətən torpaqlarının işğaldan azad edilməsi uğrunda gedən döyüşlərdə şəhid olmuş qəhrəman Vətən övladlarının əziz xatirəsi həmişə ehtiramla yad edilir, onların keçdiyi döyüş yolu Vətənə, torpağa bir sevgi nümunəsi kimi təbliğ olunur. Müharibədə Lerik rayonundan olan qəhrəman oğullarımız da Prezident, Silahlı Qüvvələrin Ali Baş Komandanı cənab İlham Əliyevin rəhbərliyi altında hərbi əməliyyatlarda misilsiz rəşadət göstərməklə öz qanları bahasına əsl tarix yazdılar. Şəhid kapitan Cəlil Ağaddin oğlu Cavadov da belə. Qəhrəman Azərbaycan oğlanların göstərdiyi hünər hər bir azərbaycanlı üçün daim bir örnək olacaqdır.
Milli Məclisin deputatı İqbal Məmmədov, şəhid ailə üzvləri, şəhidin döyüş yoldaşları, eləcə də rayon sakinləri çıxışlarında şəhidlərə göstərilən ehtirama, şəhid ailələrinə, qazi və Vətən müharibəsi iştirakçılarına verilən diqqət və qayğıya görə ölkə rəhbəri İlham Əliyevə və Birinci vitse-prezident Mehriban xanım Əliyevaya səmimi minnətdarlıq etdilər.
Tədbir Azərbaycan Prezidentinin Sərəncamı ilə təltif olunmuş şəhidlərin medalları onların ailə üzvlərinə təqdim olunmaqla başa çatdı.
Zəfər ORUCOĞLU Azərbaycan Jurnalistlər Birliyinin üzvü
