Kürdəmirin Şilyan kəndində şəhid adı daşıyan, lakin bu ada yaraşmayan təhsil ocağı mövcuddur. Şəhid Elxan Zülfüqarovun adını daşıyan bu məktəbin dam örtüyü qırıq, döşəməsi və tavanı çürük, qapısı və pəncərəsi yoxa bərabərdir. Məktəb ötən əsrin 70-ci illərində tikilib və bu vaxta qədər əsaslı təmir olunmayıb. Təhsil ocağının acınacaqlı vəziyyətdə olması şagirdlərin dərsə davamiyyətinə də öz mənfi təsirini göstərir.
Məlumat üçün bildirək ki, Şilyan kənd tam orta məktəbi bir korpus və 18 sinif otağından ibarətdir. Məktəbdə 400 nəfərə yaxın şagirdin tədrisi ilə 30 müəllim məşğul olur. Bundan başqa, məktəbdə 18 nəfərlik texniki heyət fəaliyyət göstərir.
Təhsil ocağının təmiri ilə bağlı məktəb kollektivi və rəhbərliyi dəfələrlə aidiyyəti üzrə müraciət etsələr də, bugünə kimi səslərinə səs verən olmayıb. Kənddə olan digər iki məktəb əsaslı təmir olunduğu üçün bəzi valideynlər haqlı olaraq uşaqlarını həmin məktəblərə aparır. Müəllim isə heyəti qəzalı vəziyyətdə olan məktəbdə dərs deməyin mümkünsuz olduğunu deyir: “Məktəbin istilik sistemi yoxdur. Çarəsizlikdən odun peçi quraşdırmışıq. Ancaq pəncərələr qırıq olduğu üçün odun peçi də effekt vermir”.
Maraqlıdır, şəhid adını daşıyan məktəbə nə səbəbdən ögey münasibət bəslənilir?
“Növbəti illərdə məktəbin təmiri ilə bağlı lazımi addımlar atılacaq”
Kürdəmir Rayon Təhsil Şöbəsinin əməkdaşı Xalid Bayramov bildirdi ki, təmsil etdiyi qurum məktəbin vəziyyəti ilə bağlı məlumatlıdır: “Məktəbin təmiri artıq plana salınıb. Bu barədə Təhsil Nazirliyinin müvaviq şöbəsinə məlumat verilib. Növbəti illərdə məktəbin təmiri ilə bağlı lazımi addımlar atılacaq”.
Günel CƏLİLOVA
