Yazıçı-publisist, “İki sahil” qəzetinin əməkdaşı Nurəddin Ədiloğlu Vətən müharibəsinə həsr etdiyi kitabına “Şəhidlik manifesti” adını seçib. Bu günlər rayon rəhbərliyinin, şəhid ailələrinin, millət vəkillərinin, ictimaiyyət və KİV nümayəndələrinin iştirak ilə Masallı rayon Heydər Əliyev Mərkəzində kitabın təqdimat mərasimi keçirildi.
Tədbirdən öncə Ulu Öndər Heydər Əliyevin abidəsi ziyarət edildi, önünə tər güllər düzüldü. Daha sonra İkinci Qarabağ müharibəsində torpaq uğrunda canından keçən Vətən oğlanların xatirəsi bir dəqiqəlik sükutla yad edildi. Masallı Rayon İcra Hakimiyyətinin başçısı Şahin Məmmədov tədbirdə çıxışında dedi:- Möhtərəm Prezidentimiz, Ali Baş Komandan İlham Əliyevin rəhbərliyi altında müzəffər Azərbaycan Ordusu tərəfindən 44 günlük Vətən müharibəsində yeni tarixə imza atan igidlərimiz az yaşasalar da şərəfli ömrə sahib oldular. Qələbəni bizə bəxş edən qəhrəman oğulları hər kəs tanımalıdır. Bu mənada Nurəddin müəllim qələbə aldığı “Şəhidlik manifesti “ kitabı ilə təqdirəlayiq bir iş görmüşdür. Kitabın ərsəyə gəlməsində əməyi olanlar təşəkkürə layiqdirlər, belə kitabların Vətən şəhidlərin təbliğində, gənclərin vətənpərvərlik ruhunda tərbiyəsində əhəmiyyəti olduqca böyükdür. Bu cür qəhrəmanlıq salnamələrinin tədris ocaqlarında təbliği çox vacibdir.
Milli Məclisin üzvləri Məşhur Məmmədov, Anar İsgəndərov, “Regional hüquqi və iqtisadi maarifləndirmə” İctimai Birliyinin sədri Arzu Bağırova, iki şəhid anası Ziba Əsgərova bildiriblər ki, şəhidlərimizin adlarının əbədiləşdirilməsi, xatirələrinə həsr olunan abidə və bulaqların açılması, şəhid məzarlarının müqəddəs ziyarətgaha çevrilməsi, onların şərəfli həyat və döyüş yolunun yaddaşa köçürülməsi hər birimizin vətəndaşlıq borcudur. Ərazi bütövlüyümüz uğrunda həlak olanların xatirəsini yaşatmaq naminə yazılan “Şəhidlik manifesti” kitabı yeni nəslə parlaq bir töhfədir.
Çıxışlarda o da vurğulandı ki, kitabda tarixi Qələbəmizlə başa çatan Vətən müharibəsində şəhid olmuş Masallı elinin 61 şəhid əsgər və zabiti haqqında bədii-publisistik məqalə və esselər, o cümlədən ümumilikdə Qarabağ uğrunda savaşda həlak olan 246 döyüşçü haqqında xronoloji məlumat vardır.
Həm də, kitabın ərsəyə gəlməsində müəllifə, Milli Məclisin deputatı Məşhur Məmmədova, Masallı Təhsil Fondunun əməkdaşlarına, RİHM İB-nin sədri Arzu Bağırovaya, zəhməti olan hər kəsə minnətdarlıq olundu.
Kitabın müəllifi Masallı torpağında boya-başa çatan, yazıçı-publisist Nurəddin Ədiloğlu yazı prosesi zamanı, şəhid ailələri ilə görüşdə yaşadığı həyacanlı anlardan, şəhidlərimizin taleyindəki maraqlı nüanslardan danışdı, kitabı şəhidlərin ruhu qarşısında özünün hesabatı saydı.
Tədbirdə şəhid ailələrinə və təqdimat mərasimi iştirakçılarına kitabın nüsxələri hədiyyə edildi, müəllif N. Ədiloğuna və RİHM İB-nin sədri A. Bağırovaya Masallı rayon İcra Hakimiyyətinin başçısının Fəxri fərmanları təqdim olunmaqla başa çatdı.
Zəfər ORUCOĞLU Azərbaycan Jurnalistlər Birliyinin üzvü
